Salamo 78 - Iaai Bible 1901 (New Caledonia)

Salamo anyi Asafa, hnân ûnö.

¹ LAKEIK lö, tevehlöng ju hnok hnanyibu: Ta ju je hnyikönyöbun ka ta je ifucin hnyimök.

² Oge me he ka khong hnyimök me ûhöûcû; Oge me he ka ha ta je hofuc ae iyong kâû adrem:

³ Waleji ta je ûnyi ate me long me khanʼ ota, Ke haba lakamöta adre me ha gaga köta.

⁴ Ate me ca he ka ikhâlâ ge ta je mâtrânidra, Kʼ adre me he ka ha gaga je hna oganö Iehova ka dö ame he ka o but, Ke tang hwegien, me ta je ûnyi hnân lâiâ gan waleji e ame ânyâ.

⁵ Anyin a e ame otilâ unyi Jekob ûnyi hnân ohnatho, Kʼ ame omanenâ hnanyibu unyi Isaraela, Waleji e ame hûna ka lakamöta, Mʼ adre me he bi ka omanenâ ka lakudra:

⁶ Me me khana thö hnen dö ame he ka o, a lakudra adre me he ka hnokoâ; Mʼadre me he bi minya ka todrö me ha gaga ka lakudra:

⁷ Mʼ adre me he ka geju ka Khong, Me ca hnying je huliwa anyin Khong, Mʼ adre me he ka tuö anyin je hnanyibu:

⁸ Mʼ adre me ca he ka tha ûcû me lakamödra, Waleji dö ae ûjöng me ûkhin fuc; Wale tavat adre me ca penapena ta je hnyekudra, Ke ca hnathu ta je hanudra ka Khong.

⁹ Adre me kec dö hnyi bonginy vat Lakon Eferaima adre penapena me hom je cafana.

¹⁰ Adre me ca vheno hna ûhihinyköu me Khong, Kʼ adre höcö he ka vheno anyin hnanyibu;

¹¹ Kʼ adre me hnying anyin ta je huliwa, Me hnen je hna ânyâ hnân lâiâ, waleji e ame omanenâ kodra.

¹² E ame ânyâ ta je ûnyi hnân lâiâ hnyi hnyimakan lakamödra, Hnyi hnyei Aigupito, hnyi ta hnyei hnyi Zoana.

¹³ E ame subâ luâ köiö, me bi dedra; Ke e ame otilâ köiö helâ me li kbölöki.

¹⁴ Haba hnyi lany e ame su ödra ge ûlâ, Ke melaminy meic hnyi je hnyinghet hia.

¹⁵ E ame thö luâ je kic hnyi hnyebuba, Me habelidra helâke me ûnyi hnyi je dok ae dit.

¹⁶ E ame oâ minya ûnyi hnyi kic je wadutö ame hingölö Me hingâlâ köiö helâ me je wagewe.

¹⁷ Ke so bi adre me monu bala bi kâu, He ka thu musi anyi Beönua hnyi hnyebuba.

¹⁸ Ke adre me cubec Khong ge je hnyekudra Hnyi hnödra hna sumatö ö ʼdra meno.

¹⁹ Eke, adre me ulidro Khong; Haingödra, ka habe, Hawa, e khana Khong he ka laulau hnyi hnyebuba?

²⁰ Me wâ bi, e ame kot kic, me ame hingölö but köiö, Ame bahihingölö ta je wadutö; Ke hawa, e khana he ka ham jeû minya? Hawa, e ame he ka penapena utiö hobi kâu lakeiny?

²¹ Anyin a wale Iehova ame long, me ame wathethot dö: Ke adre hû meic unyi Jekob, Kʼ ame ölö bi minya hmönyin kö Isaraela;

²² Anyin adre me ca labageju ka Khong, Me gejon anyin ûhomeli.

²³ Ke so bi e ame hûna ka ta je ûlâ ethö, Me khong ut ta je hwanumen drany;

²⁴ Ke e ame hingâlâ ûnyi ethö mana he ka ha ö ʼdra, Me ham kodra jeû ûnyi hnyi drany.

²⁵ Haba tavat, adre me ve an jeû an tavat ae hwege: E ame kûnâ kodra jeû a sekudra.

²⁶ E ame okûâ thö ang hwei ûnyi hnyi drany: Me lelö hwaiöu ge maniny man.

²⁷ Ke e ame hingâlâ kodra ûnyi ethö minya utiö helâ me sesâ, Me je meno ame gâ helâ me önyin köiö:

²⁸ Ke e ame okoloâ hnyi wanben hnödra hna hunuma, Igigilö ta je hnyabadra.

²⁹ Me adre me han me sekudra hmonyin; Ke e ame hna but kodra wedra

³⁰ Ke adre me ca thawâ bala bi hnödra hna weny, Ke tiga e bi utiö hnyi je hnyimödra,

³¹ Me ame kû thö hmönyin anyin Khong kodra, Me hlingâ ta je pipikhenya unyidra, Me kot degecâ wahidröu hnyi Isaraela,

³² Ke so bi adre me tiga ânyâ hulo, Kʼ adre ca labageju bi hnyi anyin ta je huliwa hnân lâiâ.

³³ Anyin a wale e ame ohia bongudra je bong hnyi ûnyi baû, Ke je hunaidra hnyi ot.

³⁴ Hnyi ûen e ame hlingʼ ödra, me adre me elâm dö e: Adre me hmetuhmetu, me hwege hnö Khong.

³⁵ Ke adre me ûnykûme a Khong thibi kicidra, Me Khong ae Beönua at ame omeli ödra.

³⁶ Ke adre me ûtakû ge hnyimödra kâu, Ke thoi kâu ge je bohmödra.

³⁷ Anyin ae ca wisa hnyekudra kâu, Kʼ adre me ca hnathu bi ka hnyi hna ûhihinyköu mē.

³⁸ Ke e at ae unöngöt ge ibetengiö, me e ame thang anyidra hulo, kʼ ame ca ohiʼ ödra bi: Eke, e ame osehia ohmeto anyin hmonyin, Ke ame ca oubâhlâ anyin wathethot.

³⁹ Ke e ame ûnykûme a ödra tavat bi; A ang ame he but, kʼ ame ca hmetu but.

⁴⁰ Ke ti se hia hnödra hna ûkhin fuc mâu hnyi hnyebuba, Me ojâtâ hnyekon hnyi hnyot!

⁴¹ Ke adre me hmetuhmetu me cubec Khong, Me haiûhnyûkongoâ At ae Kap anyi Isaraela.

⁴² Adre me ca ûnykûme bi hnyamen, Me bong waleji e ame omeli ödra hnyin ûnyi ge iwahnaihmiöny.

⁴³ Me hnen hna otilâ hnyi Aigupito anyin ta je haten, Me anyin ta je ûnyi hnân lâiâ hnyi ta hnyei hnyi Zoana;

⁴⁴ Me wia anyidra je wagewe, me me dra bi, Me anyidra ta je di, mʼ adre me ca be hmetu ka ic.

⁴⁵ E ame kunâ kodra ta je nöng he ka ûlûʼ ödra; Me je rana he ka ohiʼ ödra.

⁴⁶ Ke e ame ham troban ta idra ka ta je ihmâ Me anyidra huliwa ka ta je wahamon.

⁴⁷ E ame omoko haledra je vine ge we ae wahma, Me haledra ta je ûö sukamore ge megic.

⁴⁸ E ame hna but minya haledra ta je meno ka we ae wahma, Me je hnahat haledra ka ta je hucuce.

⁴⁹ E ame kunâ kodra hlönginy anyin wa thethot, A hmönyin, me wathethot, me vec, A je hna kunâ ae kong.

⁵⁰ E ame bi gethen deny anyin hmönyin; E ame ca hom behânâ hanudra ge mok, E ame hna but anyidra möt ka mok ae cap;

⁵¹ Me hlingâ watö hnyi Aigupito, Je wahwege ae nua hnyi je uma mano umö Hama:

⁵² Ke e ame lelö lakeiny helâ me je ma moe, Me su ödra hnyi hnyebuba helâ me hnahat meno.

⁵³ Ke e ame su ödra tilʼ ödra wia, mʼ adre me ca ot bi: Ke ame hûlûlûâ je iwahnaihmiöny mödra hnen köiö.

⁵⁴ Ke e ame hum ödra ka hnyi baten anyin dok ae kap, Wale becen ang, a ûco hnen hnyamen a metân.

⁵⁵ E ame obâ aten ke je hnyei hnyi hnyi makodra, Me ve khene idra hnen tulut, Me olaba je tribu Isaraela hnyi umödra je uma mano,

⁵⁶ Ke so bi adre me cubec me ûkhin fuc me Khong ae Beönua, Me ca vheno bi hnen je hna ohnatho.

⁵⁷ Ke adre me hmetuhmetu me iyâwâ helâ me lakamödra: Adre me saû but helâ me cafana ame onua.

⁵⁸ Anyin a adre me ohmönyinâ e ge anyi dra je dok ae gorany, Me ociâ e ge anyidra je hnatheat,

⁵⁹ Ke haba Khong ame long, me e ame hmönyin, Me ame ti ikikiâ at Isaraela:

⁶⁰ Me e ame hna degecâ uma hnyi Silo, Waleji uma mano e ame otilâ unyin tavat;

⁶¹ Me hna anyin hwege ka hnyi hwenbâ, Ke hmanenanginy ka hnyi hnyamen iwahnaihmiöny.

⁶² E ame hna but minya lakeiny ka hnyi hele vat; Ke e ame hmonyin ka jekhon.

⁶³ Haba meic ame an wahidröu unyidra; Ke ba khumönginy faipoipo ge wahlu.

⁶⁴ Ame ta but anyidra tavat bihut ge hele vat; Kʼ ame ca tengiʼ ödra hnen anyidrin ta je safac.

⁶⁵ Waleling me me hmak dö Than helâ me at ame mokut, Helâ me at ae hwege ame kuku can ame ic waina.

⁶⁶ Ke e ame kot tilâ ta je iwahnaihmiöny mē hnyi kec a ödra: Me hnʼ ödra hnân taben ûhiö nyiele balua.

⁶⁷ Ke haba khaca, e ame hom behânâ uma mano umo Josefa, Kʼ ame ca ûca bi tribu Eferaima;

⁶⁸ Ke e ame ûca tribu Juda, Wale bucen Ziona e ame hnyok kâu.

⁶⁹ Ke e ame op umen uma kap helâ me je dok ae gorany, Helâ me hmeledrany waleji e ame otethmâ nyiele balua.

⁷⁰ E ame ûca minya Davita me me athnyabainy, Kʼ ame hom but e ûnyi hnyi je haginy mamoe:

⁷¹ E ame hom e ûnyi hnyi hnen hna he hoton je mamoe ame ûasin, Me me hao Jekob a lakeiny, me Isaraela wale jekhon.

⁷² Me e ame haödra hoton wisainy hnyekon: Me su ödra hnen metâiny li hnyamen.