Salamo 76 - Iaai Bible 1901 (New Caledonia)

Hobi kâu at vhik khumöng; hnyi Neginoth. Salamo anyi Asafa, a Khumöng.

¹ E KHANʼ ödra but Khong hnyi Juda: E gan hmâ ien hnyi Isaraela.

² Ke e bi hnyi Salema umen uma menâ, Ke e hnyi Ziona hnyaban.

³ E ame thu degecâ eling je fanainy cafana; Me bec, me hele vat, me vat. [Sela.

⁴ U hmanenang me so ûheny hnyi je bucen adre sei hnyin.

⁵ Adre hia but söh tavat hwege adre me mokut balua but; Ke adre me ca wâ hmetu ta je hnya-mödra hnen tavat hwege hia.

⁶ Khongu Jekob lö, ûnyi ge hnâm hna thawâ, Ame tha mokut hnying kariota me hors.

⁷ U thibi hnân outen, wale a u:! Ke ie at ame he ka tot hnyi hnyimâkâm u ka hmönyin dö?

⁸ Ûnyi hnyi drany u je olöngâ hnâm hna owisa; Ame ot bi hmeledrany me ca bwebwet,

⁹ Waleji hnyi hna tot hnen Khong he ka owisa, Me omelo tavat ae hnyikânâ eang hmeledrany hia [Sela.

¹⁰ E hnathu ame he ka oganö u hnen hmönyin anyin tavat: Ke u me he ka thawâ kolon je wathethot.

¹¹ Hûkölö khöbi ju, me thamuâ kö Iehova Khongubun: E so ame he tavat hia adre me laba igigilo e ka ham je bwihlany ka at ae ûcû ke ka outen.

¹² E ame he ka sö degecâ but hanon ta je tuhan: E at hnân outen ka ta je thaniny hmeledrany.