Salamo 74 - Iaai Bible 1901 (New Caledonia)

Salamo anyi Asafa, hnân ûnö.

¹ KHONG lö, ieû gam u me ûdigic balua but? Ieû ame sâ gan ânyâm hmonyin ka hnahat mamoe a em?

² Ûnykûme ju ânyâm ûkhacaköu waleji u je ûco ehac, Waleji u je bi hwaban me me tribu a jekhom; Me bucen Ziona, dok u je laba hnyin.

³ Ogöranyâ thö li cam hon ta je uma ae ûnyi baû bala but, Wale ta je ûnyi ae kong hia ame ânyâ hnen iwahnaihmiöny hnyi dok ae kap.

⁴ Haba ta je iwahnaihmiöny me adre me hmuhmu hnyi wanben ânyâm ûkhacaköu; Adre me hai thö anyidra je boûdila me hnân je haten.

⁵ E manen dut e helâ me at ame hai thö Ta je giwa hnyi hnyot ae wanenec.

⁶ Ke walang haba ta je ûnyi adre kave mecâ, Adre me tha kot degecâ ge je gö me je hama.

⁷ Adre hia but thong degecâ umâm uma kap; Adre hia but okongoâ hnyaban iâm ke ne o but ka hnyi kânâ.

⁸ Haingödra eû hnyi je hnyekudra, ka habe, Otin e he ka tha walakʼ ödra: Adre hia but thong degecâ je uma ûkhacaköu hia umen Khong hnyi hnyei.

⁹ Ate me ca wâ ta je hatöta: E ba hmetu bi perofeta; Ke ba at gata ame wâ ûen ame he ka bi obiny hnyin.

¹⁰ Khong lö, ke ne o but kehö ame he je iwahnaihmiöny ka ûhaikonguny? Hawa, ame he bala bi iwahnaihmiöny ka hmi ödra iâm?

¹¹ Hnân eû u je hom hmetu hnyamâm, wale hnyamâm a metâm? Lau but ûnyi hnyi ûlâiâm me ohiʼ ödra.

¹² Ke Khong thibi Tuhok kâû adrem, At ame huliwan hna ûhomeli hnyi wanben hmeledrany.

¹³ U je hia but subâ luâ köiö ge tang hwegiâm: U je thö ban ta je tanimo hnyi je köiö.

¹⁴ U je kot omomono ta je ban leviathana, U je ham e hnân han ka tavat adre labâ hnyebuba.

¹⁵ U je khenâ luâ pupua me wadutö: U je ohmö ta je wagewe ae gan hmâ.

¹⁶ Ânyâm bi lany ânyâm minya bi lit: U je hia but penapena melam me seûno.

¹⁷ U je hia but ip je hnyigöulen hmeledrany hia: U je hia but op honivakeny me hnyeun,

¹⁸ Iehova lö, ûnykûme thö ûnyi ang, a ga hia but iwahnaihmiöny ûhaikonguny, Ke adre hia but hmiödra iâm hnen tavat ae monu.

¹⁹ U na ca he ju ka hna halem biny ka menoiny hnyot: Ca he bala ka hnying möt anyin lakem adre me vec.

²⁰ Ûnykûme ju ânyâm ûhihinyköu: Anyin ae unöngötö je dok ae menekholom eang hmeledrany ge je hnyaban ûkonguny.

²¹ E na ca he ju ka hmetuhmetu me hmehma tavat adre me okongoâ: E so e he ka ogânâ iâm hnen at ame vec me at ae ba ta ûnyi.

²² Khong lö, todrö, ivino thö hobi köu bi: Ûnykûme ju hna haikongu u hnen at ae monu hnyi ta je bong.

²³ Ca he ka hnying ifucin je iwahnai hmiöny möu: Ame ölö bala goranyai imedien tavat adre me tot köu.