Salamo 61 - Iaai Bible 1901 (New Caledonia)

Hobi kâu ai vhik khumöng; hnyi Negina. Salamo anyi Davita.

¹ KHONG lö, long ju hok hwatenge; Tevehlöng ju hijik hic.

² Oge me he ka hongot köu ûnyi hnyi can hmeledrany, e ka hloûhloû hnyekuk: Lili nya ju ka hnyi kic gorany hok.

³ Anyin a u thibi hnok hna lubaduöng hnyin, Me hnabâ ae hwege hnyi hnyimakan iwahnaihmiöny.

⁴ Oge me he ka laba hnyin umâm uma menâ nyiele balua: Oge me he ka lubaduöng hnyi hmenon li labenyâm. [Sela.

⁵ Anyin a haba u Khong lö, u je hia but long anyik je khöbi: U je hia but ham könya jekhoû e ûcû kodra adre me outen iâm.

⁶ U me he ka bi hanen ta je bong ka je bong bongon than: Kʼ ame helâ me ta je dö ae se ta je hunainy.

⁷ E ame he ka laba hnyi hnyimakan Khong nyiele balua: U na penapena thö ibetengiö me hnathu, hnân he ka tuö e.

⁸ Me oge me he ka khumöng ogânâ iâm nyiele balua, Mʼ inye he ka vheno thö anyik je khöbi hnyi je bong.