Salamo 60 - Iaai Bible 1901 (New Caledonia)

Hobi kâu at vhik khumung: adre me hai hnyi Susani Edutha: Salamo anyi Davita, hnân ûnö: hnyi ûen e ame vat me Arama-naharaimi me Arama-zoba, walegi hnyi ûen ame hmetuhmetu Joab me kot tavat a twelv thauzan at Edoma hnyi hnyigöulen bucen Sâlt.

¹ KHONG lö, u je hia but hna degeci ohmun, me thö hagutʼ ohmun; U je hia but hmönyâm; u na he ju ka otilʼ ohmun hmetu.

² U je hia but bwebwelâ hmeledrany; u je hia but kia e: Tibet hmetoâ thö je hmoucainy; anyin ame bwebwet.

³ U je hia but omanenâ ka lakem ta je ûnyi ae hmak: U je hia but kunʼ ohmun he ka ijem waina ame omonumonu at.

⁴ U je hia but ham boûdila ka tavat adre me outö u, Me me he ka manen can hnathu. [Sela.

⁵ E so u ma omelo ge hnyamâm a metâm, me ling ohmun ju. Me me möt ut tavat u me betenge gadra,

⁶ A hia but Khong fuc hnyi hwakecin ae kap; oge me he ka ohobeluâ: Oge me he ka khenâ Sekema, me tuluto hnyigöulen bucen Sukotha.

⁷ Anyik bi Gileada, ke anyik Manase; Ke singiny bok Eferaima; Ke Juda anyik uciny musi.

⁸ Moab anyik utkaia hnân soû; Oge me he ka khûâ hnyi Edoma tangen hnyeûcak: Filisiti lö, hongot dö goranyai can inya.

⁹ Ie at ame he ka hum nya ka hnyi taun ae hwege? Ia hia but lili nya Edoma ai?

¹⁰ Khong lö, hawa, ca u thibi at ame hna degeci öhmun? Khong lö, u je ca tha he me anyihmun je utbavat.

¹¹ Hadruʼ ohmun dö ûnyi ge iwahnaihmiony: Anyin ae ûnyi baû bi hna hadruâ hnen at.

¹² Ûnyi ge Khong, ate me he ka hwege: Anyin a e thibi at ame he ka uto ta je iwahnaihmiöny möta.