Salamo 6 - Iaai Bible 1901 (New Caledonia)

Hobi kâu at vhik khumöng; ge Neginoth, adre hai hnyi eitiny. Salamo anyi Davita.

¹ IEHOVA lö, ca he ka û nya hnyi ânyâm hmonyin, Ke ca he minya ka nö nya hnyi ânyâm wathethot.

² Iehova lö, betenge ju gak; anyin a meleca thö unyik; Iehova lö, ometu nya, anyin ame öbubuny je jeien unyik.

³ Kʼ ame ot gan hmâ hanuk: Ke haba u Iehova, me ieû ûen gam?

⁴ Iehova lö hmetu jem, me omelo hanuk: Omeli nya ûnyi ge ânyâm ibetengiö.

⁵ Anyin a haba ödra ka mokcu, me adre me ca he bi ka ûnykûmi u: Ie at ame he ka ole köu eû hnyi erkemok?

⁶ Iny sënyin dut ge anyik mâng; Ame uoû hnok hna mokut ge tenge hnyi je lit hia; Oge me okhubetâ hnok hna mokut ge deköien li emakök.

⁷ Ame jok ut li emakök ge hloûhloû; Ke hadedak ûnyi ge je iwahnaihmiony mönya hia thithö.

⁸ Ûsâkâûö but mönya, öbun hia th hö hnyat öbun e ânyâ hulo; Anyin a hia but Iehova long hok hwatenge.

⁹ Iehova ame hia but long hnok hna sumâtâ; Ame he Iehova ka kap hijik hic.

¹⁰ Ame he ka hmehma me ot gan hmâ ta je iwahnaihmiony hia thithö mönya: Adre me ne ka hmetuhmetu, kʼ adre me he ka ie hmehma.