Salamo 47 - Iaai Bible 1901 (New Caledonia)

Hobi kâu at vhik khumöng: Salamo anyin laku Kora.

¹ TA je hnyei hia thithö lö, khaûkhaû ju je hnyamöbun; Hongot ka Khong ge hwan manhic.

² Anyin a Iehova Beönua at hnân outen; E than ae gan hmâ hon hmeledrany hia thithö.

³ E ame he ka hom ûhnyûkongo ta je hnyei eû hnyi hmelita, Me tavat minya eû hnyi hmelen hnyeûcata.

⁴ E ame he ka ûca jekhoû hobi köta, Waleji ame oûnyihnatho Jekob at e ame betenge gan. [Sela.

⁵ Ame ölö thö Khong tha e me hwahongot hwege, Wale Iehova me ifucin trutru.

⁶ Khumöng oganâ thö Khong, khumöng oganâ thö: Khumöng oganâ thö Tuhöta, khumöng oganâ thö.

⁷ Anyin a Khong Tuhan hmeledrany hia thithö: Khumöng oganâ thö, tha e me wâ ûnykûme.

⁸ Khong ame muso hon je hnyei: Khong ame laba hon anyin theron ae kap.

⁹ Ame ûkhacaköu thö ta je tuhan je hnyei, Me me lakeiny Khongu Aberahama: Anyin a anyin Khong ta je becin hmeledrany; Ke e ti beönua.