Salamo 40 - Iaai Bible 1901 (New Caledonia)

Hobi kâu at vhik khumöng. Salamo anyi Davita.

¹ OGE me labö halubahing Iehova; Me e ame tevehling nya, me long anyik tenge.

² E ame öû nya minya göranyai ûnyi hnyi thop ae lulung, me ûnyi hnyi kânâ ae kece; Me e ame otilâ li cak hon kic, me otethmâ hnok je hna okca.

³ E ame ip hnyi hnyimök khumöng ae teb ûnyi, wale he ka ogânâ Khonguta: Ame he tavat ae se ka wâ, me ot, Me geju kö Iehova.

⁴ Hnahic hnen at ame hum Iehova me hnân gejon, Kʼ ame ca ûnykûme ka at ame hnyok bi gan, me tavat adre me saû ka hnyi thoi.

⁵ Iehova Khonguk lö, e se hia ânyâm ta je huliwa hnân lâiâ u je ânyâ, Me hnâm ta je hna ûnykûme kohmun: Ca hnân he ka ha gaga köu; Oge ne beomanenâ me ha, Me ti se hia hmönvin a ca hnân bi aû.

⁶ E ca wem hut adre me hlingâ me bwihlany; U je koû li hnyikönyök: U je ca hawâ hudiny leû me hudiny hulo.

⁷ Ke haingök, Wâ ju, inya ang: Adre me sihnalimen gak hnyi tusi adre vhec:

⁸ Khonguk lö, oge me senyin he ka ânyâ wem; Eke, eû hnyi hnyekuk ânyâm hnanyibu.

⁹ Oge hia but khetâ hwakecin ae wisa hnyi ûkhacaköu ae gan; Wâ bi, oge me ca he ka behânâ li esongodik, E manen köu e, Iehova.

¹⁰ Oge ca hia but ikhâlâ eû hnyi hnyekuk hwakecâm ae wisa; Ke oge hia but omanenâ ânyâm hnathu me ûhomeli gam: Oge ca hia but ikhâlâ ânyâm ibetengiö me hnathu ka ûkhacaköu ae gan.

¹¹ Iehova lö, ca behânâ bi gak ânyâm je tang betenge: E so ame he bala ânyâm ibetengiö me hnathu he ka tuö nya.

¹² Anyin ame igigili nya hnen ta je hulo a ca hnân bi aû, Ame hia but hom tilö nya hnen anyik je hulo, me ma ca khanö nya he ka bwele goranyai; Ae se hia hon ûseiny leûnen bok, me ame gâuk.

¹³ Iehova lö, ö u he ju ka omeli nya; Iehova lö, logotö he ka hadruo nya.

¹⁴ E so adre me he ka hmehma me tha monumonu Tavat adre me elâm hanuk he ka ohia e: E so adre me he ka ohmetuhmeto me ohmehma Tavat adre me senyin ge hna okongu nya.

¹⁵ E so adre me he ka ba wan hwaban hwakecidrin hnân ohmehma, Tavat adre me ha könya, ka habe, Ohö, Ohö.

¹⁶ E so adre me he hia tavat adre me elöm u ka hobâ me senyin köu: E so adre me labö ha hnen tavat adre me hnyok ka ânyâm ûhomeli, ka habe, Oganö Iehova thö.

¹⁷ Ke iny vec me theduoc; Ke so bi Than ame ûnykûmi nya: U thibi at ame hadruo nya me omeli nya; Khonguk lö, ca he ka bec.