Salamo 36 - Iaai Bible 1901 (New Caledonia)

Hobi kâu at vhik khumöng. Salamo anyi Davita athnyabai Iehova.

¹ AME ba eû hnyi hnyekuk ge hna hanyâûâ hnen at ae kong, ka habe, E ca hu hnyi li emakan, hna outen Khong.

² Anyin a e ame haisoâ e bi hnyi ka hnyimakan bi, A adre me ca he ka wâ anyin hulo, me ikikiâ e.

³ E kong me iyawö ta je hofuc ûnyi hnyi hnyimen: E ame ca metâ hmetu me ânyâ so.

⁴ E ame ûnykûme ûokonguny hon hnen hna mokut; E ame labö vheno gethen ae ca so; E ame ca ikiki ge monu.

⁵ Iehova lö, ethö hnyi drany ânyâm ibetengiö; Ke ne o but hnyi je ûlâ ânyâm hnathu.

⁶ Haba ânyâm wisa, me helâ me je bucen anyin Khong; E dit hmonyin hnâm je hna owisa: Iehova lö, u thibi at ame tuö möt anyin at me meno.

⁷ Khonguk lö, shaiba ge iûnyihnathuiny ânyâm betenge! Kʼ ame labageju lakon tavat hnyi hmenon li labenyâm.

⁸ Adre me he ka sekudra gan hmâ ge ta je ûnyi ae pipikhenya hnyi umâm uma; Ke u me he ka habelidra ge wageweiny ânyâm senyin.

⁹ Anyin a e bi unyâm pupuainy möt: Ohmun e he bi ka wâ melam hnen ânyâm melam.

¹⁰ U na he bala ju ka betenge ge tavat ae khanʼ ödra u; Ka ânyâ hwakecâm ae wisa ka tavat adre me hnyok wisa.

¹¹ Ca he bi ka hna hnyeûcan at ae bi gan he ka tot könya, Ke ca hna je hnyamen tavat ae kong he ka obö nya.

¹² Waleling ame ta but tavat adre me ânyâ ûnyi ae kong: Adre me hagut ʼödra, ke ca khanʼ ödra hmetu bi he ka tot.