Salamo 34 - Iaai Bible 1901 (New Caledonia)

Salamo anyi Davita; hnyi ûen e ame wia bi hwakecin hnyi linyimakö Abimelek, ke e ume obâ e me me he but.

¹ OGE me he bala ka haisoi Iehova hnyi je ûen hia; Ame he bala hnyimök ka oganâ e.

² Ame he hanuk ka hobeluö Iehova: Ame he tavat ae ilemuk ka long me senyin.

³ Öbun na tha he ju mönya he ka oganö Iehova, Ke so otin e he ka tha ogöranyâ ien.

⁴ Oge me elöm Iehova, me e ame ling nya, Me omeli hya ûnyi hnyi anyik je ot hia.

⁵ Adre me wâ e, me adre me melam but: Ke ame ca he bi je hnyimakodra ka hmehma.

⁶ Ame hongot dö at eang ame hom vec, kʼ ame long ut Iehova, Me omelo e ûnyi hnyi anyin ta je vec hia thithö.

⁷ Ame hunuma angela anyi Iehova igigilo tavat adre me outen e, Me omeli ödra.

⁸ Öbun na drem cubecâ ju me wâ a at ibetengiö Iehova: Hnahic hnen at ame labageju kâu.

⁹ Öbun na he ju ka ot kö Iehova, öbun laten ae kap: Anyin ae ba ke ûnyi ae ba gadra adre me outen.

¹⁰ E ba an, ke mekihnânem bi je nak liona: Ke haba tavat adre me elöm Iehova, me ba ke ûnyi ae so ame he ka hia gadra.

¹¹ Ai öbun je wanakat, ling nya ju: Me oge me he ka nʼ öbun ge bongon he ka outö Iehova.

¹² Ie at ae bemöt, Ke weny ta je bong, me me wâ thö so?

¹³ Kât je bohmâm me me ca hulo bi, Ke li esongodâm wâ e nye fuc thoi.

¹⁴ Hota ju hulo, ke mâdrâ so; Elâm hnahic, ke hnu hoton.

¹⁵ E bala li emakö Iehova hon tavat ae wisa, Ke haba li hnyikonyen ame long hodrin hwahongot.

¹⁶ Kʼ ame khot bi hnyimakö Iehova ka tavat adre me ânyâ hulo, He ka subâ degecâ but nyingen hna ûnykûme kodra ûnyi ge aten hmeledrany.

¹⁷ Ame hongot tavat ae wisa ke Iehova ame long, Me omeli ödra ûnyi hnyi anyidra ta je vec hia thithö.

¹⁸ E hakekeny Iehova ka tavat ae hmak je hnyekudra, Kʼ ame omelo tavat ame vec hanudra.

¹⁹ E se hia ta je vec anyin at ae wisa: Ke Iehova ame omelo e ûnyi hnyi ta je ûnyi hia.

²⁰ E ame tuö ta je jeien hia thithö: E ba me khaca ame he ka hmetru.

²¹ Ame he monu ka hlingâ at ae monu: Ke haba tavat adre me hûkotiâ at ae wisa me adre me he ka hângʼ ödra bi.

²² Iehova ame omelo hanon lathnyabainy; Ke adre me ca ho ka hangâ ke at unyin tavat adre me labageju kâu.