Salamo 31 - Iaai Bible 1901 (New Caledonia)

Hobi kâu at vhik khumöng. Salamo anyi Davita.

¹ IEHOVA lö, inya oge me labageju köu; iny na ca he ju ka hmehma: Omeli nya thö ge hwakecâm ae wisa.

² Ta ju li hnyikönyâm könya; ie omeli nya thö: U na he ju ka kicik ae hwege, me hnabâ hnân omeli nya.

³ Anyin a u thibi kicik, me hnok hnabâ; Anyin a wale lili nya thö me su nya ûnyi ge iâm.

⁴ Uny nya but ûnyi hnyi ert adre me thong duöngâ gak; Anyin a u thibi hnok hnabâ.

⁵ Inya oge me hna hanuk ka hnyi hnyamâm: Iehova lö, Khongon hnathu, u je hia but bi hwaban anyik möt.

⁶ Hûkötiânök tavat adre me hnyok ka ta je ûnyi baû me thoi: Ke oge me labageju kö Iehova.

⁷ Oge me he ka hobâ me senyin ge ânyâm tang betenge: Anyin a u je hia but wâ anyik vec; U je hia but wâ ûnykûme hanuk hnyi ta je ûöveci:

⁸ Ke u je ca hia but theling nya hnyin hnyamen iwahnaihmiony; U je hia but ip li cak hnyi dok ae gan.

⁹ Iehova lö, betenge ju gak, anyin oge me vec: A jok ut li emakök ge hloûhloû, eke, me hanuk me unyik minya.

¹⁰ Anyin ame kec dö bonguk je bong hnyi tenge, me je hunaik hnyi mâng: E mita but tang hwegiök can anyik hulo, ke ame aû but je jeiok.

¹¹ Can je iwahnaihmiony mönya, adre me haikongu nya; Eke, iny ti kong ut hnyi hnyimakan je liamewaeny mönya, ke at ootâ lahanök: Adre me kec gak tavat adre me ö nya eû hnyi gethen.

¹² Adre me hnying nya but eû hnyi je hnyekudra helâ me komok: Iny helâ me kaia ae hmouca but.

¹³ Anyin oge hia but long hna bifuco hnen tavat ae se, Kʼ adre me öbubuny hnyi je ke keihen hia: Ke adre me tiga tha fakatau nya, Me adre me sihnök he ka ohia anyik möt.

¹⁴ Ke so bi, Iehova lö, oge me labageju köu, Haingök, ka habe, U thibi Khonguk.

¹⁵ Haba bonguk ta je bong me eû hnyi hnyamâm: Ö u omeli nya ûnyi hnyi hnyamen ta je iwahnaihmiony mönya, me tavat adre me sedö nya.

¹⁶ Oumumelamâ thö hnyimâkâm ka athnyabaem; Omeli nya thö hnen tang betenge gam.

¹⁷ Iehova lö, iny na ca he ju ka hmehma; anyin a oge hia but hao u: E so e he tavat ae monu ka hmehma, me laba hnyibû hnyi hedis.

¹⁸ E so he ka hum je esongot ae thoi; Wale adre me bifuco at ae wisa, Hnyi hop me bi gan.

¹⁹ Shaiba ge ûganiny ânyâm so, wale u je hitangen hobi kâu tavat adre me outö u, Waleji u me ânyâ hobi kodra adre me labageju köu, hnyi hnyimakan tavat!

²⁰ U me he ka olubaduongi ödra hnyi dok ae nuong unyâm ûnyi ge fakatau anyin tavat. U me he ka ikholʼ ödra hnyi uma menâ ûnyi hnyi iwatretra anyin ta je bohmen.

²¹ Haisoi Iehova thö: Anyin a e ame hia but omanenâ könya anyin ibetengiö hnân lâiâ hnyi taun ae hwege.

²² Ke haba inya hnyi anyik uthmâhmâ, oge me ha, ka habe, Adre subâ degeci nya ûnyi hnyi hnyimâkâm: Ke so bi u je long hwan anyik je sumat waleji oge me hao u.

²³ Hnyok ju kö Iehova, öbun laten ae kap hia: Iehova ame tuö tavat ae hnathu. Me bi hwaban gânâ ka at ame ânyâ hwakecin bi gan.

²⁴ Hwege thö, ke so ame he je hnyekubun ka hwege, Öbun tavat hia öbun e halubahing Iehova.