Salamo 30 - Iaai Bible 1901 (New Caledonia)

Salamo anyi Davita. Khumöng hnyi dilic uma.

¹ IEHOVA lö, oge me he ka oganö u, anyin a a je hia but ogöranyi nya, Me ca hna je iwahnaihmiony mönya he ka manhic könya.

² Iehova Khonguk lö, Oge me hongot köu, me u je hia but ometu nya.

³ Iehova lö, u je hia but hai goranyai hanuk ûnyi hnyi hedis: U je labö omeli nya mʼ inye ca hnyi utut ka hnyi thop.

⁴ Öbun anyin wakap lö, e so öbun e olungâ kö Iehova, Ke oleâ ka ien ae kap.

⁵ Anyin ae ti okhulit anyin hmonyin; E hu möt bi hnyi anyin ibetengiö baû Adre me ne tenge hnyi sahac, Me ame o thö senyin hnyi hnyomakatu.

⁶ Haba inya, hnyi ûen oge me labö sot, me oge me ha, ka habe, Oge me ca he bala bi ka bwebwet.

⁷ Iehova lö, ûnyi ge ânyâm ibetengiö baû u je otethmâ anyik bucen; U je ikhâlâ hnyimâkâm; me oge me hlohlo.

⁸ Iehova lö, oge me hongot köu; Ke oge me khöû kö Iehova.

⁹ Ieû troban drök iny ka utut ka hnyi thop? Hawa, ame he sesâiny kânâ ka oganö u? kʼ ame he ka haimemenâ ânyâm hnathu?

¹⁰ Iehova lö, long ju, me betenge ju gak: Iehova lö, u na he ju ka hadruo nya.

¹¹ U je hia but wia anyik hloûhloû ka hnyi biâ; U je hia but uny anyik ûkhaû ae gan nân, me oweikö nya bi ge senyin:

¹² Me me he ka khumöng oganö u hnen anyik mec, kʼ ame ca he ka laba hnyibû. Iehova lö Khonguk, oge me he ka oganö u nyiele balua.