Salamo 27 - Iaai Bible 1901 (New Caledonia)

Salamo anyi Davita.

¹ IEHOVA melamik me at ame omeli nya; oge ma outö ia? Iehova tang hwegien anyik möt; ia oge ma outen?

² Hnyi ûen ame o but könya tavat ae kong he ka an vik, Waleji ae hmönyidra könya ke iwahnaihmiony mönya, me adre me haû but me ta.

³ Eja ke ne a ne hunuma cici nya utbavat. Me ame ca he bi huyekuk ka ot: Kʼ ame ne kû thö vat könya, Me oge me he bala ka labageju.

⁴ Khaca thibi ûnyi oge hia but sumâtâ ga Iehova, kʼ oge me he bala ka elâm e; A oge me he bala ka laba hnyin uma umo Iehova hnyi je bongon hia anyik möt, He ka wâ hmanenangi Iehova, me hnö hnyi umen uma ae kap,

⁵ Anyin a haba hnyi ûen vec e ame he ka ikhölö nya hnyi umen uma menâ: E ame he ka tubi nya hnyi dok ae iyong hnyi umen uma mano; E ame he ka ip nya hon kic.

⁶ Ke walang ame he ka gorany bok hon ta je iwahnaihmiöny mönya hia igigili nya; Ke oge me he ka hudo je hudiny senyin hnyi umen uma mano; Oge me he ka khumöng, eke, oge me he ka khumöng olungi Iehova.

⁷ Iehova lö, long ju, iny ka hongot ge ifucik: Betenge ju minya gak, me thu thö könya.

⁸ Hnyi ûen u je ha, ka habe, Elâm dʼöbun hnyimakök; me ame ha hnyekuk, ka habe, Iehova lö, oge me he ka elâm hnyimâkâm.

⁹ U na ca he ju ka ikhâlâ hnyimâkâm gak; Ca he ka obâ athnyabaem hnyi hmonyin: U thibi at ame labö hadruo nya; Khong lö, at ame omeli nya, ca he ka hota degeci nya, me hnö nya but.

¹⁰ Anyin a cica me bai ödru me hna degeci nya, Ke ame he Iehova ka kop nya.

¹¹ Iehova lö, nö nya thö ge dem gethen; Ke su nya eû hnyi gethen ae wisa hon, Can je iwahnaihmiöny mönya.

¹² Ca hnö nya bi ka hnyi weny je iwahnaihmiöny mönya: Anyin adre me tot könya tavat adre me bifuci nya, me tavat adre me memenâ ûokonguny.

¹³ Oge me monumonu, oge ne ca gejon he ka wâ so ûnyi ga Iehova Hnyi hnyei iny tavat ae möt.

¹⁴ Halubahing Iehova ju: Hwege ju, ke so ame he hnyekom he ka hwege; Eke, e so u ma halubahing Iehova.