Salamo 22 - Iaai Bible 1901 (New Caledonia)

Hobi kâu ai vhik khumöng; adre me hai hnyi ailainy hnyomakatu. Salamo anyi Davita.

¹ KHONGUK lö, Khonguk lö, ieû gam u me hnö nya? Ke sâkâu he ka hadruo nya hnyi hok hwatenge?

² Khonguk lö, oge me hongot köu hnyi lany, kʼ u me ca long könya; Ke oge me ca laba hnyibû hnyi hnyinghet.

³ U at ae kap, At ame laba hnyi hna ûoganö hnö Isaraela.

⁴ Haba lakamöhmun adre me labageju köu: Adre me labageju, me u je omeli ödra.

⁵ Adre me tenge köu, me adre me möt ut: Adre me labageju köu, kʼ adre me ca hmehma bi.

⁶ Iny biget thibi, ke ea at bi; Wale hna haikongoâ hnen tavat, ke hna hmiân hnen tavat.

⁷ Haba tavat hia adre me ō nya, me adre me hlumö nya: Adre me obeûâ je esongodidra, me nyinyikâ je bödra, me haingödra, ka habe,

⁸ Hnö u thö kö Iehova; hamen bi he ka omelo e: Hamen he ka omelo e, anyin a e ame senyin kâu.

⁹ Ke u thibi at ame hum nya ûnyi hnyi hnyok: Me olabageju nya ûnyi hnyi li basi bai.

¹⁰ Adre me hnö nya köu hwân ge hna hnokoâ: U thibi Khonguk hwân a inya hnyi hnyeku bai.

¹¹ U me ca he ka ûsâkâûö mönya; anyin ae hakekeny vec; Anyin ae ba at he ka hadruo.

¹² E se hia je bolok adre me igigili nya: Kʼ ame tot igigili nya ta je bolokiny Basana hnyat ae hwege.

¹³ Adre me memang könya, Helâ me liona ame beoloû usukia kʼ ame kuku.

¹⁴ Adre me hingâlâ degeci nya helâ me köiö, Ke ame ok ut je jeiok hia: Haba oûnykûmik me helâ me wasu; Ame okoiâ but eû hnyi hnyekuk.

¹⁵ E atgec dö tang hwegiök helâ me wataginy kaia; Ke ame kece bohmök ka hnyi wahicok; Ke u je hia but hum nya ka hnyi sesâiny kânâiny mok.

¹⁶ Anyin a hia but igigili nya hnen ta je kuli; A hia but theling nya hnen je deo at ae kong: Me dâ li hnyamok me li hnyeûcak.

¹⁷ E khanö nya he ka aû je jeiok hia; Wale adre me ō nya me wâ hmö nya:

¹⁸ Adre me khenâ anyik je ûkhaû unyi drin bi, Me ugleköbâ anyik ûkot.

¹⁹ Ke so bi Iehova lö, u me ca he ka ûsâkâûö mönya: Tang hwegiök lö, logotö he ka hadruo nya.

²⁰ Omelo ju hanuk ûnyi ge hele vat; Me hnok hna betenge gan ûnyi hnyi hwegien kuli.

²¹ Omeli nya thö hnyi hnyimen liona; Eke, u je hia but long könya ûnyi hnyi li faoiny bolokiny hnyot.

²² Oge me he ka omanenâ iâm ka je liamekeiny mönya: Oge me he ka oganö u hnyi wanben ûkhacaköu.

²³ Öbun tavat öbun e outö Iehova, oganâ thö e; Haisoâ thö e öbun je mâtrâni Jekob; Ke outen ju e öbun je mâtrâni Isaraela hia thithö.

²⁴ Anyin a e ame ca hiniân me hûkötö ge vec anyin tavat ae vec; Ke khaca e ame ca ikhâlâ hnyimakan gan; Ke hnyi ûen e ame tenge kâu, ame long.

²⁵ Ûnyi thibi gam hna oganö nya hnyi ûkhacaköu ae gan hmâ: Oge me he ka subâ anyik je khöbi hnyi hnyimakan tavat adre me outen e.

²⁶ Haba at ae ilemuk, me, e ame he ka han me sekon: Ame he ka oganö Iehova hnen tavat adre me elâm e: E so ame he je hnyekubun ka möt nyiele balua.

²⁷ Ame he je can hmeledrany hia ka ûnykûme me hwio kö Iehova: Ke ame he ta je lap anyin ta je hnyei ka khudrung hnyi hnyimakan.

²⁸ Anyin a unyi Iehova dokhu: Ke e at ame muso ta je hnyei:

²⁹ Ame he hia tavat ae pipikhenya eang hmeledrany ka han me khudrung: Kʼ ame he ka nom kâu tavat hia adre me he ka hnyi kânâ, Wale at ae ca khana he ka omelo e bi.

³⁰ Ame be ke mâtrân ka bi athnyabainy; Kʼ adre me he ka ha dö a biliny ûnyi ge Than.

³¹ Adre me he ka o but me omanenâ hwakecin ae wisa Ka tavat adre me he ka hnokoâ, a gʼ ame ânyâ e.