Salamo 19 - Iaai Bible 1901 (New Caledonia)

Hobi kâu at vhik khumöng. Salamo anyi Davita.

¹ AME omanenâ je drany mec anyin Khong; Ke haba hnen ang ethö ame omanenâ huliwa anyin li hnyamen.

² Ame fuc ke bong ka ke bong, Ke ke lit ame omanenâ metâ ka ke lit.

³ E ba bi hwan me ba hofuc; Ke adre me ca long bi hodra.

⁴ Ame he but anyidrin tö tutut ka hnyi hmeledrany hia, Me hodrin je hofuc ke ne o but ka hnyi je can hmeledrany. E ame hia but otilâ hnyin uma menâ hobi kâu seûno,

⁵ Wale ae ûcû me at a tep faipoipo ame he but ûheny hnyi hnyeuleny, Ke e ame senyin helâ me at ae hwege he ka wadringâ deny gethen.

⁶ E ame o but ûheny hnyi can hmeledrany. Ke haba deny gethen ame he ke ne o but ka hnyi ke je can: Ke ba ke ûnyi adre ikhâlâ ûnyi ge kahwainy.

⁷ E bekhot ut hnanyibu anyi Iehova, ame ohâtâ hanu: Ke e hmâ hnö Iehova hna ohnathoâ, ame ometâ at ae ba oûnykûminy.

⁸ E wisa ta je hna hûna hnö Iehova, ame osenyinâ hnyok: E alai hnanyibu anyi Iehova, ame omelamâ je ecmak.

⁹ E kalaöt ot kö Iehova, ame tethmâ nyiele balua: E hnathu ta je hna owisa hnö Iehova, me wisa hia thithö.

¹⁰ Ame beönua hon gol, eke, me gol ae ao: E hnebwia hon hani minya, me bani adre ca hlec.

¹¹ Kʼ adre me khû hnyekon athnyabaem ge ta je ûnyi e: Ke gan hmâ troban kodra tavat adre me long hoton.

¹² Ie at ae khana he ka wâ monu unyin? Ö u degecâ but anyik ta je monu ae iyong.

¹³ Ö u thawâ ju athnyabaem mʼ oge me ca bi gan; Kʼ ame ca he ûnyi eling ka musi nya: me me wisa hwakecik, Ke ba hnyikonguk ûnyi ge hna hanyâûâ ae gan hmâ.

¹⁴ E so e me he je hofuc hnyi hnyimök me je hna ûnykûme eû hnyi hnyekuk ka ûcû but hnyi hnyimâkâm, Iehova, kicik, at ame omeli nya.