Salamo 18 - Iaai Bible 1901 (New Caledonia)

Hobi kâu ai vhik khumöng. Salamo anyi Davita athnyabai Iehova, waleji at ame ha kö Iehova je ifuciny khumöng ang hnyi bong Iehova o ne omelo e ûnyi hnyi hnyamen je iwahnaihmiöny mē hia, me ûnyi hnyi hnyamâ Saulo: ke haingen, ka habe,

¹ IEHOVA lö, tang hwegiök, oge me hnyok köu.

² Iehova thibi kicik, me hnok hnabâ, me at ame omeli nya; Khonguk, kicik ae hmâ, oge me he ka labageju kâu; Becik, me faoiny meno hnân omeli nya, me anyik tap ae beû goranyai.

³ Oge me he ka hongot kö Iehova, at ae ûcû hnân oganâ: Me ame he ka omeli nya ûnyi ge je iwahnaihmiony mönva.

⁴ Adre wadrö nya ge ta je tö hnân mekiny, Kʼ ame ooti nya hnen je uoûiny hwakecin ae kong.

⁵ Adre igigili nya ge je toiny erkemok: Ame o but könya ta je hnewe hnân mekiny.

⁶ Oge me hongot kö Iehova hnyi anyik vec, Me khöû ka Khonguk: Ke e ame long hok hofuc hnyi umen uma ae kap, Ke hok hwatenge hnyi hnyimakan ame o but ka hnyi li hnyikonyen.

⁷ Ke ame bwebwet me öbubuny hmeledrany, Ke memeny dö minya taben je bucen, Ke okokok ut, anyin a e hmonyin.

⁸ Ame sâ hai ûnyi hnyi li hnyingöiny, Ke meic ame han ûnyi hnyi hnyimen: Kʼ ame möt dö gan ta je walep.

⁹ E ame oto minya drany, me utut; Ke eû hmelen li can bi menekholom ae khot.

¹⁰ Ke e ame laba hon kerubi, me gâ: Eke, e ame gâ mweimwei hon li labenyin ang.

¹¹ E ame lubaduöng hnyi menekholom, wale umen uma menâ igigilo e; Wale angwe, a je ûlâiny drany ae haki

¹² Kʼ ame aû but anyin je ûlâ ûnyi ge melaminy hnyimakan, We ae wahma me je walepiny meic.

¹³ Iehova ame bi hwan than minya hnyi drany, Kʼ ame fuc dö Beönua; We ae wahma me je walepiny meic.

¹⁴ Ke e ame fana anyin je fana me ovesei ödra; Eke, je hucuce ae se, me omomonu ödra.

¹⁵ Ke manen dut je deny je di, Kʼ adre me omanenâ ta je taben hmeledrany, Ge hnâm hna thawâ, Iehova, Ûnyi ge homenâiny li hnyingoiâm ae hwege.

¹⁶ E ame ûkhûnöng ûheny thö, e ame hum nya; E ame lili nya ûnyi hnyi je köiö ae se.

¹⁷ E ame omeli nya ûnyi ge iwahnaihmiony mönya ae hwege, Me tavat adre me hûkötiö nya, anyin a ödra hwege huk.

¹⁸ Adre me o könya hnyi bonginy anyik vec: Ke Iehova cik.

¹⁹ E ame su nya minya ka hnyi dok ae lau; E ame omeli nya anyin a e ame senyin könya.

²⁰ Haba Iehova ame bi hwaban könya hoton hwakecik ae wisa; E ame bi hwaban könya eûcû me li hnyamok ae kalaöt.

²¹ Anyin oge hia but vheno je gethen de Iehova, Ke oge me ca saû degec monoâ Khonguk.

²² Anyin a eû bi hnyi hnyimakök hnen je hna owisa hia, Ke oge me ca hota but gak anyin je hnanyibu.

²³ Ke ba hnyikonguk minya gan, Ke oge me tuö nya bi ge anyik hulo.

²⁴ Anyin a wale a hia but Iehova bi hwaban könya hoton hwakecik ae wisa, Me kalaötiny li hnyamok hnyi hnyimakan.

²⁵ U me he ka betenge ka at ame betenge; U me he ka wisa ka at ae wisa;

²⁶ U me he ka hwakecin ae kalaöt, ka at ae kalaöt hwakecin; Ke u me he ka ânyâ hwali ka at ae hwali hwakecin.

²⁷ Anyin a u me he ka omelo tavat ae vec; Ke u me he ka ohnyikânâ je ecmak ae bi gan.

²⁸ Anyin a u me he ka omelo anyik lamepa: Ame he Iehova Khonguk ka omelamâ anyik menekholom.

²⁹ Anyin a ûnyi gam oge me utut ka hnyi hon deo vat; Ke ûnyi ge Khonguk oge me gâ hanyâûâ hna up hak.

³⁰ Ke haba Khong, e wisa deny gethen: Haba hofuc ho Iehova adre me cubec; E thibi bec anyin tavat hia adre me labageju kâu.

³¹ Anyin a ia Khong, e ka ca Iehova? Ke ia bi kic, e ka ca Khonguta?

³² Wale Khong at ame oweikö nya ge man, Me owisa dek gethen.

³³ E ame ânyâ li cak me me helâ me je aila: Me ip nya hon anyik je dok ae gorany.

³⁴ E ame nâ li hnyamok he ka vat; Me ame oto cafana bras ge li hnyamok.

³⁵ U je hia but ham minya könya becin ânyâm ûhomeli: Kʼ ame kop nya goranyai hnyamâm a metâm, Kʼ ame oganö nya hwakecâm ae menyik.

³⁶ U je ogânâ hnok je hna okca hmelik, Kʼ ame ca haûhaû li hnyeûcak.

³⁷ Oge me he ka hnu hoton je iwahnaihmiony mönya me khöû ödra: Kʼ oge me ca he ka hmetu ke ne o but adre ohiʼ ödra.

³⁸ Oge me he ka kot mou ödra mʼ adre me ca he ka tot hmetu: Kʼ adre me he ka ta but eû hmelen li cak.

³⁹ Anyin a u je oweikö nya ge man ae gan hobi kâu vat: U je hom ûhnyûkongu ödra eû hmelek, tavat adre me tot könya.

⁴⁰ U je wia hoton je iwahnaihmiony mönya könya nya bi, Me inye he ka subâ degecâ tavat adre me hûkötiö nya.

⁴¹ Adre me khöû ke ba at ûhomeli: Wale kö Iehova, ke e ame ca fuc kodra.

⁴² Me oge me kot omomonu ödra helâ me sesâ hnyi hnyimakan ang: Oge me kot degeci ödra helâ me hmudrainy gethen.

⁴³ U je omeli nya ûnyi hnyi je iwatretra anyin tavat; U je wiö nya me hnân ban ta je hnyei: Ame he ka bi athnyabaik tavat ae ca khanö nya.

⁴⁴ Adre me he ka long me ie long hotuk: Kʼ ame he je atkanyua ka nom könya.

⁴⁵ Ame he je atkanyua ka aû tot, Me o ûnyi hnyi anyidrin je dok ae nuong me öbubuny.

⁴⁶ E möt Iehova; e so he ka olongo kicik; Ke so adre me ogöranyâ Khongon melik:

⁴⁷ Wale Khong at ame bi nya, Kʼ ame hom ûhnyûkongoâ ta je hnyei hnyi hmelik.

⁴⁸ E ame omeli nya ûnyi ge je iwahnaihmiony mönya: Eke, u je ogöranyi nya hon tavat adre me tot könya: U je omeli nya ûnyi ge at ûokonguny.

⁴⁹ Anyin a wale oge me he ka oleâ köu Iehova, hnyi wanben ta je hnyei, Me khumöng olungo iâm.

⁵⁰ E gan hmâ hnen hna oâ ûhomeli hobi, kâu than a aten; Me e ame omanenâ ibetengiö ka hnen hna hû, A Davita me je mâtrâniny nyiele balua.