Salamo 17 - Iaai Bible 1901 (New Caledonia)

Hic hiji Davita.

¹ IEHOVA lö, long ju ûnyi ae wisa, hwio jem ka anyik tenge; Tevehlöng ju hijik hic, ame ca o ûnyi hnyi li esongot ae thoi.

² E so ame he ka o ûnyi hnyi hnyimâkâm hna owisa gak; E so ame he li emâkâm ka wâ ûnyi ae ûcû.

³ U je hia but cubec hnyekuk; me sene nya hnyi lit; U je hia but cubic nya, ke ba wânâm; Oge me ip hmâ eû hnyi hnyekuk a gʼ ame ca he hnyimök ka hanyâûâ.

⁴ Haba ta je huliwa anyin tavat, me, ûnyi ge ifuciny li esongodâm Oge hia but tuö nya mʼ inye ca he hnyi je gethen deny tavat ûkuc.

⁵ Ame he hmâ hnok je hna okca hnyi dem je gethen, Kʼ ame ca haû bi li cak.

⁶ Khong lö, oge hia but hao u, anyin a u me he ka ling nya: Tevehling nya ju, melöog ju hok hofuc.

⁷ Omanenâ thö ânyâm ibetengiö ae gan hmâ, u thibi at ame omelo tavat adre me labageju köu Ge hnyamâm a metâm, unyin tavat adre me tot kodra.

⁸ Tuö nya ju helâ me wahlidriny ecmak, Ikhölö nya ju hnyi hmenon li labenyâm,

⁹ Ûnyi ge tavat ae kong tavat adre me oaûö nya, Wale ta je iwahnaihmiony hmonyin könya, hnyat adre me igigili nya.

¹⁰ Adre me lan ödra bi ge anyidra pipikhenya, Kʼ adre me hobeluʼ ödra ge je hnyimödra bi.

¹¹ Walang ang adre me igigilo hnöhmun je hna okca: Adre me iwahmö he ka otai ohmun hnyikânâi.

¹² Haba at e, me helâ me liona ame bekia he ka han, Ke helâ me nak liona at ame laba tue hnyi je dok ae iyong.

¹³ Iehova lö, tödro, Tot metâ kâu, me hagutâ e: Omelo thö hanuk ûnyi ge at ae kong ge ânyâm hele vat;

¹⁴ Iehova lö, omeli nya thö ûnyi ge tavat hnen hnyamâm, Ûnyi ge aten hmeledrany, tavat tren jekhoû hnyi möt ang, U je öunöngötâ je tang tidra ge tang omjehem: Adre sekudra but je lakudrin, Ke adre me hna kolon ge anyidrin ta je ûnyi ka lakudrin je mendring.

¹⁵ Ke haba inya oge me he ka wâ hnyimâkâm hnyi hwakecin ae wisa: Ame he ka sekuk, iny ka hmak dö a tha helâ möu.