Salamo 145 - Iaai Bible 1901 (New Caledonia)

Salamo hnân ogânâ; anyi Davita.

¹ KHONGUK lö, Than, Oge me he ka oganö u: Ke oge me he ka haisoâ iâm nyiele nyiele balua.

² Oge me he ka haisoi u hnyi je bong; Ke o ge me he ka ogânâ iâm nyiele nyiele balua.

³ E gan hmâ Iehova, me hnân ti ogânâ; Ke ca hnân elâm ûganiny.

⁴ Ame he ke dö ka ogânâ ânyâm ta je huliwa ka ke dö, Me omanenâ hnâm ta je hna ânyâ ae man.

⁵ Oge me he ka ûnykûme hmanenanginy ûgânâm ae mec, Me hnâm ta je hna ânyâ hnân lâiâ.

⁶ Ke ame he tavat ka ha ge man maniny ânyâm ta je huliwa hnân outen; Ke oge me he ka haimemenâ ûgânâm.

⁷ Adre me he ka ha hnödra hna ûnykûme ge ânyâm so ae gan hmâ, Me khumöngö hwakecâm ae wisa.

⁸ E betenge baû me betenge vec Iehova; E bec he ka hmönyin, ke betenge gan hmâ.

⁹ E so Iehova ka ta je ûnyi hia; Ke e hon anyin ta je huliwa hia anyin ibetengiö

¹⁰ Iehova lö, ame he ka oleâ köu ânyâm ta je huliwa hia thithö; Ke ame he ânyâm wakap ka haisoi u.

¹¹ Adre me he ka ha hmanenanginy dokhom dokhu, Me ûhnenamö manâm man;

¹² Mʼ adre me he ka haimemenâ ka lakon tavat anyin ta je huliwa ae man, Me hmanenanginy dokhon dokhu ae mec.

¹³ Haba dokhom dokhu, dökhu a nyiele balua, Me ka ta je dö hia thithö ânyâm musi.

¹⁴ Iehova ame cö tavat hia adre me ta, Me otilâ wisa tavat hia adre me iyâû.

¹⁵ Ame hngele but köu je emaködra hia: Me u je ha ödra hnyi ûen ae ûcû.

¹⁶ U je lau hnyamâm, Me osekunâ ta je ûnyi hia thithö ae möt.

¹⁷ E wisa Iehova hnyi deny ta je gethen hia, Kʼ ame betenge hnyi anyin ta je huliwa hia.

¹⁸ E hakekeny Iehova kodra hia adre me hawâ e, A tavat hia adre me hawâ e hnyi hnathu.

¹⁹ E ame he ka ânyâ weny tavat adre me outen e; E ame he minya ka long hodra hwatenge me omeli odra.

²⁰ Iehova ame tuʼ ödra hia adre me hnyok kâu; Kʼ ame he ka ohia tavat hia ae kong.

²¹ Ame he hnyimök ka ha hnân oganö Iehova; Ke so ame he tavat hia ka haisoâ ien ae kap nyiele nyiele balua.