Salamo 144 - Iaai Bible 1901 (New Caledonia)

Salamo anyi Davita.

¹ E SO he ka haisoi Iehova a kicik, At ame nâ li hnyamok he ka vat, Me je banyök he ka ûkûc:

² At ame betenge gak, ke hnok hnabâ, Anyik tap ae beû gorany, me at ame omeli nya; Becik, me at oge me labageju kâu; At ame hom ûhnyûkongoâ lakeik eû hnyi hmelik.

³ Iehova lö, ehö at, me u me wâhmakhmeto e? Me nokon at, me u me he ka wâ ûnykûme e?

⁴ E ûcû at me ûnyi ae ûnyi baû: Ke bonginy ta je bong e ûcû me hmenu ame hia but.

⁵ Iehova lö, ken dut ânyâm drany me ölö Kâlâ ju ta je bucen me me he ka sâ.

⁶ Jijingâ but hucuce, me ovesei ödra; Fana but ânyâm ta je fana me omonumonu ödra.

⁷ Hinôbeny dut ûheny thö; Omeli nya but, me hûgûnö nya ûnyi hnyi je köiö ae gan, Me hnyamen ta je atkanyua;

⁸ Hnyat adre me fuc baû ge je hnyimödra, Ke haba je hnyamödra a metödra, me, ûthumetu ae thoi.

⁹ Khong lö, oge me he ka hai köu khumöng ae teb ûnyi: Oge me he ka khumöng köu ge nabeli ae hu toiny a ten.

¹⁰ E thibi at ame ham möt ka ta je than: At ame omeli Davita a athnyabainy ûnyi hnyi hele vat hnân mekiny.

¹¹ Omeli nya me hûgûnö nya ûnyi hnyi hnyamen ta je atkanyua, Hnyat adre me fuc baû ge je hnyimödra. Ke haba je hnyamödra a metödra, me, uthumetu ae thoi.

¹² E ka helâ me je ûö ame kû so lakuta obaga hnyi anyidra hidröu; Ke lakuta wahlu helâ me vetoiny bahebet adre me tretrao hnân uma umen than;

¹³ E ka unöngötö umöta ta je omhani ge ta je jeû ae ve bongon hia; Kʼ ame he haleta ta je mamoe ka hnokoâ je thauzan me je ten thauzan hnyi ta ita;

¹⁴ Hnyi ûen adre me hijen je hok ae gan haleta je bolok; Ke ba hmetu ûhagutö ka hnyi taun me hna utut hnyou ai, Ke ba hwatenge hnyi deta ta je gethen;

¹⁵ Awe, hnahic hnen hnyei a helâe; Eke, hnahic hnen hnyei a Iehova Khongudrin.