Salamo 143 - Iaai Bible 1901 (New Caledonia)

Salamo anyi Davita.

¹ IEHOVA lö, long ju hijik hic; tevehlöng ju anyik je hwakhöû: Thu thö könya hnyi ânyâm hnathu, me hwakecâm ae wisa.

² Ke u me ca he ka ûhnei me athnyabaem; Anyin ae ba at ae möt ae wisa hnyi hnyimâkâm.

³ Anyin a hia but ovecâ hanuk hnen iwahnaihmiony; E ame hia but hagutâ melik hnyikânâi: E ame hia but olabö nya hnyi je dok ae lit, helâ me tavat a kueny mok.

⁴ Anyin a wale, ame hûlûlûâ hanuk eû hnyi hnyekuk. Kʼ ame ba wan hnyekuk.

⁵ Inya oge me ûnykûme je bong kâû adrem; Oge me labö ûnykûme ânyâm ta je huliwa hia: Oge me ûnykûme hna mâdrâ hnen li hnyamâm.

⁶ Oge me lau li hnyamok köu: E beic hanuk unyâm helâ me kânâ ae atgec. [Sela.

⁷ Iehova lö, mweimwei thö he ka thu könya; ame sënyin hanuk; Ca ikhâlâ bi gak hnyimâkâm; Wâ oge nye ûcû me tavat adre me utut ka hnyi erkemok.

⁸ Hnö nya he ka long ânyâm ibetengiö hnyi hnyomakatu; Anyin a inya oge me labageju köu: Okhanö nya thö gethen deny hanymök; Anyin oge me ogöranyâ hanuk köu.

⁹ Iehova lö, hûgûnö nya but unyin ta je iwahnaihmiony mönya: Oge hia but lubaduöng unyâm.

¹⁰ Nö nya thö he ka ânyâ wem; anyin a u thibi Khonguk: E so hanom; su nya ju ka hnyi hnyei iny hwakecin ae wisa.

¹¹ Iehova lö, omeli nya thö, ûnyi hnyi iâm: Hnyi hwakecâm ae wisa hum nya but ûnyi hnyi vec.

¹² Ke hnyi ânyâm ibetengiö subâ degecâ but ta je iwahnaihmiony mönya, Me ohia tavat hia adre me ovecâ hanuk; Anyin a inya athnyabaem.