Salamo 116 - Iaai Bible 1901 (New Caledonia)

¹ OGE me hnyok kö Iehova anyin a e ame hia but long Hok hofuc me anyik khöû.

² Anyin a e ame hia but ta hnyikonyen könya, Me oge me he ka hawâ e hnyi bonguk ta je bong hia.

³ Ame wadrö nya hnen ta je toiny mok, Me ame kot nya hnen ta je vecin erkemok: Oge me wâ vec me tenge.

⁴ Me oge me hawâ iö Iehova, ka habe, Iehova lö, ö u omelo thö hanuk.

⁵ E betenge me wisa Iehova; Eke, at ame betenge baû Khonguta.

⁶ Iehova ame tuö tavat ae ba hnyeku dra: Adre me hom ûhnyûkongu nya, me e ame omeli nya.

⁷ Hanuk lö, hmetu ju ka hnyi hnâm hna menâ; Anyin a hia but Iehova ânyâ köu so.

⁸ Anyin a u je hia but omelo hanuk me me ca mok, Me li emakök me me ca tenge, Me li cak me me ca ta.

⁹ Oge me he ka he hnyi hnyimakö Iehova Hnyi hnyei iny tavat ae möt.

¹⁰ Oge me labageju, wale me inye fuc dö: E gan hmâ anyik vec:

¹¹ Oge me ha hnyi hnok hna uthmâhmâ, ka habe, E thoi tavat hia thithö.

¹² Oge me he ka bi hwaban ge ieû kö Iehova Anyin ta je so hia könya?

¹³ Oge me he ka hom utkaia anyin ûhömeli,

¹⁴ Me hawâ iö Iehova. Oge me he ka thamuâ anyik ta je khöbi kö Iehova, Eke, hnyi hnyimakan lakeiny hia thithö.

¹⁵ E ûnyi hnathu kö Iehova Mok anyin anyin wakap.

¹⁶ Than lö, e hnathu inya athnyabaem: Inyʼ athnyabaem a nokon athnyabaem a momo; U je hia but thang hna cö nya.

¹⁷ Oge me he ka hudo köu hudiny ole, Me hawâ iö Iehova.

¹⁸ Oge me he ka thamuâ kö Iehova anyik ta je khöbi, Eke, hnyi hnyimakan lakein hia thithö;

¹⁹ Hnyi je hnyeuleny uma umo Iehova, Ke hnyi wanbâm Jerusalema. Oganö Ja thʼ öbun.