Salamo 115 - Iaai Bible 1901 (New Caledonia)

¹ IEHOVA lö, ca köhmun bi, ca kohmun bi, E so bi he ka hna hna olungâ ka iâm, Ûnyi hnyi ânyâm betenge me ânyâm hnathu.

² Hnân eû ame he ka ha ke je hnyei, ka habe, Ewa walang ang Khongudrin?

³ Ke ethö hnyi drany Khonguta: A hia but ânyâ hia hnen hna weny.

⁴ Haba anyidra ta je idola, me sileva me gol, A huliwan ta je hnyamen at.

⁵ E ve hu hnyimödra, kʼ adre me ca fuc bi; E ve hu li emaködra, kʼ adre me ca wâ bi;

⁶ E ve hu li hnyikönyödra, kʼ adre me ca long bi; E ve hu hnyingoidra, k ʼadre me ca bubune bi;

⁷ E ve hu li hnyamödra, kʼ adre me ca mâdrâ bi; E ve hu li cadra, kʼ adre me ca he bi; Kʼ adre me ca fuc bi a deny je jeköwidra,

⁸ Ame he tavat adre me up ödra ka helâ mödra; Eke, ödra hia hnyat adre me labageju kodra.

⁹ Isaraela lö, labageju thö kö Iehova: E thibi at ame hadruʼ ödra me becidra.

¹⁰ Lap anyi Arona lö, labageju thʼ öbun kö Iehova: E thibi at ame hadruʼ ödra me becidra.

¹¹ Öbun tavat outö Iehova lö, labageju thö kö Iehova: E thibi at ame hadruʼ ödra me becidra.

¹² Iehova ame hia but ûnykûmi öta; ke ame he ka ohnahici öta: E ame he ka ohnahicâ lap anyi Isaraela; E ame he ka ohnahicâ lap anyi Arona.

¹³ E ame he ka ohnahicâ tavat adre me outö Iehova, Tavat ae ûhnyûkong me tavat ae gan.

¹⁴ E na he ju Iehova ka osehiai öbun tilʼ öbun, Walʼ öbun me lakubun.

¹⁵ Öbun e hnahic ut ga Iehova, At ame op drany me hmeledrany.

¹⁶ Haba ta je drany, me je drany anyi Iehova; Ke e ame ham hmeledrany ka ta je lakon at.

¹⁷ Haba tavat ae mokcu, me adre me ca oganö Ja, Me tavat hia adre me utut ka hnyi dok adre me laba hnyibu hnyin.

¹⁸ Ke so bi ate me he ka haisoi Ja Hwân walang ang, ke ne o but nyiele balua. Ogânâ Ja thʼ öbun.