Roma 13 - Iaai Bible 1901 (New Caledonia)

¹ E SO ka tavat hia he ka long hoton ta je musi ae gan: anyin ae ba ke musi a ca ûnyi ge Khong; haba Khong ame otilâ ta je musi ehele.

² Anyin a wale haba at ame thu musi, me ame thu hna otilâ hnen Khong: kʼ ame he ka kap hnaûhango hnen hnyat adre me thu.

³ Anyin a haba tavat musi, me ca hnân ootâ bi at ame mâdrâ so, ke so bi at ame mâdrâ monu. Hawa, e wem u me ca he ka outen at ame musi? ânyâ thö hwakecin ae so, me wale ûnyi ame he ka haisoi u:

⁴ anyin a e athnyabainy Khong unyâm hobi kâu so. Ke u je ne mâdrâ hwakecin ae kong, ot ju; anyin a e ame ca vadren bâûâ hele vat: anyin a e athnyabainy Khong, at ame bi hwaban ge hmonyin ka at ae kong hwakecin.

⁵ Anyin a wale e ti ûcû köbun he ka long hoton, ca can hmonyin thibi, ke ûnyi minya bi ge ûnykûm sah.

⁶ Anyin a wale öbun e bi fat minya; anyin a ödrin lathnyabainy Khong, kʼ ödrin e tuö bala hanymen eling.

⁷ Ham dö ka tavat hia anyidra ta je ûnyi: khûö ka at adre me khûö kâu; fat ka at adre me fat kâu, ot ka at adre me ot kâu; ogânâ at adre me ogânâ.

⁸ Ca hom bah ûnyi anyin ke at, ke so bi he ka ibetengiököu: anyin ame ohwâdâ hnanyibu at ame betenge ka ke at.

⁹ Ke walang ka habe, U ca he ka bi ûnyi monu, U ca he ka ûlingö, U me ca he ka venöu, U ca he ka behnyekom, ke a ne hu ke hnanyibu, wale thibi e hnyin hofuc ang, ka habe, U me he ka betenge ge at ame laba hakekenyi u helâ me u bi.

¹⁰ Haba ibetengiö, ca at ame okongoâ at ae hakekeny: anyin a wale haba ibetengiö wale at ame ohwâdâ hnanyibu.

¹¹ Ke walang ang, e khanʼ öta ûen, a ûen dut ang öbun e he ka hmak ûhebun hnyi hna mokut: anyin ae hakekeny jut walang ang möt, ke sâkâû ehac waleji kʼ ate me labageju.

¹² E beû hmâ but lit ke hakekeny jut lany: anyin a wale ate me he ka hna degecâ but ta je huliwa anyin lit, ke so ate me he ka khavâ ûkhaû hnân vat anyin lany.

¹³ E so ate me he fâfâ helâ me hnyi lany; ca hnyi walak me ic monu, ca bi ûnyi monu me wagelue, ca hnyi iwatretra me ihunyinköu.

¹⁴ Ke khavâ ju öbun Than Iesu Keriso, ke ca penapena bi hobi kâu unyin, be ka ohwâdâ je weny e.