Owisa 9 - Iaai Bible 1901 (New Caledonia)

¹ KE haba Abimelek nöku Jerubaala ame he Sekema ai ka je liamekeiny me hinyen, me ûhnenamö mödrin, me lap hia anyin kamen hinyen, me ha, ka habe,

² Ö öbun e ha ka hnyi hnyikonyen tavat hia hnyi Sekema, ka habe, Hawa e so köbun ame he bi laku Jerubaala hia a sevente ka musi öbun, ke hawa, ame ne so at a khaca he ka musi öbun? Ke ûnykûme ju öbun a jeiöbun me utiöibun inya.

³ Me ame ûhnenamö gan je liamekeiny me hinyen ka hnyi hnyikonyen at Sekema hia je hofuc hia eling: ke ame hmehmela je hnyekudrin he ka he hotu Abimelek, anyin a haingödrin, ka habe, Liamekeiny emötin.

⁴ Ke ödrin e ham kâu je mone a sevente ûnyi hnyi uma umo Baala-berith, me Abimelek ame ûco je hnyat ae monu me hop, kʼ ödrin e hnu hoton.

⁵ Me e ame he ka hnyi uma umen kamen hnyi Ofera, me hlingâ je liamekeiny mē a laku Jerubaala a sevente, hon veto a khaca: ke kolon thiju Jotham noku Jerubaala a wakeiat; anyin a e ame lubaduöng.

⁶ Ke ame ûkhacaköu at Sekema hia, me lap anyi Milo hia, me he me otilö Abimelek me me than, hnyi iwajo, baten veto ame tot hnyi Sekema.

⁷ Ke adre me thumetu Jotham, me e ame he me tot hon bucen Gerezim, me fuc goranyai me hongot me ba ködrin, ka habe, Ling nya ju öbun at Sekema, me me ling öbun bi Khong.

⁸ Haba ta je ûö hnyi ke bong ehac adre me he ka hû ke than hobi ködra bi; me adre me ha ka ûö elaio, ka habe, U me he ka musi ohmun bi.

⁹ Ke haingen ûö elaio kodra, ka habe, Hawa, oge me he ka hna degecâ anyik pipikhenya wale adre ogânâ Khong me at ûnyi gak, me he ka bnyi-hnvikö hââng me jem hon ta je ûo?

¹⁰ Me ame ha je ûö ka imeta, ka habe, Aiö u, u ma he ka musi ohmun.

¹¹ Ke haingen imeta ködra, ka habe, Hawa, oge me he ka hna degecâ hnebwiaik, me je wan gak ae so, me he he ka hnyihnyikö hââng me jem hon je ûö?

¹² Ke haba je ûö adre me ha ka vine, ka habe, Aiö u, he ka musi ohmun.

¹³ Ke haingen vine ködra, ka habe, Hawa, oge me he ka hna degecâ anyik waina, at ame osenyinâ Khong me at, me he he ka hnyihnyikö hon ta je ûö?

¹⁴ Ke haba je ûö hia thithö adre me ha ka iwatetaföcö, ka habe, Aiö u, he ka musi ohmun.

¹⁵ Ke haingen iwatetaföcö ka je ûö, ka habe, Öbun e ne hû nya hnathu nya me me anyibun than, he thö jem me laba hnahic hmelen anyik dok ae hwaelu: ke ame ne ba, e so e he but meic ûnyi hnyi iwatetaföcö me thong degecâ je arasiny Lebanona.

¹⁶ Ke walang ang ame ne hnathu me wisa wale hnobun hna ânyâ, öbun e otilö Abimelek me than, ke ame ne so hnobun hna ânyâ kö Jerubaala me anyin lap, ke öbun e ne bi hwaban kâu helâ me anyin huliwa;

¹⁷ (anyin a vat cica hobi köbun, me ip anyin möt hnyi hnyimakan, me omeli öbun ûnyi hnyi hnyamen at Midiana:

¹⁸ ke hnyi bong ang öbun e tot ka lap anyi cica, me hia but hlingâ lakon a sevente hon veto a khaca, me otilö Abimelek, wale nokon ke momo a athnyabainy, me me thaniny at Sekema, anyin a liamekeiny e möbun;)

¹⁹ ke ame ne hnathu me wisa hnobun hna ânyâ kö Jerubaala me anyin lap hnyi bong ang, Awe, senyini Abimelek dö öbun, ke e ame he ka senyin köbun:

²⁰ ke ame ne ba, e so e me he but jem meic ûnyi ga Abimelek, mo an at Sekema, me ûnyi hnyi lap anyi Milo: e so e me he but meic ûnyi ge at Sekema me laba hnyi Milo, me on Abimelek.

²¹ Ke Jotham ame wadring dö me kec, me he Bere ai me laba eling, ame outö Abimelek a liamekeiny mē.

²² Ke ame than hon at Isaraela Abimelek hnyi kun ta huna.

²³ Ke haba Khong ame kunâ hanu ae kong kö Abimelek me at Sekema; ke haba at Sekema ödrin e iyawö Abimelek:

²⁴ me me hwâdâ thö hna okongoâ laku Jerubaala a sevente, ke ame takû Abimelek dren liamekeiny mödrin, at a hlingʼ ödrin, me at Sekema, hnyat ödrin e hadruâ he ka hlingâ je liamekeiny mē.

²⁵ Ke haba at Sekema ödrin e ip tavat he ka mokut iyâwâ hon je bucen, ke ödrin e hûgûnâ omjehen tavat adre me gethen unyidrin: ke adre me thumetu Abimelek.

²⁶ Ke ame o but Gaala nöku Ebed me je liamekeiny mē, me he Sekema ai: ke ame labageju kâu at Sekema.

²⁷ Ke ödrin e he ka hnyi ta hnyei, me tau wan haledrin je vine, me ututo je wan vine, me senyin, me didro ka hnyi uma umen khongudrin, me han, me ic, me hangö Abimelek.

²⁸ Ke Gaala nöku Ebed ame ha, ka habe, Ia Abimelek, ke ia Sekema, mʼ otin e he ka bi athnyabainy? Hawa, ca nöku Jerubaala? ke Zebul athnyabainy? e so öbun e bi athnyabainy hnyat Hamora, kamö Sekema: ke hnân eû otin e he ka bi athnyabainy at e.

²⁹ E na e ju unyik tavat eang! mʼ inye he ka hum Abimelek. Me e ame ha kö Abimelek, ha habe, Bi hanen ju ânyâm vat, me he thö jem.

³⁰ Ke haba Zebul tuhan taun ame long hofuc ho Gaala nöku Ebed, me ame ubâhlâ anyin hmonyin.

³¹ Me e ame kunâduöngâ je metâ kö Abimelek, ka habe, Wâ bi, a o but hnyi Sekema Gaala noku Ebed me je liamekeiny mē; ke wâ bi, ödrin e okongoâ taun gam.

³² Ke walang ang todrö hnyi lit, u me tavat unyâm, me mokut duöng hnyi ta hnyei;

³³ ke hnyi hnyomakatu e ka o thö seûno, me u me he ka vesâ, me utut ka hnyi taun: ke wâ bi, e ka he me lahien he ka tet metâ köu, me u me he ka ânyâ ködrin helâ me imaneniny köu.

³⁴ Me ame todrö hnyi lit Abimelek, me lahien hia, me mokut iyawö Sekema a ödrin je bunyen a vak.

³⁵ Ke ame didrut Gaala nöku Ebed me tot hnyi homagouleny taun; ke ame todrö Abimelek me tavat unyin ûnyi hnyi hna mokut.

³⁶ Ke haba Gaala ame wâ tavat, me e ame ha kö Zebul, ka habe, Wâ bi ame utut tavat ûheny hon je bucen. Ke haingö Zebul kâu, ka habe, Haba ûnyi u je wâ, me, hmenon je bucen helâ me tavat.

³⁷ Ke ame ha hmetu Gaala ka habe, Wâ bi, ame utut tavat ethö hnyi wanben hnyei, ke ame o ke bunyen hnyi gethen ame he ka hnyi iwajo anyi Meoneni.

³⁸ Me Zebul ame ha kâu, ka habe, Ewa hnyimâm wale at ame ha, ka habe, Ia Abimelek mʼ adre me he ka bi athnyabainy? hawa, ca wale hnyei u me hûkötiâ? ö u he thö walang ang me vat mödrin.

³⁹ Me ame he but Gaala hnyi hnyimakan at Sekema, me vat me Abimelek.

⁴⁰ Ke haba Abimelek ame hnu e me e ame kec gan, ke se hia a ta me āt ke ne o but hnyi homagöule.

⁴¹ Ke Abimelek ame laba hnyi Arama: ke haba Zebul ame obö Gaala me je liamekeiny mē, me ödrin e ca he ka laba hnyi Sekema.

⁴² Ke nyi ame he tavat ka hnyi hnyei; me adre me thumetu Abimeleke.

⁴³ Me e ame hom tavat me khenâ me me kun ta bunyen me khöu mokut hnyi hnyei; me wâ, ke wâ bi, ame be but tavat ûhedrin hnyi taun; me e ame utut ködrin, me kuc ödrin.

⁴⁴ Ke ame wâdring Abimelek, me je vat unyin, me tot hnyi homagouleny taun: ke haba ke li bunyen, ödrin e wâdring ködrin hia hnyi hnyei me kuc ödrin.

⁴⁵ Ke haba Abimelek ame vat me taun hnyi bong hia eling; ke e ame hûgûnâ taun, me hlingâ je aten: ke e ame kot taun, me ave ge sâlt.

⁴⁶ Ke a long ut tavat hia hnyi hnabâ hnyi Sekema, me ödrin e didro ka hnyi thop hnyi uma umen khong Berith.

⁴⁷ Me adre me thumetu Abimelek a gʼ ame ûkhacaköu tavat hia thithö aten hnabâ hnyi Sekema.

⁴⁸ Ke haba Abimelek me tavat hia thithö unyin, ödrin e ölö ka hnyi bucen Zalemon; ke haba Abimelek ame hom gö hnyi hnyamen, me subâ but ke vheiny ûö, me hom me ip hon bajibenyin: ke haingen ka tavat unyin, ka habe, Haba hnok hna ânyâ wale öbun e wâ, logotö me öbun a ânyâ helâng.

⁴⁹ Me ame ve sö but tavat hia je vheiny minya, me he hotu Abimelek, me ip hnyi thop, me thong thop hudrin; me ame mok tavat hia aten hnabâ hnyi Sekema minya, helâ me wan thauzan obaga me omomo.

⁵⁰ Haba Abimelek ame he Thebez ai, me ip vat cicö Thebez, me kot e.

⁵¹ Ke e hu hnabâ ae hwege hnyi wanben taun, me ame kec kâ e obaga me omomo, me tavat hia thithö hnyi taun, me hlöng hwanumö-drin, me olo ka hnyi hon hnabâ.

⁵² Ke ame o Abimelek ka hnyi hnabâ me vat mē, ke e ame hakekenyâ hwanumen hnabâ he ka thong e ge meic.

⁵³ Me haba ke momo ethö görany ame khûâ veto hnân omomono hwit ka hnyi hon bö Abimelek, me ame hmouca but ibokomokiny.

⁵⁴ Me e ame ie hongot ka hidröu at ame hom tilâ anyin je ûnyi vat, me ha kâu, ka habe, Oc ut ânyâm hele vat me hlingö nya, wâ adre ne haiö nya, ka habe, Haniny momo. Me ame dâ oâ e hnen hidröu me e ame mokcu.

⁵⁵ Ke a wâ but at Isaraela a ga mokcu Abimelek, me adre me vese ka hnyi je hnyabadra.

⁵⁶ Ke helâe Khong ame bi hwaban monu anyi Abimelek, waleji e ame ânyâ ka kamen, a hlingâ je liamekeiny mē a sevente:

⁵⁷ ke haba ta je hulö hia thithö anyin tavat Sekema, me, Khong ame bi hwaban ka hnyi je bödrin: me ame hwâdâ ködrin hnaûhango hnö Jo tha m nöku Jerubaala.