Owisa 10 - Iaai Bible 1901 (New Caledonia)

¹ KE hwabö Abimelek me ame o Tola nöku Pua, nöku Dodo, at Isakara, he ka omelö at Isaraela; ke e ame laba hnyi Samira hnyi hnyei ae hut hnyi Eferaima.

² Ke e ame owisa ka at Isaraela hnyi je huna a twente theri; ke e ame mokcu, me adre me konâm e hnyi Samira.

³ Ke hwaban e me ame o Jaira at Gileada, ke e ame owisa ka at Isaraela hnyi je huna a twente tu.

⁴ Ke e hu lakon baga a thöte, ödrin e tabâ je asina a thote, ke e hu gadrin je taun a thöte, ke adre me hwenyi iödrin Havoth-jaira ke ne o but hnyi bong ang, wale je taun hnyi hnyei Gileada.

⁵ Ke ame mokcu Jaira, me adre me konâm e hnyi Kamon.

⁶ Ke haba lakon Isaraela adre me ânyâ hmeto bi ûnyi ae kong hnyi hnyimakö Iehova, me bi athnyaba ka je Baala, me Aseira, me je khongon Suria, me je khongon Zidona, me je khongon Moaba, me je khongon laku Amona, me je khongon at Filisiti; ke adre me digic Iehova me ca bi athnyabainy.

⁷ Me ame ubâhlâ hmönyin anyi Iehova ka at Isaraela, me e ame ûcû ödrin ka hnyi hnyamen at Filisiti, me laku Amona.

⁸ Ke ödrin e ovecâ me seda lokon Isaraela hnyi huna eling: eitin ta je huna adre hom ûhnyûkongo lakon Isaraela hia wale hoton Joridano hnyi hnyei iny at Amora, hnyi Gileada.

⁹ Me ame he hanyâûâ Joridano laku Amona he ka vat minya me at Juda, me Beniamina, me lap anyi Eferaima; ke e hmak gan hmâ at Isaraela.

¹⁰ Haba lakon Isaraela ödrin e tenge kö Iehova, me ha, ka habe, Ohmun e hia but ânyâ hulö köu, wale ohmun e hna degecâ Khonguhmun, me bi athnyaba bi ka je Baala.

¹¹ Ke haba Iehova ame ha ka lakon Isaraela, ka habe, Hawa, oge ca omeli öbun ûnyi ge at Aigupito, me at Amora, me laku Amona, me at Filisiti!

¹² Ke haba at Zidona, me Amaleka, me Maon, ödrin e okongu öbun; me öbun e tenge könya, me oge me omeli öbun ûnyi hnyi je hnyamödrin.

¹³ Ke öbun e digic nya bi, me bi athnyaba ka je khong: anyin a wale oge me ca he hmetu ka omeli öbun.

¹⁴ He thʼ öbun ka tenge ka je khong öbun e ûca; hamödrin he ke omeli öbun hnyi ûen hna sedʼ öbun.

¹⁵ Haba lakon Isaraela ödrin e ha kö Iehova, ka habe, Ohmun e ânyâ hwakecin ae kong, hamâm he ka ânyâ hia kohmun ûnyi ae so köu; ke so bi ö u omeli ohmun thibi hnyi bong ang.

¹⁶ Me adre me degec je khong kanyua unyidrin, me bi athnyaba kö Iehova, ke e ame tenge ge vec anyin at Isaraela.

¹⁷ Ke ame ûkhacaköu laku Amona, me hunuma hnyi Gileada. Ke ame ûkhacaköu lakon Isaraela me hunuma hnyi Mizepa.

¹⁸ Haba tavat, a je thaniny Gileada, ödrin e ûhaköuâ, ka habe, Ie at ame he ka bân he ka vat me laku Amona! me e ame he ka taben at Gileada hia thithö.