Levitiko 6 - Iaai Bible 1901 (New Caledonia)

¹ KE Iehova ame ha kö Mose, ka habe,

² A ne ke at ame ânyâ monu, me hanyâûâ hnanyibu anyi Iehova, me iyawö ka at ame laba hakekenyâ ge ûnyi ame hna kâu he ha tuö, ame ne ge ûhihinyköu, ame ne ûnyi adre hûgûnâ, ame ne ovecâ ke at;

³ ame ne wâ ûnyi a hia anyin ke at, kʼ ame iyawâ hnyin, me khemanyin thoi; haba hnyi ta je ûnyi hia eling a ânyâ ke at, me mâdrâ hulö hnyin:

⁴ hawe, a ne monu, a be hia but ânyâ hulö, hamen he ka ham hmetu ûnyi e ame hûgûnâ, ame ne ke ûnyi e ame hom hnyi hnen hna ovecâ at, ame ne ûnyi adre hna kâu he ka tuö, ame ne ûnyi a hia, wale ame hlo,

⁵ ame ne ke ûnyi e ame khemanyin thoi hnyin; hawe, hamen be ka ham hmetu hia thithö, me bi hanen ke keihen a libenyitainy: hamen he ka ham ka at a anyin hnyi bong a manen hnyin.

⁶ Ke e ame he ka hom kö Iehova hudiny anyin bulö, a mamoe baga ae ba hnyikongon ûnyi hnyi hnahat mamoe, helâ me hnâm hna tuluto hnân hudiny monu a deny at bihut:

⁷ ke ame he at bihut ka bi hwaban anyin möt hnyi hnyimakö Iehova, ke adre me he ka hna e; wale hnyi ta je unyi hia e ame monu hnyin.

⁸ Ke Iehova ame ha kö Mose, ka habe,

⁹ Ha thö kö Arona me lakon, ka habe, Walang hnanyibuiny hudiny leû: wale hut adre le, ame he ka mokut hon hna hû meic, hnyi hnyinghet hia ke ne o but hnyomakatu; kʼ ame he ka möt meic hon taben hut.

¹⁰ Ke ame he at bihut he ka khavâ anyin ûkhaû lino, me khavâ unyin ge anyin ûtrauzes lino; ke e ame he ka aoc hnabadröu ta an hut adre le hon taben hut, ke e ame he ka ip e hnyi ke keihen taben hut.

¹¹ Ke e ame he ka uny anyin je ûkhaû, me khavâ ke je ûkhaû, me hom dröu ka hnyi hoton hnyaba ka hnyi dok ae so.

¹² Ke ame he ka labö möt meic hon taben hut, kʼ ame ca he ka mok; ke ame he at bihut he ka hû uto hon hnyi je hnyomakatu hia: ke e ame he ka ip gaga hon e hut adre le, me e ame he ka le hon e pipikhenyainy je hudiny ole.

¹³ Ame he bala ka möt meic hon taben hut; ame ca he ka mok.

¹⁴ Ke walang hnanyibuiny hudiny han: ame he laku Arona ka hudo e hnyi hnyimakö Iehova, cicö taben hut.

¹⁵ Ke e ame he ka okhaca aoc salawa a hudiny han, me wakacoiny, me libanu hia, hon hudiny, han, ke e ame he ka le e hon taben hut me me bo so, hnân oûnykûmiâ kö Iehova.

¹⁶ Ke haba kolon, ame he Arona me lakon he ka an: odrin e he ka han e, adre ca levenâ, hnyi ke dok ae kap; odrin e he ka han e hnyi haginy uma ûkhacaköu.

¹⁷ Adre me ca he ka le e adre levenâ. Oge hia but ham e hnân hwajekhöûdrin ûnyi hnyi je hut a an ge meic könya; e ti kap e, helâ me hudiny hulö, me hudiny monu.

¹⁸ Ame he lakon baga a laku Arona hia ka hnyi han e, wale ke hwajekhon nyiele balua hnyi anyibun ta je dö, ûnyi hnyi je hut a an ge meic kö Iehova: odrin e he ka kap hia tavat odrin e kâlâ.

¹⁹ Ke Iehova ame ha kö Mose, ka habe,

²⁰ Walang hut anyi Arona me je lakon odrin e he ka hudo kö Iehova hnyi bong adre me he ka hû e; khaca omer salawa hnân hudiny han nyiele balua, haf hnyi hnyomakatu, ke ke haf hnyi sahac.

²¹ Adre me he ka ânyâ e me wakaco hyni öt; at ka hia but le, me u me he ka odilâ: ke u me he ka hudo hudiny han hnân bo so kö Iehova wale je ong salawa.

²² Ke ame he ka hudo e hnen at bihut adre hû, a nokon wale at ame hwaban: haba hnanyibu nyiele balua ka habe, Adre me he ka tha le hia kö Iehova.

²³ Ke adre me he ka le avâ je hudiny han hia anyin at bihut: adre me ca he ka an e.

²⁴ Ke Iehova ame ha kö Mose, ka habe,

²⁵ Ha thö kö Arona me lakon, ka habe Walang hnanyibuiny hudiny hulö: haba dok adre me labö hlingâ je hudiny leû hnyin, me adre me he ka hlingâ minya hnyin hudiny hulö hnyi hnyimakö Iehova: wale ae ti kap.

²⁶ Haba at bihut, wale at a hudo e hnân hulö, ame he ka han e: adre me he ka an e hnyi dok ae kap hnyi haginy uma ûkhacaköu.

²⁷ Haba ûnyi ame kâlâ utiöiny me e kap e: ke ame ne ta thö dra hnyi ke ûkhaû, u ma he ka hneû dren eling hnyi ke dok ae kap.

²⁸ Ke adre me he ka thö degecâ kaia kânâ adre ölâ hnyin: ke adre ne ölâ e hnyi kaia a bras, adre me he ka kot e me hneû ge köiö.

²⁹ Ame he ka hnyi an e obaga hia hnyat bihut: wale ûnyi ae ti kap.

³⁰ Ke haba ta je hudiny hulö hia, wale adre odilâ dren ka hnyi uma ûkhacaköu, hnân bi hwaban möt hnyi dok ae kap, me, adre me ca he ka an e: adre me he ka le degecâ ge meic.