Levitiko 5 - Iaai Bible 1901 (New Caledonia)

¹ KE ame ne monu ke at a löng hnödra hna kunâ he ka khemanyin, ke e at ohnatho, a ne wâ, a ne khana, kʼ ame ne ca ha hofuc eling, me ame he ka takoû e anyin hulö:

² ke haba khaca, a ne he ke at ka kâlâ ûnyi ae bokong, ame ne unyin meno ae bokong a mokcu, ame ne meno a vak can ae bokong a mokcu, ame ne meno ame iyâû ae bokong a mokcu, ke ame ne ca manen kâu, me e ame he minya ka bokong, kʼ ame hulö but:

³ ke ame ne kâlâ bokonginy at, a ta je ûnyi hia ae ikiki ame obokongoâ, ke iyong e kâu; haba hnyi ûen a e khana e, me e at hulö:

⁴ ke ame ne he ke at ka ie khemanyin ge li esongodiny he ka ânyâ ûnyi ae kong, ame ne ûnyi ae so, haba ta je ûnyi hia e ame ie ha me khemanyin, ke iyong kâu, haba hnyi ûen ae khana me e at hulö hnyi ke ûnyi eling:

⁵ ke ame ne hulö but hnyi ke ûnyi eling, me e ame i he ka haimemenâ a ga hulö but hnyin e:

⁶ ke e ame he ka hom kö Iehova hudiny anyin hulö, can hulö e ame ânyâ, a meno momo ûnyi hnyi hnahat mamoe, ame ne nokon mamoe, ame ne got, hnân hudiny hulö; ke ame he at bihut ka bi hwaban anyin möt, anyin a e at hulö.

⁷ Ke ame ne ca khana he ka ham ke meno helâe can hulö e ame ânyâ, me hamen he ka hom hwaban kö Iehova, a lo li biny, ame ne li lakon meköta; hnân hudiny hulö khaca, ke hnân hudiny leû khaca.

⁸ Ke e ame he ka hom li meno eling ka at bihut, kʼ ame he ka bân ka hudo hudiny hulö, me ken degecâ ban, ke ca he ka subâ luâ:

⁹ ke e ame he ka dukâiâ ke keihen taben hut ge dra dren hudiny hulö; ke adre me he ka owa kolon dra hmelen taben hut: haba e me hudiny hulö.

¹⁰ Ke e ame he ka hudo at a loiny hnân hudiny leû hoton hnanyibu: ke ame he at bihut ka bi hwaban anyin möt ge monu e ame hia but ânyâ, kʼ adre me he ka hna e.

¹¹ Ke ame ne ca khana he ka hom li biny, ame ne li lakon meköta, me hamen at a ânyâ hulö he ka hom hnân anyin hut, khaca omer salawa hnân hudiny hulö; e ame ca he ka hû e ge wakaco, kʼ ame ca he ka ip libanu ka hnyi hon: anyin a e hudiny hulö.

¹² Ke e ame he ka hom ka at bihut, kʼ ame he at bihut ka okhaca aoc ge hnyamen hnân oûnykûmeâ, me le hon taben hut, helâ me je hut a an ge meic kö Iehova: haba e hudiny hulö.

¹³ Ke ame he at bihut ka bi hwaban anyin möt can hulö e ame ânyâ hnyi ta je ûnyi eling, kʼ adre me he ka hna e; ke hobi kâu at bihut kolon hnân hudiny han.

¹⁴ Ke Iehova ame ha kö Mose, ka habe,

¹⁵ A ne he ke at ka ânyâ monu, ke ca khana, hnyi ta je ûnyi ae kap ga Iehova; me e ame he ka hom kö Iehova hudiny hulö, a mamoe baga ae ba hnyikongon ûnyi hnyi hnahat mamoe, hoton hnâm hna tuluto kâu je sekel sileva, helâ me sekeliny dok kap, hnân hudiny hulö:

¹⁶ ke e ame he ka bi hwaban hulö e ame ânyâ hnyi ûnyi ae kap, ke e ame he ka bi hanen ka hnyin ke keihen a thabûnginy, me ham e ka at bihut: ke ame he at bihut ka bi hwaban; anyin möt, ge mamoe baga hudiny hulö, kʼ adre me he ka hna e.

¹⁷ Ke ame ne ke at ame ânyâ hulö me ânyâ ke je unyi hnyi ta je ûnyi a hûna hnö Iehova a gʼ adre me ca he ka ânyâ; kʼ ame ne ca khana e, me ame hulö but, kʼ ame he ka takoû e anyin hulö.

¹⁸ Ke e ame he ka hom ka at bihut mamoe baga ae ba hnyikongon ûnyi hnyi hnahat mamoe, helâ me hnâm hna tuluto kâu, hnân hudiny monu: ke ame he at bihut ka bi hwaban anyin möt, can anyin monu, ke ca khana bi kʼ adre me he ka hna e.

¹⁹ Wale hudiny monu: anyin ae hnathu e ame monu kö Iehova.