Juda 1 - Iaai Bible 1901 (New Caledonia)

¹ INYA Juda athnyabai Iesu Keriso, liamekeiny me Iakobo, oge me set ka tavat adre hawʼ ödra, me laoûnykûminy Khong a Kamen, tavat adre tuʼ ödra hobi kö Iesu Keriso:

² e so e si but unyibun ibetengiö baû, me ûsoköu, me ibetengiö.

³ Hnyat a oûnykûmik lö, oge me wek hmonyin he ka set köbun ge möt adre ham gânâ köta, kʼ ame ûjongi nya hnyekuk he ka set köbun me sihwegi öbun, mʼ öbun e he ka hwege ûsabû ûöhwege hobi kâu labageju, waleji adre tha ham ka tavat ae kap.

⁴ Anyin ame dit duöug keihen, a hnyat adre ip ehac hnân hobi kâu hnaûhango eang, hnyat adre me ca outen Khong, kʼ adre me wia ibetengiö baû anyin Khong ka hnyi hwakecin ae ikiki, kʼ adre me ivinöâ Tuhöta a khaca a Than Iesu Keriso.

⁵ Inya oge me wek he ka oûnykûmi öbun, ke so bi e khanʼ öbun wia but ehac, ka habe, haba Than ame omelö tavat ûnyi hnyi hnyei Aigupito, ke hwaban e, e ame ohia tavat adre me ca labageju.

⁶ Ke haba ta je angela waleji adre me ca tethmâ hnyi hanymödra ae gan hmâ, ke adre me hna degecâ hing hnyabadra, me e ame hia but cʼ ödra hnyi menekholom a nyiele balua ke ne o but bong owisa a bong ae gan.

⁷ Helâ me Sodoma me Gomora me je taun igigilo adre me tha hwakecidra me bi ûnyi monu, kʼ adre me hnu hoton ke je unyin bi, me adre me ip ödra hnân haten, kʼ adre me hângʼ ödra ka hnyi meic ame ca he bi ka mok.

⁸ Ke helâe minya tavat ang, adre me bwi me oikikiâ unyidra, kʼ adre hociâ tavat musi, kʼ adre haikongoâ wahmanenang.

⁹ Ke haba Mikaela angela ae nua ame ûöhwege me diabolo kʼ ame iwatretra ge unyi Mose, me ca hwege he ka haikongoâ e, ke e ame ha, ka habe, Hamen bi Than he ka thawo u.

¹⁰ Ke haba ödra ang, me adre me hiakongoâ ta je ûnyi ae ca khanʼ ödra: ke haba ta je ûnyi ae khanʼ ödra hoton unyin, helâ me ta je meno ae ba hnyekudra, me adre me hângʼ ödra hnyi ta je ûnyi e.

¹¹ E köiö gadra! anyin adre me vheno gethen de Kaina, me patrutrua ka hnyi monu anyi Balaama hnân hwaban, me mok hnyi ivinö anyi Kora.

¹² Haba ödra ta je okongon hnyi anyibun bijeûiny ibetengiö, ödra ka tha hnyi bijeû mʼ öbun, ödra tavat tuö mamoe adre ha ödra bi, me ca ot; ödra je ûlâ ae ba köien, ame oû ang dö; ödra je ûö ae ba wan hnyi ûen he ka wa, a olo mok, adre oc dö me iwân;

¹³ ödra je waköiöiny köiö ame khutu, a hûlûlû hangöc dö je ûnyi hnân ohmehmʼ ödra; ödra ta je okhû adre me he monu, ke adre hia but ip hobi ködra bi litiny menekholom ame ca ba balua.

¹⁴ Ke haba Enoka, waleji a seveniny hwân ga Adamu, ame perofeta minya ka tavat ang, ka habe, Wâ ju ame he ka o Than tha e me anyin wakap a je ten thauzan,

¹⁵ he ka bi hwaban ka tavat hia thithö, me he ka ohwâdâ ka tavat adre ca outen Khong, anyidra ta je huliwa ae ca ûcû ka Khong, waleji adre ânyâ me ca ot ka Khong, me ta je hofuc ae hwahwacit waleji a ha gan tavat ae kong adre me ca outen Khong.

¹⁶ Ödra tavat ulit, me tavat fuc, adre me he hoton ta je wedra ae kong (ke ame fufuc je hnyimödra) kʼ adre me ogânâ at me me hu troban bi kodra.

¹⁷ Ke haba öbun, laoûnykûmik lö, ûnykûme ju öbun je hofuc waleji ame ha ehac je aposetolo anyin Tuhöta Iesu Keriso;

¹⁸ adre ha köbun, ka habe, Ame he ka o hnyi ûen a biliny tavat ûhiö, adre me hnu hoton ta je wedra ae ca ûcû me Khong.

¹⁹ Ödra e tavat adre me okûâ imouköu, adre me hwen unyin, ke ca hu bi Hanu.

²⁰ Ke haba öbun, laoûnykûmik, up öbun dö goranyai hnyi anyibun labageju ae ti kap, me hic hnyi Hanu Kap,

²¹ ke tuʼ öbun ju hnyi ibetengiö anyin Khong, ke halubahingen ju öbun ibetengiö baû anyin Tuhöta Iesu Keriso, ke ne o but ka hnyi möt ame ca ba balua.

²² Ke betenge ju öbun ka keihen tavat adre me loloâ;

²³ ke omelö thö keihen, me lili ödra ju ûnyi hnyi meic; ke betenge ju ka keihen me ot, ke ikikiâ thö ûkhaû ame okongoâ hnen unyin.

²⁴ Ke so e unyin at ae khana he ka tuʼ öbun, wâ öbun nye ū but, me omanenʼ öbun ae ba hnyikongon hnyi hnyimakan anyin hmanenang me senyin ae gan,

²⁵ e so e unyin Khong a khaca, At a omeliʼ öta a deny Iesu Keriso a Tuhöta, hmanenang, me mec, me musi, me man, hwan adrem balua, me walang ang, me nyiele balua. Amen.