Josua 24 - Iaai Bible 1901 (New Caledonia)

¹ KE haba Josua ame ûkhacaköuâ je tribu Isaraela hia hnyi Sekema, me hawâ wahingatiny at Isaraela, me je ban, me je hnyat owisa, me je homakan gadra; me adre me o hnyi hnyimakan Khong.

² Ke Josua ame ha ka tavat hia thithö, ka habe, Walang hofuc ame ha Iehova, Khongon at Isaraela, ka habe, Haba kâû adrem ame laba lakamöbun hnyi hoton Wagewe, wale Tera kamö Aberahama, me kamö Nahora: kʼ ödrin e bi athnyabainy ke je khong.

³ Ke oge me hom kamöbun Aberahama ûnyi hnyi ke keihen Wagewe, me lelö e he ka vheno hnyei Kanana hia thithö, me osehia je mâtrâniny, me ham kâu Isaaka.

⁴ Ke oge me ham Jekob me Esau kö Isaaka; ke oge me ham bucen Seira kö Esau me me iny; ke Jekob ame he me lakon Aigupito ai.

⁵ Ke oge me kunö Mose me Arona, me oge me kot Aigupito, helâji me hnok hna ânyâ unyidra: ke hwaban e me oge me hum öbun bi.

⁶ Ke oge me hom lakamöbun ûheny Aigupito: me öbun e o ka hnyi köiö: ke haba at Aigupito adre me hnu lakamöbun me je kariota me tavat tabö hors ke ne o but ka hnyi Köiö ae Dra.

⁷ Ke adre me tenge kö Iehova, me e ame ip menekholom wanböbun me at Aigupito, me okhuto hudrin köiö me hûlûlû ödra; ke a wâ but je emaköbun ûnyi oge me ânyâ hnyi Aigupito: ke öbun e laba hnyi hnyebuba hnyi je bong ae se.

⁸ Me oge me hum öbun ka hnyi hnyei iny at Amora, tavat adre me laba hoton Joridano; ke ödrin e vat möbun; me oge me hnʼ ödrin ka hnyi hnyamöbun, me öbun e hom idrin hnyei; ke oge me ohiʼ ödrin hnyi hnyimaköbun.

⁹ Ke ame todrö Balaka nöku Zipora, than Moaba, me vat me Isaraela; me e ame ûkhûnöng he ka hum Balaama nöku Beora he ka hângʼ öbun:

¹⁰ ke haba inya oge me höcö he ka ling Balaama; anyin a wale e ame ha hnahici öbun bi; me oge me omeli öbun unyi hnyi hnyamen.

¹¹ Ke öbun e he hanyâûâ Joridano, me o hnyi Jeriko: ke ame vat möbun at Jeriko, me at Amora, me Perizi, me Kanana, me Heth, me Girigasa, me Hivi, me Jebusi; ke oge me hnʼ ödrin ka hnyi hny amöbun.

¹² Ke oge me kunâ bânâ je wahankânâ, me ame obʼ ödrin hnyi hnyimaköbun, wale li than Amora; ca hnen ânyâm hele vat, me ânyâm fana.

¹³ Ke oge ham köbun ke hnyei a öbun e ca huliwan, me je taun a öbun e ca otilâ, me öbun e labā; öbun e han ûnyi hnyi je hnyei vine, me je hnyei elaio a öbun e ca belökâ.

¹⁴ Ke walang any ot ju kö Iehova, me bi athnyabainy ge hnyok me hnathu minya: ke degec ut je khong wale a athnyabainy lakamöbun hoton Wagewe me e Aigupito; ke bi athnyabai Iehova.

¹⁵ Ke ame ne kong köbun he ka bi athnyabai Iehova, ûca thʼ öbun hnyi bong ang at öbun e he ka bi athnyabainy; ame ne je khong waleji a bi athnyabainy lakamöbun hoton Wagawe, ame ne je khong khongon at Amora, hnyi hnyei öbun e labā: ke haba inya me anyik lap, ohmun e he ka bi athnyabai Iehova.

¹⁶ Ke haba tavat ödrin e thu me ha, ka habe. Ohmun na ca he ka hna degeci Iehova me bi athnyabainy ke je khong;

¹⁷ anyin a Iehova Khongutin wale at ame hum otin me lakamötin ûnyi hnyi hnyei Aigupito, ûnyi hnyi hnyaba ae ûthaluo, me ânyâ je haten ae gan hnyi hnyimaköta, me tuʼ öta eû hnyi gethen hia waleji otin e vheno, wanben tavat waleji otin e he wanbödrin:

¹⁸ ke Iehova ame obâ tavat hia thithö hnyi hnyimakötin, wale at Amora tavat adre me labā hnyei: anyin a wale ohmun e he minya ka bi athnyabai Iehova; anyin a e Khongutin.

¹⁹ Ke Josua ame ha ka tavat, ka habe, E ca khanʼ öbun he ka bi athnyabai Iehova; anyin a e Khong ae kap; me Khong ame ciâ; e ame ca he ka hna anyibun hulö me anyibun je monu.

²⁰ Ke öbun ka he ka hna degeci Iehova, me bi athnyahabainy je khong kanyua, awe, e ame he ka hwio me okongu öbun, me ohi öban, hwaban ta je ûnyi ae so e ame ânyâ köbun.

²¹ Me ame ha tavat kö Josua, ka habe, Ohe, öhmun e he bi ka bi athnyabai Iehova.

²² Ke Josua ame ha ka tavat, ka habe, Öbun tavat ohnathu öbun bi, a öbun e ûco Iehova hobi köbun he ka bi athnyabainy. Me haingödra, ka habe, Öhmun tavat ohnatho.

²³ Anyin a wale he thʼ öbun walang ang ka hna degecâ but je kong kanyua uny Ibun, me hna je hnyekubun kö Iehova, Khongu Isaraela.

²⁴ Me ame ha tavat kö Josua, ka habe, Öhmun e he ka bi athnyabai Iehova Khonguta, me long hwan hofuc

²⁵ Me haba Josua ame ûhihinyköu me tavat hnyi bong eling, me otilâ hobi ködra hnanyibu me hna owisa hnyi Sekema.

²⁶ Ke Josua ame sihnalimen ta je hofuc ang hnyi tusiny hnanyibu anyin Khong; ke e ame hom ke veto ae gan me otilâ eû hmelen iwajo hnyi baten dok ae kap anyi Iehova.

²⁷ Ke Josua ame ha ka tavat hia thithö, ka habe, Wâ bi, haba veto aug, me, hnân ohnatho köta, anyin a e at ame long hia je hofuc a ha köta Iehova: anyin a wale hnân ohnatho köbun, wâ öbun nye he ka ivinoâ Khongubun.

²⁸ Me haba Josua ame kunâ tavat hia ka hnyi je jekhöûdra.

²⁹ Ke hwaban ta je ûnyi e, me ame mokcu Josua, nöku Nuna, athnyabai Iehova, ke wan haded ke ten je hunainy.

³⁰ Me adre me konâm e hnyi iny hnyei, wale Timena-sera, hnyi hnyei ae but hnyi Eferaima, hnyi bucen Gasa ka hnyi hwadrö.

³¹ Ke haba at Isaraela adre me bi athnyabai Iehova hnyi je bong hia bongu Josua, me je bong bongon wahingat a ûtangköu me Josua, hnyat adre hnyi wâ je huliwa hia anyi Iehova hobi kâu at Isaraela.

³² Ke haba je jeiö Josefa waleji a hom lakon Isaraela ûheny Aigupito adre me konâm hnyi Sekema, hnyi utkânâ a ûco Jekob ûnyi ge laku Hamora kamö Sekema hwaban je mone a khaca haded: ke wale hwajekhon laku Josefa.

³³ Ke ame mokcu Eleazara, nöku Arona, me ödrin e konâm e hnyi dok ae hut ga Fineasa a nokon, wale adre ham kâu hnyi hnyei ae hut hnyi Eferaima.