Josua 17 - Iaai Bible 1901 (New Caledonia)

¹ KE walang jekhon tribu anyi Manase; anyin a e nöku Josefa a bân. Hobi kö Makir nöku Manase a bân, kamö Gileada, anyin a e at vat, me adre me ham me iny Gileada me Basana.

² Ke haba jekhon eling hobi kâu ke keihen laku Manase hoton anyidrin je lap; hobi kâu laku Ahiezera, me laku Heleka, me laku Aseriela, me laku Sekema, me laku Hefera, me laku Semida: wale je baga noku Manase nöku Josefa hoton anyidrin je lap.

³ Ke haba Zelofeada nöku Hefera, nöku Gileada, nöku Makir, nöku Manase, me ba nokon baga, ke so bi a je hlu: ke walang ien lakon je hlu, Mala, me Noa, me Hogela, me Mileka, me Tireza.

⁴ Me ödrin e he kö Eleazara at bihut, me Josua nöku Nuna, me je than, me ha ka habe, Iehova ame hûna kö Mose he ka haʼ ihmun unyin je liamekeiny möhmun: anyin a wale e ame haʼ idrin unyin je liamekeiny me kamödrin, helâ me hna ha hnö Iehova.

⁵ Ke adre khenâ kö Manase libenyita je ke keihen, ke ca ha bi hnyei Gileada me Basana, wale hoton Joridano;

⁶ anyin ae hu iny je hlu laku Manase unyin lakon je baga: ke haba ke je laku Manase, ödrin e hu hnyei Gileada.

⁷ Ke haba hnyigöulö Manase, me, hwân Asera ke ne o but Mikematha cicö Sekema; ke ame he bala hnyigöulen hnyi ke keihen metâ ke ne o but unyin tavat adre me laba Eni-tapua.

⁸ Ke i Manase hnyei Tapua: ke haba Tapua hnyi hnyigöulö Manase, me wale iny laku Eferaima.

⁹ Ke ame he hnyigöulen ka hnyi wagewe Kânâ hnyi hwaiöuiny wagewe: haba je taun eling anyi Eferaima, e hnyi wanben je taun anyi Manase: ke haba hnyigöulö Manase hnyi ke keihen hwadröiny wagewe, ke ame umo e hnyi köiö:

¹⁰ ke i Manase ka hnyi hwaiöu, ke i Eferaima ka hnyi hwadrö, ke haba hnyigöulen, me, köiö; kʼ ame he ke ne o but Asera hnyi hwadrö, me Isakara e deiö.

¹¹ Ke e hu ga Manase hnyi Isakara me Asera, Betheseana me je tauniny, me Ibeleama me je tauniny, me aten Dora me je tauniny, me aten En-dora me je tauniny, me aten Tanaka me je tauniny, me aten Megido me je tauniny, wale je dok ae hut.

¹² Ke ca khana bi laku Manase he ka obâ aten je taun eling; anyin ame belaba at Kanana hnyi hnyei eling.

¹³ Ke hnyi ûen ame hwege but lakon Isaraela me ödrin e kunâ at Kanana he ka huliwa hnyi je hna khenâ huliwa, kʼ adre ca ti obʼ ödrin.

¹⁴ Ke haba laku Josefa ödrin eha kö Josua, ka habe, Ieû gam u je ham könya jekhöû a khaca, me ke keihen a khaca, anyin â haba inya, me, hnyei ae gan, ke Iehova ame hia but ohnahici nya hwân ehac ke ne o but hnyi bong ang?

¹⁵ Ke Josua ame ha ködrin, ka habe, U je ne hnyei ae gan, me e so u ma he ka hnyi hnyot me khutu eling hobi i köu bi hnyi hnyei iny at Perizi me tavat ae beû; anyin ae hnek köu bucen Eferaima.

¹⁶ Me ame ha je laku Josefa, ka habe, E ca ûcû kohmun bucen: ke haba at Kanana adre me laba hnyi hnyigöulen bucen me ödrin e tren je kariota fao, wale tavat hnyi Bethe-seama me je tauniny, me tavat minya hnyi hnyigöulen bucen e Jezerela.

¹⁷ Ke Josua ame ha ka lap anyi Josefa, jia Eferaima, me Manase, ka habe, U hnyei ae gan me tren man ae gan: ke u me ca he ka jekhom a khaca thibi;

¹⁸ kʼ ame he ka em hnyei bi bucen; kʼ ame ne hnyot, me u ma he ka khutu, ke hobi köu bi obiny: anyin a u me he ka obâ at Kanana, eja ke ne a ne hu je kariota fao, ke eja ke ne ödrin e hwege.