Jobu 8 - Iaai Bible 1901 (New Caledonia)

¹ KE haba Biledad at Sua ame thu me ha, ka habe,

² Ke ne o but kehö u me he ka ha je hofuc ang? Ke ne o but kehö ame he hwâm je hofuc ka helâ me ang ae hwege?

³ Hawa, ame he Khong ka onua hna owisa? Ke ame he Ataekhanahia ka önua wisâ?

⁴ A ne hia but ânyâ monu kâu hnen lakom, Me e ame hia but hnʼ ödrin ka hnyi hnyamen anyidrin hulo:

⁵ U je ne he ka elâm wia ka Khong, Ke khöû ka Ataekhanahia;

⁶ Ke u me ne at ae ba hnyikongon me wisa whakecâm; Awe e ame he ka hmâkâ walang ang hobi köu, Me ham sot ka hnyi umen hwakecâm ae wisa.

⁷ Eja ke ne a ne ûhnyûkong hnâm hna hwân ehac, Ame he ka he bi ka ti se hia obiny köu.

⁸ Ö u hnö thö ge dö a bân, Ke wâ wia ta je ûnyi waleji hnen lakamödrin hna elâm bongon:

⁹ (Anyin a otin je hnyat et thibi, me tavat ae ca khana, Anyin a bongutin ta je bong eang hmeledrany helâ me hmenon:)

¹⁰ Hawa, ödrin e ca he ka nö u, me thu köu, Me ha je hofuc ûnyi eû hnyi je hnyekudrin?

¹¹ Hawa, ame he ka kû hage he ba hmudra? Ke ame be ka kû amun, ke ba köiö?

¹² E ka tiga hât, kʼ adre tiga ca subâ bi, Me ame he ka bân ka meleca, ke biliny bi ta je hnyot hia.

¹³ Helâe minya je gethen deny tavat hia adre me hnying Khong; Kʼ ame he ka hia hna gejon ge at ame ca outen bi Khong:

¹⁴ Adre me he ka subâ degecâ hnen hna gejon, Kʼ ame helâke umen wahaihna hnen hna labageju.

¹⁵ E ame he ka ci ka hnyi umen uma, kʼ ame ca be bi ka tot: Kʼ ame he ka kât hmâ e, kʼ ame ca he ka tethmâ.

¹⁶ E hât, ke tiga ca o bi seûno, Kʼ ame he ka iyâû je vheiny hon hnen hna belökâ.

¹⁷ A dit ut je wân hnyin hna digic thatûnyi, E ame wâ dok ae hu veto hnyin.

¹⁸ Adre me ne ohia e ûnyi hnyi hnen, Me e ame be ka ivinoâ e, ka habe, Oge me ca ō u.

¹⁹ Wâ bi, wale senyin hnyi deny gethen, Kʼ ame be bi keihen ka kû ûnyi eû hnyi kânâ.

²⁰ Wâ bi, ame ca he Khong ka hota degecâ at ae wisa, Kʼ ame ca he ka otethmâ tavat adre me ânyâ hulo.

²¹ E ame he bi ka ounöngötâ hnyimâm ge hluma, Ke li esongodâm ge hongot senyin.

²² Adre me khavâ ge hmehma tavat adre me hûkötiö u; Kʼ ame he ka hia but uma mano umen tavat ae kong.