Jobu 40 - Iaai Bible 1901 (New Caledonia)

¹ KE Iehova ame thu bala kö Jobu me ha, ka habe,

² Ame he at ae hwege hnyimen ka ivinö me Ataekhanahia? Haba at ame ivinö me Khong, me so e ame thu.

³ Me haba Jobu ame thu kö Iehova, me ha, ka habe,

⁴ Wâ bi, iny thatûnyi: ieû oge me he ka thu köu? Oge me kât hnyimök.

⁵ Iny okhaca but fuc ehac, ke oge me ca he ka thu; Ke olo, me oge me ca he ka bi hanen.

⁶ Haba Iehova ame thu kö Jobu ûnyi hnyi weneû, me ha, ka habe,

⁷ Hûkâlâ ju wen hnyekom walang ang me bi baga: Me oge me he ka hnei u, mʼ u ma omanenâ könya.

⁸ Hawa, u me he ka oûnyibaûâ hnok hna owisa? U me he ka haikongu nya, mʼ u me wisa bi?

⁹ E hu gam hnyam helâ me Khong? Ke e khanö u he ka bi hwan than helâ me hwan hofuc?

¹⁰ Bethe theibi u thö ge beönua me oganâ; Ke khaûö u ju ge hmanenang me hwakecin than.

¹¹ Hingâlâ but je bahihingölöiny ânyâm hmonyin: Bwele ju ka wâ tavat ae bi gan hia, me hom ûhnyûkongo ju.

¹² O ʼdra ju tavat bi gan hia, me ohnyikânâ ju; Me uto ju tavat ae kong hnyi je hnödra.

¹³ Tha ikhölʼ Ödra ju eû hnyi kânâ; Ca ju je hnyimakodra hnyi dok ae iyong.

¹⁴ Me oge me he ka ogâ gam A ae khana hnyamâm a metâm he ka omeli u bi,

¹⁵ Wâ bi walang behemoth, waleji hnok hna op möu; E ame han önying helâ me bolok.

¹⁶ Wâ bi, e tang hwegien hnyi li jebalainon, Me maniny man hnyi je toiny hnyekon.

¹⁷ E ame bwebwelâ obiny helâ me arasi: Adre oûdilâköuâ je toiny li jevan.

¹⁸ Helâ me bras ae moku je jeien; Ke ûcû me je venyâ fao je vhaken.

¹⁹ E beönua hnyi ta je ûnyi a ânyâ Khong: E khana thibi at a op e he ka hakekenyâ kâu hele vat.

²⁰ E hnathu ame okûâ an jeû hnen je bucen; Ame walak eling ta je menoiny hnyot hia.

²¹ E ame mokut hmelen je ûö ae hlau, Me sa hlowe, me hnyei ae lup.

²² Ame tube e hnen hmenon je ûö ae hlau; Je garabainy di ame tot igigilo e.

²³ Wâ bi, e ka he wagewe ka bahihingölö, e ame ca öbubuny bi: E hwege hnyekon e ka di Joridano ke ne o but hnyi hnyimen.

²⁴ Ia noc e kʼ ame bwele thibi, Me koû hnyingöiny ge fao?