Jobu 38 - Iaai Bible 1901 (New Caledonia)

¹ KE haba Iehova ame thu kö Jobu ûnyi hnyi weneû, kʼ ame ha, ka habe,

² Ia olidrâ ûhnenamö Ge ta je hofuc ae ba wâhmakhmeto hnyin?

³ Hûkâlâ ju walang ang wen hnyekom me bi baga ju; Anyin a oge me he ka hnei u, ke u ma omanenâ könya.

⁴ U uaji hnyi ûen oge me ip taben hmeledrany? U je ne wâhmakhmetoâ, awe ha thö.

⁵ Ia tuluto e, ame ne manen köu? Ke ia lau tö hon e?

⁶ Adre me ohmâ je taben hon ieû? Ke ia ip veto hnân bahebetiny;

⁷ Hnyi ûen ame tha khumöng je okhû lany, Kʼ ame hongot senyin lakon Khong hia?

⁸ Ke ia hlöng hwanumen köiö ae gan, Hnyi ûen e ame patrutrua helâke ûheny eû hnyi hnyok;

⁹ Waleji hnyi hnok hna wia ûlâ hnân ûkhaûen bi, Ke menekholom hnân hlanyin,

¹⁰ Me kû hnyigöulen e, Me ip je venyâ me je hlinginy,

¹¹ Me ha, ka habe, Walang dok u ma o kâu, ke ca hanyâûâ bi; Ke wale bi ang adre me he ka thawâ ânyâm waköiö ae hmanenang?

¹² Hawa, u je hia but muso hnyomakatu hwân hnyi hna hnöku u, Me kû hnen ka haolany;

¹³ Me me he ka kât je can hmeledrany, Me jijingâ degecâ ûnyi hnyin e tavat ae kong?

¹⁴ Adre wia e helâ me kânâ ae kece adre bi haten hnyin; Me ame manen dut ta je ûnyi helâ me ûkhaû:

¹⁵ Me ame hia but ge tavat ae kong melamidra, Ke ame hmetru thö benyin ae bi gan.

¹⁶ Hawa, u je mwi eû hnyin je pupuainy köiö ae gan? Me vheno je dok ae lau ae owa?

¹⁷ Hawa, adre omanenâ köu je homagöuleny mok? Ke u je hia but wâ je homagouleny hmenon mok?

¹⁸ U je wâhmakhmetoâ but ûlauen hmeledrany? Ha thö, ame ne khanö u hia eling.

¹⁹ Ewa gethen ka hnyi hnyaban melam, Ke haba menekholom, me ewa hnen;

²⁰ Me u me he ka hom e ka hnyi hnyigöulen e, Me wâhmakhmeto je gethen ka hnyi umen uma?

²¹ Hawa, adre bödra ka hnöku u, me me khanö u e, Ke se hia hmonyin bongom je bong?

²² U je mwi bi hnyi uma omjehen kiona, Me wâ je omjehen we ae wahma,

²³ Waleji hnok hna ip hobi kâu ûen vec, Me bong bongon ûkuc me vat?

²⁴ Adre ma kâmâu ka khenâ lany, Me oveseâ ang hwei hon hmeledrany?

²⁵ Ia hiny thop hobi kâu je di, Me bi deny hucuce me hwan than;

²⁶ Me me he ka ta we ka hnyi kânâ dok ae ba aten; Me hnyebuba wale ae ba at hnyin;

²⁷ Me me he ka habelen kânâ ae ûnyi baû me hnyei baga; Me okûâ hnaonying ae moumou?

²⁸ E hu kamen we? Ke ia hnokoâ je dân hau?

²⁹ Ame o but ûheny eû hnyi hnyeku ia köiö ae wahma? Ke ia op dân hauiny drany ae wahma?

³⁰ Adre ohia köiö helâ me hnen veto, Ke ame wahma thö hon köiö ae dit.

³¹ Hawa, e khanö u he ka ûhûkâlaköuâ je nyingen Kukuûnyi, Me thang je wen Oriona?

³² E khanö u he ka hom je Mazarothe hnyi ûen e? Ke khanö u he ka tha lili Uresa me anyin bunyen?

³³ E khanö u but je hnanyibuiny drany? Ke khanö u he ka otilâ musiny e hon hmeledrany?

³⁴ E khanö u he ka ogöranyâ hwâm ka hnyi je ûlâ, Me me o we ae gan he ka tubi u?

³⁵ E khanö u he ka kunâ je hucuce me me hia but, Me thu köu, ka habe, Walöhmun ang?

³⁶ Ia ip metâ eû hnyi hnyekon at? Ke ia ham hna ûnykûme ka hnyi oûnykumânen at?

³⁷ E khanö ia he ka aû je ûlâ ge metâ? Ke khanö ia he ka hingâlâ je kaiainy drany,

³⁸ Me me hmudra but sesâiny kânâ, Kʼ ame ûkeceköu kânâ?

³⁹ Hawa, u me he ka hnu meno me me an liona? Me osekunâ je nak liona,

⁴⁰ Adre me laba iyâû hnyi je op, Kʼ adre me laba hnyi dok ae nedrong, he ka mokut duöng?

⁴¹ Ia penapena jeû hobi kâu oreba, E ka tenge lakon ka Khong, Me gâ monu ae ba an?