Jobu 31 - Iaai Bible 1901 (New Caledonia)

¹ OGE me ûhihinyköu me li emakök; Me oge ma kâmâu ka wâ hmâ hlu?

² Anyin a ieû jekhoû ûnyi ge Khong ethö, Me hwajeköû ûnyi ge Ataekhanahia ethö?

³ Hawa, ca hloûhloû bi hobi kâu at ae kong. Ke hnaûhango hobi kâu tavat adre me ânyâ hulö?

⁴ Hawa, e ame ca wâ dek je gethen, Me aû hia hnok hna okca?

⁵ Oge ne hia but tha he me ûnyi baû, Ke logot li cak ka hnyi iyawö;

⁶ (Ke so adre me tuluti nya hnyi tulut ae wisa, Me me he Khong ka wâ hwakecik ae hnathu;)

⁷ Ame ne hia but saû li cak ûnyi hnyi gethen, Kʼ ame ne hnu hoton li emakök hnen hnyekuk, Kʼ ame ne kece ong hnyikongon ka hnyi li hnyamok:

⁸ Awe, e so oge me belök, kʼ ame he ke at ka han troban; Eke, e so adre me he ka oc degecâ hanen ik.

⁹ A ne hia but iyawâ hnyekuk hnen ke momo, Ke oge ne hia but tuö hnyi hwanumen ke at:

¹⁰ Awe, e so ame he öiök ka oamemâ hobi kâu ke at, Me ame he keihen ka nom ju ka hnyi hon.

¹¹ Anyin a hulö e ae gan hmâ hmonyin; E ke, monu ae ûcû ka tavat owisa he ka bi hwaban:

¹² Anyin a e bi meic ame han ke ne o but Hnaûhango, Me ame he ka oc degecâ hia hanen ik.

¹³ Oge ne hia but hûkotiâ hofuc hmak anyin athnyabaik baga me momo, Hnyi ûen ödrin e ivino mönya:

¹⁴ Ieû oge me he ka ânyâ e ka he Khong ka tot? E ka he ka senâ, ieû oge me he ka thu kâu?

¹⁵ Hawa, ame ca op e, waleji hnen at ame up nya eû hnyi hnyok? Khaca thibi at a up ohmu eû hnyi hnyok?

¹⁶ Oge ne hia but behânâ weny at ae the duoc, Me ohmakâ li emakan safac;

¹⁷ Me hake han, Me ca tha han mönya je nakahme;

¹⁸ (Ohe, oge me hat e hwân kʼ iny tiga wanakat, helâke me hnen kamen, Ke oge tuö safac hwân hnyi hna hmöku nya;)

¹⁹ Oge ne hia but wâ at ame he ka mok anyin ae ba ûkhaû, Me at ae theduoc anyin ae ba hnân khavâ e;

²⁰ Ame ne ca hia but haisoi nya hnen li jebalainon, Ke adre ne ca omageâ e ge leûnen halek mamoe;

²¹ Oge ne hia but hai hnyamok ka na kahme, Hnyi ûen oge wâ hiök hnyi homagöule:

²² Awe, e so he ka kolu but benyik ûnyi hnyi bajebenyik Me thu benyik ke ne o but hnyi jeien.

²³ Haba hlöûhiöû ûnyi ge Khong waleji hnân öbubuny könya, Ke ca khanö nya he ka ânyâ ke ûnyi ge ibeönuainy.

²⁴ Oge ne labegejon gol, Me ha ka gol, ka habe, U hnok hna ge ju kâu;

²⁵ Oge ne senyin can ae gan hmâ tang omjehek, Ke can oge hia but hom gânâ ge li hnyamok;

²⁶ Oge ne wâ seûno hnyi ûen e ame manen, Me tehi ame he hnyi melaminy;

²⁷ Kʼ adre omono duöngâ hnyekuk, Kʼ ame ne ûcimhnyimak me hnyamok:

²⁸ Me wale minya ka monu hnân bi hwa ban ge tavat owisa: Ke waleling thoi hnyi hnyimakan Khong ethö.

²⁹ Oge ne hia but senyinâ hna ohia at ame ikiki nya, Me hobâ, hnyi ûen hulö ame wâ e;

³⁰ (Eke, oge me ca hna hnyimök he ka monu, Waleji he ka sumâtâ anyin möt me hofuc ûhangö;)

³¹ A ne ca ha tavat adre me tha laba mönya, ka habe, Ewa at ae khana he ka wâ at a ca hnyi sekon unyin?

³² Haba atkanyua ame ca mokut hnyi gethen; Ke oge me khong je hwanumök ka at ame he;

³³ Oge ne ikhâlâ hnok je hna hanyâûâ helâji me Adamu, Ke oiyongâ anyik monu hnyi ûlaik;

³⁴ Anyin a iny outen tavat ae se hia, Kʼ ame ne outhmoki nya hnen hûkötiö nya ge je lap, Mʼ oge me laba hnyibû, me ca he bi kâû—

³⁵ E na he ju ke at ka ling nya! (Wâ bi, walang hatök, e so ame he Ataekhanahia ka thu könya;) E na hu gak hna sihnalimen hnen at ame iwahnaihmiony mönya!

³⁶ Me oge me he bi nya ka vadren e hon bajebenyik; Me obicâ nya kâu, e me anyik korona.

³⁷ Ke oge me he ka aû kâu ûseiny hnok hna okca; Oge me he ka ûhakekenyâ helâke iny than.

³⁸ Ame ne he ik hnyei ka kuku gak, Kʼ ame ne tha tenge je hna belökâ e;

³⁹ Oge ne hia but an wan e, me ca bi hwaban, Ke kunâ tavat a idra hnyei he ka mok:

⁴⁰ Awe, e so he ka kû iwadekong hwaban hwit, Me je watetaföcö hwaban bali. A um dö je hofuc ho Jobu.