Jobu 18 - Iaai Bible 1901 (New Caledonia)

¹ KE haba Biledad at Sua ame thu me ha, ka habe,

² Ke ne o but kehö Öbun e he ka laba ip je hnewe hnân hofuc? Mö ûnykûme ju, ke hwaban e ohmun e he ka fuc.

³ Anyin a ieû adre me tha öû ohmun me je meno, Ke ohmun kong bi hnyi hnyimaköbun?

⁴ Hawa, at lö, u je kiö u hnyi ânyâm hmonyin, Adre me he ka hna but hmeledrany hnân hobi köu? Me oc dö kic ûnyi hnyi hnen?

⁵ Eke, adre me he ka ume melaminy tavat ae kong, Kʼ ame ca he ka melam bâhlân hlogon meic.

⁶ Ame he lany ka lit bi hnyi umen uma mano, Kʼ adre me he ka omoko anyin lamepa ethö hon.

⁷ Ame he ka ûhnyûkong hnen je hna okca ae hwege, Kʼ ame he ka hagutâ e ge ûnykûmânen bi.

⁸ Haba li can ame hom e me me hnok hnyi ert, Ke e ame uto hnewe.

⁹ Adre me he ka noc ohmâiny can, Kʼ ame he ofific ka det hmâ e.

¹⁰ Adre me ikhâlâ hnewe eû hnyi kânâ hobi kâu, Ke eû hnyi gethen e hu hnewe hobi kâu e.

¹¹ E ame he ka gâon ge ta je ûnyi hnân outen igigilö, Kʼ ame he ka wadring hoton li ohmâiny can.

¹² Ame he mekihnânem ka oloû tang hwegien, Ke haba ûkonguny ame laba penapena hobi kâu e ka tot.

¹³ Kʼ ame he ka an je ong outhunyin, Ame he ka an je ong outhunyin hia ge watöiny mok.

¹⁴ Adre me he ka oc e me iwân ûnyi hnyi umen uma mano, waleji e ame labageju kâu; Ke adre me he ka hom e ka tuhan ta je ûnyi hnân outen.

¹⁵ Ame he ka labâ umen uma mano me me ca he ka umen hmetu: Kʼ adre me he ka jijingâ teio ka hnyi hon hnyaban.

¹⁶ Ame he ka meleca anyin je iwân eû, Kʼ adre me he ka subâ degecâ je vheiny ethö.

¹⁷ Adre me ca he hmetu ka ûnykûme kâu eang hmelen, Ke ba hmetu ien bi eû hnyi gethen.

¹⁸ Adre me he ka kunâ e ûnyi hnyi lany ka hnyi menekholom, Me hnu e ûheny ang hmeledrany.

¹⁹ E ame ca he ka hu nokon me obiny unyin iny hnyei, Ke ame he ka ba wan hnyi dok e ame laba hnyin.

²⁰ Ame he tavat adre me o hwaban ka uthmâhmâ ge bongon bong, Ke haba dö a bân ödrin e ti ot.

²¹ Wale bongon je hnyaban at ae kong, Ke wale hnen at ae ca khana Khong.