Jobu 17 - Iaai Bible 1901 (New Caledonia)

¹ AME aû but hanuk, ame um dö bonguk je bong. Ame laba penapena erkemok hobi könya.

² E hnathu, e unyik tavat hluma at, Kʼ ame laba bala emakök hnyi anyidrin iwatretra.

³ Ip ju haten walang ang, u ma he bi ka ha hnathu nya; Ie at ame he ka ûkhöûhnyam mönya?

⁴ Anyin a u je okhötâ je hnyekudra he ka ca wâhmakhmeto: Anyin a wale u me ca he ka ogöranyi ödrin;

⁵ Haba at ame hâiâ je lahanen mʼadre me sei ödrin, Me ame he ka hanenak je li emakan je lakon.

⁶ E ame wiö nya hnân taben hluma ka tavat; Ke inya ang at ae ikiki hnyi hnyi-maködrin.

⁷ E hâe but emakök ge vec, Ke haba je outhunyik hia me helâ me hmenon.

⁸ Ame he ka uthmâhmâ tavat ae wisa can e, Ke ame he at ae ba hnyikongon ka höhöi ka at ame ca ot bi,

⁹ Ke so bi ame he at ae wisa ka vheno balua deny gethen, Ke ame he ka hwege tot at ae tren li hnyam ae kalaöt.

¹⁰ Ke haba öbun hia thithö, ö öbun hmetu ju, ke ai öbun: Ke oge me ca he bi ka wâ ke at ae metâ unyibun.

¹¹ A hia but bonguk je bong, a thu degecâ but hnok je hna ûnykûme. Wale onyen hnyekuk.

¹² Odrin e wia hnyinghet me me lany: Ke ûhakekenyi lany me menekholom.

¹³ Oge ne elâm erkemok helâ me umök uma; Oge ne hia but ulolo hnok hna mokut hnyi menekholom;

¹⁴ Oge ne hia but ha ka bobot, ka habe, U kamök; Me ka wahnyöng, U hinyök me hanik;

¹⁵ Awe, ewa walang ang anyik labageju? Ke haba anyik geju, ia ame he ka wâ e?

¹⁶ E ame he ka utut ka hnyi je ohmâiny erkemok, Me tha menâ eû hnyi kânâ.