Jobu 15 - Iaai Bible 1901 (New Caledonia)

¹ HABA Elifaza at Temana ame thu me ha, ka habe,

² Hawa, ame he at ae metâ ka thu ge metâ ae ûnyi baû, Me ounöngötâ hnyekon ge ang hwei?

³ Hawa, e ame he ka iwatretra ge hofuc ae gufa, Me je hofuc ae ca so troban?

⁴ Eke, u je hota degecâ ot, Me oûhnyûkongoâ khudrung hnyi hnyimakan Khong.

⁵ Anyin a haba hnyimâm ame omanenâ hwakecâm ae kong, Ke u je ûca bohmen at bibihwakeoin.

⁶ Haba hnyimâm bi ame haikongu u, ke ca hnok bi; Eke, ame haikongu u li esongodâm.

⁷ Hawa u at adre bödra ka hnokoâ? Ke adre bödra ka hnöku u, ke biliny bi je ong bucen?

⁸ Hawa u je hia but long ûhnenamö ae nuöng anyin Khong? Ke u je behânâ metâ hobi köu bi?

⁹ Ie ûnyi ae khanö u, ke ca khanʼ ohmun bi? Ke ieû e u me wâ ûnykûme, ke ca e bi unyihmun?

¹⁰ Haba e unyihmun tavat ae hûen ban me wahingat, Ae ti se hia hunaihmun hon kâmâm,

¹¹ Hawa, e ti ûhnyûkong köu je ûnyi hnân okahwa ûnyi ge Khong, Me hofuc ae menyik köu?

¹² Ieû ame hom monu u gan hnyekom? Ke ieû ame bi gan gan li emâkâm?

¹³ Mʼ u me wia hanom he ka degec Khong, Me oâ je hofuc helâe ûnyi hnyi hnyimâm.

¹⁴ Ehö at me me hau bi? Ke hna hnokoâ hnen momo, me me wisa?

¹⁵ Wâ bi e ame ca labageju ka anyin tavat ae kap; Eke, e ca kalaöt bi drany hnyi hnyimakan.

¹⁶ Ke e ti ikiki me bokong at, Wale ame ijem hulö helâ me köiö!

¹⁷ Oge me he ka haimemenâ köu; ling nya ju; Ke haba ûnyi oge hia but wâ, me oge me he ka ha:

¹⁸ (Hofuc ame omanenâ hnen tavat ae metâ A ûnyi ge lakamödra, kʼ adre me ca ikhâlâ;

¹⁹ Waleji hnyat adre ham ködrin hnyei Ke ba atkanyua ame he hnyi wanbödrin:)

²⁰ Haba at ae kong ame vec bala hnyi bongon je bong hia, Wale hnyi ûseiny je huna adre me thu ka at ûöveci.

²¹ E bala bi hnyi li hnyikonyen hwan je ûnyi hnân outen; Kʼ ame he ka o kâu at sei hnyi ûen ae sot.

²² E ame ca geju a gʼ ame he ka hmetu ûnyi hnyi menekholom Ke haba hele vat ame halubahingen.

²³ E ame ngenu he ka heleû han me ha, ka habe, Ewa? E khana a e ûhakekenyi mē bong ae menekholom:

²⁴ Adre me ootâ a ge hlöuhlöu me hlohlo; Ödra hwege hon, helâ me than, at ame penapena he ka vat.

²⁵ Anyin a e ame hia but hai hnyamen ka Khong, Kʼ ame tot bi gan ka Ataekhanahia;

²⁶ E ame utut kâu ke hwege nyin, E haki me khibi anyin je bec:

²⁷ Anyin ame tube hnyimakan ge pipikhenyainy, Ke ti gan dut li halelöûen;

²⁸ Kʼ ame hia but labâ je taun ae ba wan, Me je uma ae ba aten, Wale adre me he ka ie wia me ve ta ûnyi.

²⁹ E ame ca he ka tren omjeû, kʼ ame ca he ka tethmâ tang omjehen, Kʼ ame ca he ka khulelau ehele hatungen ta je hatong

³⁰ E ame ca he ka he but ûnyi hnyi menekholom; Kʼ ame he anyin je khûen ka meleca ge bâhlân meic, Ke haba homenâ ûnyi hnyi hnyimen Khong ame he ka ohia e.

³¹ E so e ame ca hamen iyawâ e bi, me labageju ka hnyi ûnyi ae ûnyi baû Anyin adre me he ka bi hwaban ge ûnyi ae ûnyi baû.

³² Adre me he ka ohwâdâ ke tiga ca ûen bi, Ke ame ca he ka hât anyin vheiny.

³³ E ame he ka jijingâ degecâ anyin je wan ae but helâ me vine, Kʼ ame he ka kolu anyin je vongon helâ me elaio.

³⁴ Anyin a haba bunyen anyin at ame ca ot, me ame he ka ba wan, Ke meic ame he ka han je uma mano umen tavat adre me kap hwaban ae hwali.

³⁵ Ödrin e erkinâ ûokonguny, me hnokoâ but hulo, Ke ödrin e penapena iyawö eû hnyi je hnyekudrin.