Jobu 12 - Iaai Bible 1901 (New Caledonia)

¹ HABA Jobu ame thu me ha, ka habe,

² E hnathu öbun thibi tavat, Me ame he ka tha mokcu metâ möbun.

³ Ke so bi e hu ûnykûmânök minya helâ möbun; Ca inya bi hnyi hmelibun: Eke, ke ewa at ae ca khana ta je ûnyi helâng?

⁴ Oge me ûcû me at ame hluma gan hnen waeny, Waleji at ame hongot ka Khong, me e ame thu; Adre me hluma ge at ae wisa, me so hwakecin.

⁵ Haba at ame laba sot, me wale at ame hûkotiâ at ae hmak, eû hnyi hnyekon; Adre me penapena e hobi kâu at ame he ka haû li can.

⁶ Ame mokut so je uma mano umen tavat venöu, Adre me laba hmâ, tavat adre me ohmönyinâ Khong; He haba Khong ame ham gânâ ka hnyi je hnyamödra.

⁷ Ke he thö walang ang ka hnö omenoiny hnyot, mʼ ödrin e he bi ka nö u; Me je meno ame gâ ethö, mʼ ödrin e he kâ thumetu u:

⁸ Fuc dö ka kânâ, me ame he ka nö u; Kʼ ame he je wâ eû hnyi köiö ka omanenâ köu.

⁹ Ie at ame ca wâ tremângâ ta je ûnyi hia eling, A gʼ ame ânyâ e hnyamö Iehova?

¹⁰ Haba e hnyi hnyamen hanon ta je ûnyi hia ae möt, Me homenâ anyin tavat hia thithö.

¹¹ Hawa, ca hamen hnyiköny he ka cubec ta je hofuc, Helâ me hnyem ame dem cubecâ jeû?

¹² E unyin wahingat metâ, Ke unyin tavat ae se hia, bongon wâhmakhmeto.

¹³ E unyin bi metâ me tang hwege; E unyin bi uhnenamö me wâhmakhmeto.

¹⁴ Wâ bi, e ame hagutâ, ke ca khana ke at he ka op hmetu; E ame thelöng at, ke ca khana ke at he ka khong hmetu.

¹⁵ Wâ bi, e ame behânâ köiö, me ame hme thö: Ke ame kunâ hmetu, me me wia hnyei.

¹⁶ E unyin hwege me metâ ae hnathu; E ame tren at omono, tha e me at adre omono.

¹⁷ E ame lelö but ta je obotkong, hnyat adre hia but söh, Kʼ ame omono tavat owisa.

¹⁸ E ame thang je than adre ca, Kʼ ame hûkâlâ bi wen hnyok hnyi je hnyidrin.

¹⁹ E ame lelö but tavat bihut adre hia but söh, Kʼ ame hagutâ tavat ae hwege.

²⁰ E ame hom hofuc ûnyi ge at ae hnathu, Kʼ ame hom wâhmakhmeto ûnyi ge wahingat.

²¹ E ame hingâlâ but ûöhûköti hon je than, Kʼ ame thang wen hnyekon tavat ae hwege.

²² E ame omanenâ ta je ûnyi ae iyong ûnyi hnyi menekholom, Kʼ ame hom dö hmenon mok ka hnyi lany.

²³ E ame osehia ta je hnyei, me ohiʼ ödrin hmetu: E ame olauâ ta je hnyei me odili ödrin hmetu.

²⁴ E ame hom je hnyekon tavat ae beönua hnyi hmeledrany, Me kunʼ ödrin he ka vheno hnyebuba ae ba getheniny.

²⁵ Ödrin e khaûteta hnyi menekholom me ba hnân omelamâ. Kʼ ame omonu ödrin helâ me at ame monu ge grâg.