Jobu 11 - Iaai Bible 1901 (New Caledonia)

¹ ME haba Zofar at Naamathi ame thu me ha, ka habe,

² Hawa, adre me ca he ka thu hmetu ta je hofuc ae se hia? Adre me he bi ka hawisa at ame unöngöt ge je hofuc?

³ Ame he hwâm je hofuc gufa ka ohnyibö tavat? U me he ka ûhiö, ke ba at ame he ka oihmehmö u?

⁴ Anyin a u je ha, ka habe, E hau hnok hna ûne, Ke ba kongik hnyi hnyimâkâm.

⁵ Ke, E na he ju Khong ka fuc, Me khong li esongodiny he ka ivinö möu;

⁶ Me omanenâ köu ta je ûnyi ae iyong hnyi metâ, A gʼ ame huliwa so hnyi je ve bongon ae se! Anyin a wale mē khanö u thö, a Khong ame ca ûnykûme ânyâm ke je hulo.

⁷ Hawa, u je ne elâm Khong, e khatö u he ka wâ? E khatö u he ka ti wâhmakhmeto Ataekhanahia?

⁸ E gorany hmonyin helâ me drany; ieû u me he ka ânyâ? E hnyikânâ hmonyin hmelen hedis; ieû ae khanö u bi?

⁹ Haba tulutiny, me beû hmâ hon hmeledrany, Me lau hon köiö ae gan.

¹⁰ Ame ne he ka dit, me hlöng, Me hawâ tavat ka hnyi hna owisa, ie at ame he ka thawâ?

¹¹ Anyin a e ame wâhmakhmeto tavat ae ûnyi baû: E ame wâ hulö minya, ame ne ca ûnykûme wia gan.

¹² Ke e ca hu metâ ge at ae hop, Eke, adre hnokoâ at helâ me nokon asinainy hnyot.

¹³ U je ne penapena hnyekom, Me hinôbeny kâu;

¹⁴ Ame ne hu hulö hnyi hnyamâm, degec ut e sâkâu ai, Ke ca hna hulö ka mokut hnyi umâm je uma mano:

¹⁵ Ke helâe u me he ka bwele thö goranyai me ba hnyikongom; Eke, u me he ka hwege, me ca ot bi:

¹⁶ Anyin a u me he ka hnying ânyâm vec; U me he ka ûnykûme gan helâ me je di a hia but:

¹⁷ Ke ame he ka gorany ânyâm möt hon jebigö; A ne menekholom, ame he ka helâ me hnyomakatu.

¹⁸ Ke u me he ka laba hmâ, anyin ame he ka hu gejon; Eke, u me he ka elâm, me he ka mokut hnyi hnahic.

¹⁹ U me he minya ka mokut, me ba at ame he ka ooti u; Eke, ame he ka weny gam tavat ae se hia.

²⁰ Ke ame he ka dit ut li emakan tavat ae kong, Ke ba gethen adre me he ka kec ka hnyin, Ke ödrin e he ka labageju ka hnyi ûen mokcu.