Jeremia 49 - Iaai Bible 1901 (New Caledonia)

¹ GE je laku Amona. Walang hna ha hnö Iehova, ka habe, Hawa, e ba laku Isaraela? ke ba at he ka hwöhwa-ban? ke anyin a ieû ame hwöhwabö Gada hnö Malekama, ke ta je aten adre me labā je tauniny?

² Anyin a wale, wâ bi, ame he ka o je bong, haingö Iehova, me oge me he ka olungâ hnyi Raba iny lakon Amona hwan vat; me e ame he ka hna digic thatûnyi ae ba onyen, kʼ adre me he ka thong degecâ ge meic lakon wahlu: kʼ ame he Isaraela ka hom iny tavat waleji adre me hom iny, haingö Iehova.

³ Kuku tenge thö, Hesebona, anyin ae kong ut Ai; hongot dö goranyai wahlu laku Raba, oweikʼ öbun ju ge ec mano ae gan nân: tenge thungaû thö, me he monu hnyi je hak; anyin ame he ka bâ Malekama, tha e me anyin tavat bihut, me anyin ta je taben.

⁴ Anyin a ieû u me hobeluâ je hnyigöulen bucen, a ânyâm hnyigöulen bucen ame di, u hlu at ame labö kolu? a at ame labageju ka je omjehen me ba, ka habe, Ie at ame he ka he könya?

⁵ Wâ bi oge me he ka oâ ot köu, haingen Than Iehova tuhan sabaoth, ûnyi gadra hia tavat adre me igigili u; ke adre me he ka obʼ öbun hnyi je ve cici öbun bi, ke ame he ka ba at he ka hlo tavat adre me he monu.

⁶ Ke hwaban e oge me he ka ohmeto je bâ anyin lakon Amona, haingö Iehova.

⁷ Ge Edoma. Walang hna ha hnö Iehova tuhan sabaoth, ka habe, Hawa, e ba hmetu metâ hnyi Temana? hawa, a aû but hna khana bongon unyin tavat wâ wia? ke a hia but anyidra metâ?

⁸ Aten Dedana lö, kec hmetu ju öbun, laba ju hnyikânâi; anyin a oge me he ka oâ okongon Esau kâu, wale hnyi ûen oge me he ka senâ e.

⁹ Ame ne o köu tavat hlu wan vine, hawa, adre me ca he ka hna ke je wan ae wakhalet? ame ne o köu tavat venöu hnyi hnyinghet, me adre me ca he ka okongoâ ûnyi ae ûcû ködra?

¹⁰ Ke oge me öba khauö Esau, oge me khong je dok ae iyong gan, ke e ca khana bi he ka ikhâlâ e: adre me ohia u je mâtrâniny, me je liamekeiny më, me tavat ae hakekeny kâu, ke e ame hia but.

¹¹ Hna but lakom a ga mokcu lakamödra, me oge me he ka tuö melidra; ke so e he ânyâm je safac ka labageju könya.

¹² Anyin a walang hna ha hnö Iehova, ka habe, Wâ bi, haba tavat a ca hamödra he ka ijem kaia, e hnathu adre me he ka ijem; ke haba u, u at adre me ca he ka bi hwaban? ohe, u me ca he bi ka he ke ba hwabâm, e hnathu u me he ka ic.

¹³ Anyin oge hia but khemanyin gak bi, haingö Iehova, a ga me he Bozera ka hnân kuko, me haikongo, me ba wan, me hnân hangâ; ke ame he ka ba wan je tauniny hia nyiele balua.

¹⁴ Oge hia but löng ûthumetu ûnyi ga Iehova, ke adre kunâ ûthumetu ka hnyi je hnyei hia thithö, he ka ha, ka habe, Ukhacaköu thö, ke he thö kâu, ke todrö he ka vat.

¹⁵ Anyin a wâ bi, inya oge hia but wiö u mu me ûhnyûkong unyin je hnyei, me hûkötiânen tavat.

¹⁶ Ame iyawo u bi hnen hnyekom ge hnâm hna ootâ, u at ame laba hnyi je khekheiny kic, me je dok ae göranyin bucen: eja ke ne u je ne ip haûâm? ethö helâ me aeto, oge me he ka höi u ûheny e, haingö Iehova.

¹⁷ Ke ame he Edoma ka hnân lâiâ: ame he tavat hia adre me he hnyin ka kuko, me jû can hnân je aat hia.

¹⁸ Haingö Iehova, ka habe. E ba at ame he ka labā e, helâ me hnyi hnödra hna ohia Sodoma me Gomora me je taun ae hakekenyâ, ke ame ca he ke at he ka me laba eling.

¹⁹ Wâ bi, e ame he ka ölö helâ me liona ûnyi hnyi hmanenanginy Joridano ka hnyi taun ae hwege, ke oge me he ka ie okecâ e ûheny e; ke haba at adre me ûca, oge me he ka otilâ e hon: anyin a ie at ae ûcû mönya? ke ie at ame he ka thu ûen könya? ke ie at tuö mamoe ame he ka tot hnyi hnyimakök?

²⁰ Anyin a wale löng ju öbun hna ûnykûme hnö Iehova, waleji e ame ûnykûme ge Edoma; me je ûnykûmenen waleji e ame ûnykûme ka tavat adre me laba hnyi Temana: E hnathu adre me he ka lili ödra, wale tavat ae ûhnyûkong hnyi hna hat meno; e hnathu e ame he ka öba wan je hnyabadra.

²¹ Ame jijing ut hmeledrany hnen hwan ûtaidra; e hu hwatenge, adre me long e hnyi Köiö ae Dra.

²² Wâ bi e ame he ka ölö me gâ helâ me aeto, me lau li labenyin ka Bozera: ke hnyi bong eling ame he je hnyekon je tavat ae hwege hnyi Edoma ka helâ me hnyekon momo ame he ka hnokoâ.

²³ Ge Damaseko. Ame hmehma but Hamath me Arefada; anyin adre me hia but long je uthumetu ae kong, kʼ ame oaû ödra but: e bi hlöuhlöu hon köiö, ke ca khana bi he ka ta hau.

²⁴ Ame sënyin dut Damaseko, e ame hwio he ka kec, ame kât e ge öbubuny: kʼ ame o but kâu hlöuhlöu me vec helâ me momo ame vec hnyekon.

²⁵ Ieû adre ca hna degecâ gan taun ae lung, taun oge me senyin kâu?

²⁶ Anyin a wale ame he ka ta wahidrouiny hnyi je getheniny, ke ame he ka mok hia aten vat hnyi bong eling, haingö Iehova tuhan sabaoth.

²⁷ Ke oge me he ka hû meic hnyi hak vetoiny Damaseko, kʼ ame he ka an je uma ae ûnyi hnathu umö Ben-adada.

²⁸ Ge Kedara, me je dokhu hnyi Hazora, waleji hnö Nebukaneza than Babulona hna kot. Walang hna ha hnö Iehova, ka habe, Todrʼ öbun, he thö Kedara ai, me söh tavat e deiö.

²⁹ Adre me hûgûnâ umödra je uma mano, me haledra je hna hat mamoe; adre me he ka hom hobi kodra bi singidra je mano, me anyidra je kaia hia, me haledra je kamela: ke adre me he ka hongot kodra, ka habe, Ûnyi hnân outen hnyi je ke keihen hia.

³⁰ Öbun tavat aten Hazora lö, kec dö, he sâkâû ai, laba ju hnyikânâi, haingö Iehova; anyin a hia but ûhnenamö gabun Nebukaneza than Babulona, me ûnykûme hna ânyâ köbun.

³¹ Todrö, ke he thʼ öbun ka hnyi hnyei ame laba so, kʼ adre me labā ke ba hmak, haingö Iehova, tavat ae ba hlinginy hwanuma me ohmâiny, kʼ adre me hake laba.

³² Ke haba haledra je kamela, me hnân hûgûnâ bi, ke hnân söh bi ûseiny haledra omeno: ke oge me he ka oveseâ ka hnyi je ang tavat adre me giâ ke keihen waidra; ke oge me he ka oâ anyidra vec ûheny hnyi je ke keihidra, haingö Iehova.

³³ Ke haba Hazora me hnân uma umen je luko, ke ba wan nyiele balua: ame ca he ke at ka laba eling, kʼ ame ca he nokon at ka me laba eling.

³⁴ Hofuc ho Iehova ame o but kö Jeremia profeta ge Elama, hnyi hna hwân musi a Zedekia than Juda, ka habe,

³⁵ Walang hna ha hnö Iehova tuhan sabaoth, ka habe, Wâ bi oge me he ka thu cafana anyi Elama, wale ûbeönuainy hwegiödra.

³⁶ Ke oge me he ka oâ kö Elama je ang a vak hnyi vak ta ke keihen drany, ke oge me he ka ovesei ödra ka hnyi vak ta ang hia; ke ame he ka ba hnyei ame ca he ka o ka hnyin hnödra hna obâ ûnyi hnyi Elama.

³⁷ Ke o ge me he ka ootâ at Elama hnyi hnyimakan je iwahnaihmiony mödra, me hnyi hnyimakan tavat adre me elâm he ka hlingʼ ödra: ke oge me he ka oâ kodra okongon, wale anyik hmonyin ae hwege, haingö Iehova; ke oge me he ka kunâ hotudra hele vat, ke ne o but oge hia but ohiʼ ödra:

³⁸ ke oge me he ka otilâ anyik theron hnyi Elama, ke oge me he ka ohia eling than me je taben, haingö Iehova.

³⁹ Ke haba hnyi je bong a biliny, oge me he ka ohmeto at Elama ûhedra hnyi hna bâ, haingö Iehova.