Jeremia 46 - Iaai Bible 1901 (New Caledonia)

¹ WALANG hofuc ho Iehova ame o kö Jeremia perofeta ge ta je hnyei,

² Ge Aigupito: me utbavat anyi Farao-neko thaniny Aigupito, a e hnyi wagewe Euferate hnyi Kakemis, waleji hnö Nebukaneza than Babulona hna kot hnyi huna a vaki Jehoiakima nöku Josea than Juda.

³ Penapena thʼ öbun bec, me bec ae gan, ke hakekeny ju he ka vat.

⁴ Bi omjehen ju je hors, ke tabâ thʼ öbun tavat tabô hors, ke todrö me je hnabicen vat; khet ju jeö, khavâ ju je ûkhaûen vat.

⁵ Anyin a ieû oge me wâ e? adre me ot me hmetuhmetu; ke adre kot anyidra je taben, adre me kec hwege me ca hwio bi: e hu ûnyi hnân ootâ igigilo, haingö Iehova,

⁶ E so ame ca kec at ae hâhâ can, e so ame ca he ka kec mot at ae hwege; adre me haû me ta hnyi hwadro hnyi baten wagewe Euferate.

⁷ Ie at ang ame olo helâ me Nail, me bwebwelâ je köiöiny helâ me je wagewe?

⁸ Aigupito ame ölö helâ me Nail, ke ame bwebwelâ köiöiny helâ me je wagewe: ke haingen, ka habe, Oge me he ka ölö, oge me he ka tube hmeledrany; oge me he ka ohia taun me je aten e.

⁹ Ölö thö, öbun je hors; wadring hwege thö, öbun je kariota; e so ame he but tavat ae hwege; jia at Kusa me Futa, tavat ae khanʼ ödra he ka kât bec; ke at Luda tavat ae khanʼ ödra he ka kât me hlöu cafana.

¹⁰ Anyin a bong bongon Than Iehova tuhan sabaoth bong eling, a bong bi hwaban, he ka bi hwaban ka je iwahnaihmiony më: ke ame he hele vat ka an, me sekon, ke ijem drödra me me sekon: anyin ae hu hut ka Than Iehova tuhan sabaoth hnyi hnyei hnyi hwadro hnyi wagewe Euferate.

¹¹ Ölö thö Gileada ai, me hok basama, u hluiny Aigupito: e ûnyi baû bi hnâm hna bi bubuny ae se hia; e ba bi eny hobi köu.

¹² A long ut ta je hnyei ânyâm hmehma, kʼ ame unöngötö hnyei ge ûtengiâm: anyin a at ae hwege ame haû ge at ae hwege, kʼ ödru me tha ta ju.

¹³ Walang hofuc ame ha Iehova kö Jeremia perofeta ge iöi Nebukaneza than Babulona he ka kot hnyei Aigupito.

¹⁴ Haimemenâ thö hnyi Aigupito, ke omanenâ thö hnyi Migedola, ke omanenâ thö hnyi Nofi me Tapenesi; ha thʼ öbun, ka habe, Todrö, penapena thö; anyin ame an igigili u hnen hele vat.

¹⁵ Anyin a ieû adre me aba degecâ tavat ae hwege unyâm? adre me ca tot bi, anyin ame hagutʼ ödra Iehova.

¹⁶ E ame ohaûâ tavat ae se hia, eke, ke at ame ta hon ke at; ke haingodra, ka habe, Todrö, ate me hmetu ka ta je atöta, me hnyei adre me hnöku ota hnyin, can hele vat at ame ûokonguny.

¹⁷ Adre me kuko eling me ha, ka habe, Haba Farao than Aigupito me mede thibi; e ame onua but ûen adre thu.

¹⁸ Haingen Than, Iehova tuhan sabaoth ien, ka habe, Kia inya, e hnathu e ame he ka o helâ me Tabora unyin ta je bucen, ke helâ me Karemela hnyi baten köiö.

¹⁹ Hlu lö, at ame laba hnyi Aigupito lö, penapena thö hobi köu he ka he ka hnyi hwenbâ: anyin ame he ka ba but wan hnyi Nofi, ke ame he ka le degecâ ke ba aten.

²⁰ Aigupito kau ae mec unyin; ke ame o but okongon ûheny hnyi hwadro, a o thö e.

²¹ Haba je aten adre me hok hwaban hnyi wanben e, ödra helâ me je nokon kau adre me tuö hnyi uma; anyin adre me hwio minya me tha kec, adre me ca tot hmâ bi: anyin ame o but kodra bong bongudra vec, ûen he ka senʼ ödra.

²² Ame he ka he ifucin helâ me on; anyin adre me he ka tha bunyen me utbavat, ke Adre me he ka o kâu me je giwa, helâ me tavat si utö.

²³ Haingö Iehova, ka habe, adre me he ka sö anyin hnyot, ke ca hnân wâ; anyin a ödra se hia hon ta je wahamon, ke ca hnân aû ûseidra.

²⁴ Ame he ka hmehma hluiny Aigupito; adre me he ka hna e ka hnyi hnyamen tavat aten hwadro.

²⁵ Haingö Iehova tuhan sabaoth, Khongu Isaraela, ka habe, Wâ bi, oge me he ka bi hwaban kö Amona ûheny No, me Farao, me Aigupito, tha e me je khongon, me je thaniny; wale Farao, me tavat adre me labageju kâu:

²⁶ ke oge me he ka hnʼ ödra ka hnyi hnyamen tavat adre me elâm he ka hlingʼ ödra, me ka hnyi hnyamö Nebukaneza than Babulona, me ka hnyi hnyamen ta je athnyabainy: ke hwaban e adre me he ka labā e helâ me hnyi je bong kâû adrem, haingö Iehova.

²⁷ Ke haba u Jekob a athnyabaik, ca ot bi, me Isaraela, ca hlohlo bi: anyin a wâ bi oge me he ka omeli u ûnyi hnyi dok ae sâkâû, me je mâtrânâm ûnyi hnyi hnyei waleji oge hum ödra ka hnyin; ke ame he Jekob ka hmetu, me laba so me menâ, ke ba hmetu bi at ame he ka ootâ e.

²⁸ Jekob, athnyabaik lö, ca ot bi, haingö Iehova; anyin a tha inya möu: anyin oge me he bi ka ti ohia je hnyei hia waleji oge obö u ka hnyin, ke oge me ca he ka ti ohiö u; ke so bi oge me he ka nö u ge hna owisa, ke oge me ca he bi ka hnö u ke ba hwaban.