Jeremia 21 - Iaai Bible 1901 (New Caledonia)

¹ WALANG hofuc ame o kö Jeremia ûnyi ga Iehova waleji hnyi hnö Zedekia than hna kunö Pasur nöku Malekia kâu, me Zefania nöku Maseia at bihut ame ha, ka habe,

² Ö u hnei Iehova thö gatin; anyin a Nebukaneza than Babulona ame vat mötin: ame ne he Iehova ka ânyâ hobi kötin hoton anyin ta je huliwa hia hnân lâiâ, me me he ka he but gatin.

³ Me haba Jeremia ame ha ködru, ka habe, Walang hofuc öbu me he ka ha kö Zedekia, ka habe,

⁴ Walang hna ha hnö Iehova Khongu Isaraela, ka habe, Wâ bi, oge me he ka ohavâ je omjehen vat ae hnyi je hnyamöbun, waleji ge hnobun hna vat me than Babulona, me at Kaledaia, tavat adre me igigili öbun hoton hna up veto, ke oge me he ka ûkhacaköu ödra hnyi wanben taun ang.

⁵ Ke haba inya oge me he ka vat möbun ge hnyam adre hai me beny ae hwege, me hnyi hmonyin me wathethot, me hmonyin ae gan hmâ.

⁶ Ke oge me he ka kot aten taun ang, wale a at me meno: adre me he ka mok ge mok ae gan, wale mok cap.

⁷ Ke hwaban e, haingö Iehova, oge me he ka hnö Zedekia than Juda, me je athnyabainy, me tavat a je kolon hnyi taun ang ûnyi hnyi mok ae cap, me hele vat, me hmiâ, ka hnyi hnyamö Nebukaneza than Babulona, me hnyamen je iwahnaihmiony mödra, me hnyamen tavat adre me elâm he ka hlingʼ ödra: ke e ame he ka kuc ödra ge hele vat; e ame ca he ka omeli ödra, me hnyok kodra, me betenge.

⁸ Ke u me he ka ha ka tavat ang, ka habe, Walang hna ha hnö Iehova, ka habe. Wâ bi, inya oge me ip hnyi hnyimaköbun gethen deny mot, me gethen deny mok.

⁹ Haba at ame he ka laba bala bi hnyi taun ang, ame he ka mok ge hele vat, me hmiâ, me mok ae cap: ke haba at ama didrut, me kec ka at Kaledaia, tavat adre me igigilo öbun, me ame he ka mot, ame he ka jekhon anyin mot.

¹⁰ Anyin a inya oge hia but hnyimakök ka hnyi taun ang me me kong, ke ca hnân bi so, haingö Iehova: adre me he ka hna e ka hnyi hnyamen than Babulona, ke e ame he ka thong e ge meic.

¹¹ Ke haba lap anyin than Juda, löng ju hofuc ho Iehova gan, ka habe,

¹² Lap anyi Davita lö, walang hna ha hnö Iehova, ka habe, Ânyâ thö ûnyi ae wisa hnyi hnyomakatu, ke omelo thö at adre söh ûnyi hnyi hnyamen at ûöveci, wâ e nye gâ but anyik hmonyin helâ me meic ame ubâhlâ, ke ba at ama ume, can ûkongon anyibun ta je huliwa.

¹³ Wâ bi, ûcûk u, at ame laba hnyi hnyigöulen kicin dok ae tha hon, haingö Iehova, öbun tavat, öbun e ha, ka habe, Ie at ame he ka utut köta? ke ie at ame he ka dit ka hnyi je hnyabata?

¹⁴ Ke oge me he ka bi hwaban köbun, e ûcû me wan anybun ta je huliwa, haingö Iehova: ke oge me he ka hû meic hnyi je hnyeuten, ke e ame he ka an igigilo ehele.