I. Thesalonika 4 - Iaai Bible 1901 (New Caledonia)

¹ KE walang obiny, hnyat me lakeiny lö, öhmun e sumat me ûjengi öbun ge Than Iesu, ka habe, haba hnöbun hna kap gahmun ge bongon he a öbun, me me osenyinâ Khong, ke öbun e he helâe,— mʼ öbun e he ka hwege tot hnyin bala.

² Anyin ae khanʼ öbun dut je hna hûna, öhmun e ha köbun ûnyi ge Than Iesu.

³ Ke walang weny Khong, a öbun e he ka kap, ka habe, e so öbun e ka ûsâkâûö but me bi ûnyi monu;

⁴ me me ve khanʼ öbun dö hwakecin hna tuö anyibun je kaia me me kap me so,

⁵ ke ca ûnyi bi hnyi hnyok ae ikiki, helâ me Aten ta je hnyei ae ca khanʼ ödra Khong;

⁶ me me ca he ke at ka hanyâûâ, me okongoâ liamekeiny më hnyi ke ûnyi: anyin a Than at ame bi hwaban hnyi ta je ûnyi eling, helâji me hnöhmun hna ha ehac, me hna sihwegi Öbun wia.

⁷ Anyin a ca hawʼ öta Khong ka hnyi hwakecin ae ikiki, ke hnyi hwakecin bi ae kap.

⁸ Anyin a wale, haba at ame hota degecâ, me e ame ca hota degecâ at, ke Khong bi, wale at ame ham köbun Hanon ae Kap.

⁹ Ke ca ûnyi hnathu bi a oge me he ka sihnalimen köbun ge bongon ibetengiö anyin hnyat me lakeiny: anyin a nʼ öbun Khong he ka ibetengiököu;

¹⁰ e hnathu öbun e ânyâ e ka hnyat me lakeiny hia hnyi Makedonia hia. Ke öhmun e khöû köbun, hnyat me lakeiny he ka osehia bala;

¹¹ kʼ so öbun e elâm he ka laba wia, me ve bi hanymen, me huliwa ge je hnyamöbun, helâ me hnöhmun hna hûna köbun;

¹² mʼ öbun e he ka vheno soâ kodra eû hnyou, mʼ öbun e ca he ka theduoc.

¹³ Hnyat me lakeiny lö, e bewehmun e me khanʼ öbun bongon tavat adre me mokut ut; mʼ öbun e ca he ka tenge helâ me keihen ae ba geju gadra.

¹⁴ Anyin ate ne ûnykûme a ga mokcu Iesu kʼ ame möt hmetu thö, awe, helâe minya ame he Khong ka tha hom më tavat adre me mokut ut unyi Iesu.

¹⁵ Ke öhmun e ha ûnyi ang köbun ge hofuc hwan Than, ka habe, haba öta a öta möt a je kolon e ka o Than, me ate me ca he ka khaletâ tavat adre me mokut.

¹⁶ Anyin ame he ka utut Than ûheny hnyi drany, me hwakuku, me ifucin angela ae beönua, me hwan trutru anyin Khong: ke ame he ka bân tavat adre mok unyin Keriso ka höhöi:

¹⁷ ke haba öta tavat a öta möt, a je kolon, me adre me he ka tha köp öta thö mʼ ödra ka hnyi je ûlâ, he ka ûkhanö me Than ethö hnyi wanben: me ame he ka tha öta me Than nyiele balua.

¹⁸ Anyin a wale ûsihwegiöbunköu thö ge ta je hofuc ang.