I. Samuela 14 - Iaai Bible 1901 (New Caledonia)

¹ KE haba hnyi ke bong me Jonathana nöku Saulo ame ha ka hidröu, at ame hom tilâ anyin ta je ûnyi hnân vat, ka habe, Ötu he ka lap tue anyin at Filisiti hnyi ke keihen eji. Ke e ame ca thumeto kamen.

² Ke Saulo ame laba hnyi obiny Gibea hnyi hmelen ûö rimona hnyi Migeron: ke helâ me siks haded tavat unyin;

³ me Ahia a nöku Ahituba, liamekeiny me Ikaboda, nöku Fineasa, nöku Eli, at bihut kö Iehova hnyi Silo, e ame khavâ iefoda. Ke ca khana bi tavat a ga he but Jonathana.

⁴ Ke hnyi wanben li gethen Jonathana ame elâm deny hnyin he ka he ka hnyi lap tue anyin at Filisiti, ke wale ke kic ae beû me ûjejöng hnyi ke keihen, me ke kic ae beû me ûjejöng hnyi ke ke keihen: ke Bozez ien khaca, ke Sene ien khaca.

⁵ Ame tot khaca kic ka hnyi hwadro cicö Mikemas, ke haba khaca ka hnyi hwaiöu cicö Geba.

⁶ Haba Jonathana ame ha ka hidröu, at ame hom tilâ omjehen vat, ka habe, Ötu he ka hanyâûâ ka hnyi lap tue anyin tavat eang adre ca peritomonâ: ame ne he ʼ Iehova ka huliwa hobi kötin: anyin a e ba at ame musi kö Iehova he ka omelö, ame ne ûnyi ge tavat ae se, ame ne ûnyi ge tavat ae wakhalet.

⁷ Me ame thu kâu at ame hom tilâ omjehen vat, ka habe, Ânyâ hia thö ûnyi hnyi hnyekom: hwio thö, wâ bi inyʼ ang unyâm hoton weny hnyekom.

⁸ Haba Jonathana ame ha, ka habe, Wâ bi ötu me he ka hanyâûâ ka tavat, me omanenʼ ötu bi ködrin.

⁹ Ödrin e ne ha helâng kötu, ka habe, Todru, mʼ ohmun e me he köbu, awe, ötu me he ka tot bala, me ca he bi ködrin.

¹⁰ Ke ödrin e ne ha helâng, ka habe, Ölö thʼ öbu kohmun; awe, ötu me he ka ölö thö; anyin a hia but Iehova hnʼ ödrin kötu: ke walang haten kötu.

¹¹ Ke ödru me omanenʼ ödru bi ka lap tue anyin at Filisiti: ke haingen at Filisiti, ka habe, Wâ bi, ame o but at Heberu ûheny hnyi jē op wale ödrin e lubaduöng hnyin.

¹² Me ame thu aten lap tue kö Jonathana me at ame hom tilâ omjehen vat, ka habe, Ölö thʼ öbu kohmun, me ohmun e he ka omanenâ köbu ke ûnyi. Haba Jonathana ame ha ka at hom tilâ omjehen vat, ka habe, Ölö thö hotuk: anyin a hia but Iehova hnʼ ödrin ka hnyi hnyamen at Isaraela.

¹³ Ke Jonathana ame iyâw ge li benyin me li can, ke ame he hoton at hom tilâ omjehen vat: me ödrin e ta hnyi hnyimakö Jonathana; ke haba at hom tilâ omjehen vat ame hlingʼ ödrin hnyi hoton.

¹⁴ Ke haba hnyi hna hlingâ eling a bân, wale Jonathana me at hom tilâ omjehen vat ame ânyâ me ame ne twente tavat, hnyi utkânâ ae ûhnyûkong helâ me hafiny wadeny ûnyi hnân wia kânâ.

¹⁵ Ke e hu öbubuny hnyi hna hunuma, me hnyei, me unyin tavat hia; haba lap tue me hnyat hûgûnâ ödrin e öbubuny minya: ke ame ûk hmeledran; me gan hmâ hmonyin öbubuny.

¹⁶ Ke haba hnyat hmâkâ hnyi Saulo hnyi Gibea hnyi Beniamina ödrin e wâ; ke wâ bi ame aû but tavat, ke adre me kec monu ehele.

¹⁷ Ke haba Saulo ame ha ka tavat unyin, ka habe, Aû thö tavat, me wâ ie at a hia gatin. Ke ödrin e aû, me wâ bi, e hiö Jonathana me at a hom tilâ omjehen vat.

¹⁸ Me haba Saulo ame ha kö Ahia, ka habe, Hom but jem tang tangen Khong. Anyin a e unyin lakon Isaraela tang tangen Khong hnyi ûen e.

¹⁹ Ke Saulo ame tiga ûhnenamö me at bihut, me ame tiga hu mede hnyi hna hunuma anyin at Filisiti, me ame gan tot: me Saulo ame ha ka at bihut, ka habe, Me tot ju.

²⁰ Ke Saulo me tavat hia unyin adre me ûkhacaköu me he ka hnyi vat: ke wâ bi, ödrin e ûkotköuâ lahiödrin, ke ti gan hmâ imonumonuny.

²¹ Ke haba at Heberu tavat ödrin e tha he unyin at Filisiti ehac, a tavat adre me tha he mödrin ka hnyi hna hunuma ûnyi hnyi hnyei igigilo; me haba hnyat eling ödrin e hwio he ka tha ödra me at Isaraela unyi Saulo me Jonathana.

²² Helâe minya hnyat Isaraela hia a hnyat adre lubaduöng hnyi hnyei ae hut hnyi Eferaima, kʼ ödrin e long a ga kec ut at Filisiti, me ödrin e hnyi hnu ödrin hwegiödrin hnyi vat.

²³ Me haba Iehova ame omelö at Isaraela hnyi bong eling: ke adre me vat ke ne o but ka hnyi Beth-aven.

²⁴ Ke a vec ut Isaraela hnyi bong eling: ke haba Saulo ame thawâ hwegiâ tavat, me ha, ka habe, Hnaûhango a ame he ka han ke ne o but sahac, me inye me hia thö bi hwaban ka je iwahnaihmiöny mönya. Ke ame ca han bi tavat hia.

²⁵ Ke ame o but tavat hia hnyi hnyot, ke wale hani eû hon kânâ.

²⁶ Ke a o but tavat hnyi hnyot, me wâ bi, ame khula hani: ke so bi e ba at ame inâ hnyamen ka hnyi huyimen; anyin a tavat ödrin e outen hnaûhango.

²⁷ Ke haba Jonathana ame ca long bi hnen kamen hna khemanyin ka tavat: ke e ame inâ hnyiban uci wale hnyi hnyamen, me hneû e hnyi hani, me hai hnyamen ka hnyi hnyimen; me ame metâ li emakan.

²⁸ Me ame ha ke at, ka habe, Haba kâmâm ame khemanyin hwege ka tavat, me ha, ka habe, Hnaûhango at ame he ka han hnyi bong ang. Ke e sënyin dut tavat.

²⁹ Haba Jonathana ame ba, ka habe, Cica ame ovecâ hnyei: wâ bi e metâ but li emakök ûnyi hnyi hnok hna drem ke ong hani eang.

³⁰ Hawa, a ne han gânâ tavat eja je ûnyi ödrin e hûgûnâ ge je iwahnaihmiöny mödrin wale adre me hlo? ke ame ca se hia hanitin ge at Filisiti walang ang.

³¹ Ke ödrin e kot at Filisiti hnyi bong eling hwân Mikemas ke ne o but hnyi Ajalona: ke ame sënyin gan hmâ but tavat.

³² Ke ame gâ but tavat ka sei, me hom je mamoe, me je bolok, me je nokon kau, me hlingâ eû hnyi kânâ: ke tavat ödrin e tha han je meno me dren.

³³ Ke adre me thumetu Saulo, ka habe, Wâ bi, ame monu tavat kö Iehova, ödrin e han meno me dren. Me e ame ha, ka habe, Öbun e hia but iyawö; tetebulo thö eâu könya ke veto ae gan.

³⁴ Ke haba Saulo ame ha, ka habe, Vese thö ka tavat me ha kodra, ka habe, Ve hom but könya halebun je bolok, me je mamoe, me hlingâ eang, me han; ke ca ânyâ hulö kö Iehova he ka tha han me dra. Ke haba tavat hia ödrin e ve hom haledrin je bolok hnyi lit e, me hlingâ eling.

³⁵ Ke Saulo ame otilâ taben hut kö Iehova: wale taben hut a bân e ame otilâ kö Iehova.

³⁶ Ke haba Saulo ame ha, ka habe, Otin he ka at Filisiti hnyi hnyinghet, me kuc ödrin ke ne o but hnyi haolany me me ba köluidrin. Me haingödrin, ka habe, E so u me ânyâ weny hnyekom. Ke haingen at bihut, ka habe, Ötin a me he ka hakekeny ka Khong.

³⁷ Haba Saulo ame elâm unyin Khong, ka habe, Hawe, oge me he ka he ûcon at Filisiti? hawa, u me he ka hnʼ ödra ka hnyi hnyamen at Isaraela? Ke e ame ca thu kâu hnyi bong eling.

³⁸ Me haingö Saulo, ka habe, Ai öbun öbun je taben tavat, me me khanʼ ötin me wâhmakhmeto ûnyi ua monu eang hnyi bong ang.

³⁹ Anyin a kia inya Iehova at omelö at Isaraela, me ame ne e unyi Jonathana a nokuk me hamen he ka mok. Ke ame ca thu kâu ke at unyin tavat hia.

⁴⁰ Me e ame ha ka at Isaraela hia, ka habe, Hamöbun he ka tot hnyi ke keihen, ke inya me Jonathana a nökuk hnyi ke keihen. Me haingen tavat kö Saulo, ka habe, Hamâm.

⁴¹ Me Saulo ame ha ko Iehova Khongu Isaraela, ka habe, Omanenâ thö at ae wisa. Ke ame kû Saulo me Jonathana ge ugleköb, ke gufa bi tavat.

⁴² Me haingö Saulo, ka habe, Ugleköbi nya thö me Jonathana nökuk. Me ame kû Jonathana.

⁴³ Me haba Saulo ame ha ko Jonathana, ka habe, Ha thö könya ûnyi u je ânyâ. Me Jonathana ame ha kâu, ka habe, Oge drem thibi hani hnyi obiny uci hnyi hnyamok; ke wâ bi hamök he ka mok.

⁴⁴ Ke haingö Saulo, ka habe, Ame he Khong ka ânyâ helâe me bi hanen ke e hnathu u me he ka mok, Jonathana.

⁴⁵ Me ame ha tavat kö Saulo, ka habe, Hawa, ame he ka mokcu Jonathana at ame omelö gânâ at Isaraela? Ohe, kia öhmun Iehova, ame ca he ka kolu ke leûnen ban; anyin a e ame hia but tha huliwa me Khong hnyi bong ang. Me haba tavat adre me omeli Jonathana, me ame ca mok bi.

⁴⁶ Ke Saulo ame hmetu ûheny hnyi hna hnu at Filisiti: kʼ ame vese at Filisiti ka hnyi hnödra bi.

⁴⁷ Ke hnyi ûen Saulo ame kap dökhu Isaraela, me e ame vat me je iwahnaihmiony mē hia igigilo, a at Moaba, me laku Amona, me at Edoma, me je thaniny Zoba, me at Filisiti: ke hwege hudrin hia e ame he ûcon.

⁴⁸ E ti hwege me kot at Amaleka, me omelö at Isaraela ûnyi hnyi hnyamen tavat adre me hûgûnʼ ödra.

⁴⁹ Ke walang laku Saulo, Jonathana, me Ishivi, me Maleki-sua: ke walang ien lakon li hlu; jia Meraba wale atö, ke Mikala ien wakeiat:

⁵⁰ ke Ahinoam ien öiö Saulo, e nöku Ahimaza: ke haba ien taben anyin vat jia Abinera, nöku Neri, wale ke kamö Saulo.

⁵¹ Ke Kiso kamö Saulo; ke haba Neri kamö Abinera, wale noku Abiela.

⁵² Ke e hwege vat me at Filisiti hnyi je bong hia bongu Saulo: ke ame ne wâ but Saulo ke je hnyat ae hwege, me tavat ae ba ot, me e ame hom bi kâu.