I. Samuela 13 - Iaai Bible 1901 (New Caledonia)

¹ KE haba Saulo ame hwân he ka musi ke (thote) je hunainy; ke e ame musi hnyi Isaraela hnyi lo li huna.

² Ke haba Saulo ame ûca hobi kâu kun ta thauzan at Isaraela; haba lo li thauzan ka e bi unyi Saulo hnyi Mikemas me hnyi bucen Beth-ela, ke haba khaca thauzan ka e unyi Jonathana hnyi Gibea hnyi Beniamina: ka haba kolon tavat e ame ve kunʼ ödrin ka hnyi umödrin je uma mano.

³ Ke haba Jonathana ame kot lap tue anyin at Filisiti hnyi Geba, ke a long ut at Filisiti. Ke haba Saulo ame tuâ trutru hnyi hnyei hia thithö, me ha, ka habe, Long ju öbun, at Heberu.

⁴ Ke a long ut at Isaraela hia, ka habe, A hia but Saulo kot lap tue anyin at Filisiti, ke e bon dut at Isaraela minya ka at Filisiti. Me ame ûkhacaköu tavat kö Saulo hnyi Gilegala.

⁵ Haba at Filisiti adre me ûkhacaköu he ka vat me at Isaraela, thote thauzan je! kariota, ke siks thauzan tavat tabö hors, me tavat helâ me önyin köiö ûseidra: ke adre me he me hunuma hnyi Mikemas, Beth-aven ke e deiö.

⁶ Ke a wâ but at Isaraela a gʼ adre vhet ut (anyin ame gâ on tavat,) haba tavat adre me ve lubaduöng hnyi je hmonop, me hnyot, me kic, me op me hna hiny.

⁷ Ke haba keihen at Heberu ödrin e hia but he hanyâûâ Joridano ka hnyi hnyei Gada me Gileada; ke haba Saulo me tiga e bi hnyi Gilegala, ke ame be hoton tavat hia thithö, me öbubuny.

⁸ Ke e ame halubahingen seven je bong, helâ me hna thu ûen ga Samuela: ke ame ca o bi Samuela hnyi Gilegala ke ame vese thö tavat unyin.

⁹ Ke haba Saulo ame ha, ka habe, Hom but jem könya hudiny leû, me je hudiny ole. Me e ame hudo hudiny leû.

¹⁰ Ke e tiga um dö hudo hudiny leû, wâ bi, ame o thö Samuela; ke Saulo ame he ka ûkhanö mē me me iouny mē.

¹¹ Ke haingö Samuela, ka habe, Ieû u je hia but ânyâ? Haingö Saulo, ka habe, Oge wâ a ga vese thö tavat gak, ke u tiga ca o waleji hnyi ûen, me haba at Filisiti adre me ûkhacaköu hnyi Mikemas;

¹² anyin a wale oge me ha, ka habe, Ame he ka utut walang ang at Filisiti könya hnyi Gilegala, kʼ iny tiga ca hia but sumâtâ ibetengiö anyi Iehova: can e oge me ohwegiâ hnyekuk me hudo hudiny leû.

¹³ Me Samuela ame ha kö Saulo, ka habe, E monu ûnyi u je ânyâ: u je ca tuö hnanyibu anyi Iehova Khongom, waleji e ame huna köu: ame we Iehova ka ohmâ dokhom dökhu hnyi Isaraela nyiele balua.

¹⁴ Ke walang ang ame ca he ka tet hmâ dokhom dökhu: ke Iehova ame hia but elâm at ae ûcû me hnyekon bi, ke Iehova ame hia but ûca at eling me me tuhan lakeiny, anyin a u je ca tuö ûnyi waleji Iehova ame hûna köu.

¹⁵ Ke Samuela ame tot me he Gibea ai hnyi Beniamina ûheny Gilegala. Ke Saulo ame aû tavat unyin, ke helâke siks haded.

¹⁶ Ke ame laba Saulo me Jonathana a nokon me tavat unyidru hnyi Geba hnyi Beniamina ke haba at Filisiti adre me hunuma hnyi Mikemas.

¹⁷ Ke haba tavat hûgûnâ, me ödrin e he ûheny hnyi hna hunuma anyin at Filisiti a kun ta bunyen: haba ke bunyen ame hnyi gethen ûheny Ofera me he hnyi hnyei Sual:

¹⁸ ke ke bunyen ame saû hnyi gethen ûheny Bethe-horona: ke ke bunyen bi ame saû ka hnyi getheniny hnyigot cicö hnyigöulen bucen Zeboim hnyi hnyebuba.

¹⁹ Ke ba at leû fao hnyi hnyei Isaraela hia: anyin a haingen at Filisiti, ka habe, Wâ e nye he at Heberu ka bi hele vat me ö:

²⁰ ke haba at Isaraela hia adre me labö he ka at Filisiti he ka khet je ûnyi hnân wia kânâ, me utetebelök, me je giwa, me je pik;

²¹ ke so bi e hu gadra je fail hobi kâu je pik, me je utetebelök, me je fao ae vheivhei, me je giwa; me hnân khet je osöiny bolok.

²² Me haba hnyi ûen vat, me ba hele vat me ö adre me wâ unyin tavat hia thithö ödrin e tha e me Saulo me Jonathana: ke so bi adre me hake wâ unyi Saulo me Jonathana a nokon.

²³ Ke e bi lap tue anyin at Filisiti ke ne o but hnyi gethen ûheny Mikemas.