I. Korinito 16 - Iaai Bible 1901 (New Caledonia)

¹ KE haba ge ûhnöhnö hobi kâu wakap, e so öbun e ânyâ helâ me hnok hna hûna ka ta je ekalesia hnyi Galatia.

² Hnyi bong a bâniny seven e so öbun e ve ip unyibun bi helâ me hna ve hu, me me ba ûhnöhnö iny ka o thö.

³ Ke iny ka o thö, oge me he ka kunâ tavat, waleji öbun e ûca ge je tusi, he ka hom anyibun je bwihlany Jerusalema ai:

⁴ ke ame ne ûcû könya he ka hnyi he, mʼ ödrin e he ka tha he mönya.

⁵ Ke iny ka he ka vheno Makedonia, me oge me he ka o köbun; anyin oge me he ka gethen hnyi Makedonia;

⁶ ke oge ne he la ka tha laba möbun, me tuö ûen ae megic, me öbun e he ka su nya ka hnyi getheniny dok oge me he ka hnyin.

⁷ Anyin e ca wek he ka saû me ö ʼbun walang ang; anyin e wek bi he ka laba beû unyibun, e ka weny Than.

⁸ Ke oge me he ka laba hnyi Efeso ke ne o but hnyi Penetekos;

⁹ anyin adre hia but khong könya hwanuma ae lau, ke hu huliwa hnyin, ke se hia ta je iwahnaihmiony.

¹⁰ A ne o köbun Timoteo, wâ eâu öbun me me ca he ka laba unyibun me ot; anyin a e ame ânyâ huliwa anyin Than helâ me inya:

¹¹ anyin a wale, ca he ke at ka oûnyibâûâ e. Ke su thö jem öbun hnyi hnahic, me me he ka o könya: anyin oge me halubahingen tha e me hnyat me lakeiny.

¹² Ke gan hmâ hnok hna ûjongi Apolo ke liamekeiny, me me he ka tha o köbun me je liamekeiny: kʼ ame ca weny he ka o hnyi ûen ang; ke e ame he ka o, e ka hu ûen ae ûcû.

¹³ Hmâkâ thʼ öbun, tethmâ ju hnyi labageju, hnyok baga thö, hwege thö.

¹⁴ Ânyâ thö hnobun hna ânyâ hia hnyi ibetengiö.

¹⁵ Hnyat me lakeiny lö, (e khanʼ öbun lap anyi Setefana, a waleji wan a bân hnyi Akaia, ke ödrin e ka ham ödrin bi he ka bi athnyabainy wakap), inya oge me sumat öbun, ka habe,

¹⁶ e so öbun e he ka long hoton tavat helâe, me ödra hia minya adre me ûhadruo me huliwa.

¹⁷ Ke inya oge me senyin waleji ge ioi Setefana, me Fotunato, me Akaiko: anyin ödrin e ham ta je ûnyi ae hia gabun.

¹⁸ Anyin ödrin e okahwa hanuk, ke je hanubun minya: anyin a wale, kap soi ödra ju tavat helâe.

¹⁹ Ame italofa mʼ öbun ta je ekalesia hnyi Asia. Ame italofa gan hmâ mʼ öbun hnyi Than Akula me Perisila me ekalesia hnyi hnyabadru.

²⁰ Ame italofa mʼ öbun je liamekeiny hia thithö. Ûitalofaköu ju öbun ge ûcimhnyimak ae kap.

²¹ Inya Paulo oge me italofa mʼ öbun ge hnyamok.

²² A ne ca hnyok bi ke at ka Than Iesu Keriso, e so he ka anathema e. Maranatha.

²³ E so e unyibun ibete-ngiö baû anyin Than Iesu Keriso.

²⁴ E so e unyibun hia anyik ibetengiö hnyi Keriso Iesu. Amen.