I. Korinito 15 - Iaai Bible 1901 (New Caledonia)

¹ HNYAT me lakeiny lö, inya oge me omanenâ köbun ûthumetu ae so, waleji oge me omanenâ köbun, kʼ öbun e kap, me tethmâ hnyin,

² kʼ adre me omeli öbun kâu; oge me omanenâ ta je hofuc, waleji oge me khetâ köbun hnyin, ke öbun e ne kât hmâ, me ca labageju baû bi öbun.

³ Anyin oge me bök ka ham köbun ûnyi oge me kap, a gʼ ame mok Keriso can anyita ta je hulo helâ me hna sihnalimen;

⁴ ke adre me konâm e, kʼ adre me omelö hmetu thö hnyi bong a kuniny, helâ me je hna sihnalimen;

⁵ ke e ame manen kö Kefa; ke hwaban e ka hnyat a twelv;

⁶ kʼ ame manen hwaban e ka je liamekeiny ae se hia hon faiv haded, ke möt tavat ae se hia gadrin ke ne o but hnyi bong ang, ke a mokut keihen;

⁷ hwaban e ame manen kö Iakobo, ke hwaban e ka je aposetolo hia;

⁸ ke hwaban e, e ame manen minya könya, helâke me ke at a köluhabû.

⁹ Anyin a inya ang at ae ti ûhnyûkong hnyi ta je aposetolo, ke ca ûcû he ka hawo nya me aposetolo, anyin a oge me ovecâ ekalesia anyin Khong.

¹⁰ Ke haba inye helâng, me ûnyi ge ibetengiö baû anyin Khong: ke ca ûnyi baû bi anyin ibetengiö baû e ame omanenâ könya: ke nua anyik huliwa hon hnyat hia: ke ca ka ûnyi gak, ke so bi ûnyi ge ibetengiö baû anyin Khong wale a ham könya.

¹¹ Ke ame ne inya, kʼ ame ne ödrin, ohmun e khetâ helâe, ke öbun e kap minya helâe.

¹² Ke adre ne khetâ, ka habe, Adre me omeli Keriso hmetu ûnyi hnyi hna mok, ama hawa ka ha keihen gabun a e ba möt hmetu ûnyi hnyi hna mok?

¹³ Ke a ne ba möt hmetu ûnyi hnyi hna mok, awe, adre ca hia but omeli Keriso hmetu bi:

¹⁴ ke adre ne ca hia but omeli Keriso hmetu bi, me ûnyi baû hnöhmun hna khetâ, ke ûnyi baû minya bi anyihmun labageju.

¹⁵ Eke, ke adre me wâ a ohmun ang hnyat ohmun e ohnathoâ thoiâ Khong; anyin a ohmun e ohnathoâ Khong a gʼ ame omeli Keriso hmetu; waleji e ame ca omeli hmetu, e ka hnathu a gʼ adre me ca omelö hmetu tavat adre mokcu.

¹⁶ Anyin adre ne ca omelö hmetu tavat adre mokcu, awe, adre ca hia but omeli Keriso hmetu bi:

¹⁷ ke adre ne ca omeli Keriso hmetu bi, me ûnyi bâu anyibun labageju; ke öbun bala hnyi anyibun ta je hulo.

¹⁸ Ke hiʼ ödra but minya tavat adre me mokut unyi Keriso.

¹⁹ Ate ne geju Keriso hnyi möt thibi ang, awe, öta tavat ae hmak hnyok hon tavat hia thithö.

²⁰ Ke so bi adre hia but omeli Keriso hmetu thö ûheny hnyi hua mok, ke e at a bân ka möt ge tavat adre me mokut.

²¹ Anyin ame o but mok ûnyi ge at, kʼ ame o but möt hmetu ûnyi hnyi hna mok ûnyi ge at.

²² Anyin adre mok hia ga Adamu, helâe adre me ke ha omelö hia hmetu ge Keriso.

²³ Adre me he ka ve tot gaga, a ban Keriso, hwaban e je laten Keriso, e ka o but.

²⁴ Me ame he ka o obiny, me e ame he ka hna dokhon dokhu ka Khong, wale Kamen: e ka hia but ohia ta je dokhu hia, ke ta je musi hia, ke ta je man hia.

²⁵ Anyin ae ûca kâu he ka musi ke ne o but a hia but ip hmelen li can ta je iwahnaihmiöny më hia.

²⁶ Haba iwahnaihmiöny a biliny e ame he; ka ohia, me mok.

²⁷ Anyin, E ame ip hnyi hmelen li can ta je ûnyi hia thithö. Ke hnyi hnen hna ha, ka habe, Adre ip ta je ûnyi hia thithö hnyi hmelen, me e manen a ca hâiâ e minya bi, waleji at ame ip ta je ûnyi hia thithö hnyi hmelen e.

²⁸ Ke a hia but ohnyikânâ ta je ûnyi hia thithö hnyi hmlcen e, me adre me he ka ohnyikânâ minya bi Nokon hmelen at ame öhnyikânâ ta je ûnyi hia thithö hmelen e me me Khong thibi ae ti beönua bon hia.

²⁹ Ke hawa gadra adre bapataisoi ödra hnân hwaban tavat adre mokcu? ödra ka ca omelö hmetu thö tavat adre mokcu, hnân eû adre bapataisoi ödra me hwaban tavat adre mokcu?

³⁰ ke hnân eû ohmun e laba hnyi je hwakecin hna ootâ hnyi je awa hia?

³¹ Hnyat me lakeiny lö, inya oge me ha hwegiâ hnyi hnok hna hobeluâ gabun ûnyi ge Keriso Iesu a Tuhöta, a oge me mokcu hnyi je bong hia thibut

³² Oge ne hia but vat me ta je meno ûkûc hnyi Efeso hoton hwakecin at, ieû troban könya? At ka ca omelö hmetu bi tavat adre mokcu, awe, e so ate me han me ic, anyin ate me he nyi ka mok.

³³ Ca iyâûʼ öbun bi: ûhnenamö ae monu, wale at ame okongoâ hwakecin ae so.

³⁴ Hmak dö ka hwakecin ae wisa, ke ca mâdrâ bi hulö anyin ae ca khana bi keihen Khong: inya oge me ha hnân ohmehmʼ öbun.

³⁵ Ke ame he ke at ka ha, ka habe, ame he ka hawa ka möt hmetu tavat adre mokcu? ke ie unyin adre me he ka o më?

³⁶ At monu, ame ca he ka möt hnâm hna tä, e ka ca bobot bi:

³⁷ ke haba hnâm hna tā, me u me ca tä bi unyin ame he ka manen, ke so bi wan thibi, ame ne hwit, ame ne ke wan bi;

³⁸ ke haba Khong ame ham unyin, helâ me hnen hna weny, ke ve unyin bi ka ta je wan.

³⁹ Haba ta je utiö me ca khaca bi bongon, e ke viny bi at, ke ke viny bi meno, ke ke viny bi je meno adre me gâ, ke ke viny bi wâ.

⁴⁰ E hu ta je unyin drany, me ta je unyin hmeledrany: ke ke hmanenanginy bi aten drany, ke ke hmanenanginy bi aten hmeledrany.

⁴¹ E ke hmanenanginy bi seûno, ke ke hmanenanginy bi tehi, ke ke hmanenanginy bi ta je okhû; anyin ae ve bongon hmanenanginy ke okhû me ke okhû.

⁴² Helâe ge möt hmetu anyin tavat adre mokcu. Adre me tā hnyi bobot; ke adre me otilâ hmetu hnyi ca bobot bi;

⁴³ adre me tä hnyi ca so; adre otilâ hmetu hnyi hmanenang: adre tä e hnyi sēnyin; adre otilâ hmetu e hnyi man:

⁴⁴ adre me tä e hnyi unyin hmeledrany; adre me otilâ hmetu e hnyi unyin hanu. A ne hu unyin hmeledrany, awe e hu minya unyin hanu.

⁴⁵ Ke helâ me hna sihnalimen, ka habe, Adre up Adamu at a bân hanu ae möt. Ke Adamu a biliny hanu at a ham möt.

⁴⁶ Ke a ca bân bi ûnyi a hanu, ke so bi ûnyi a unyin; ke hwaban e ûnyi a hanu.

⁴⁷ Ûnyi eang hmeledrany at a bân, aten kânâ: ke ûheny hnyi drany at a loiny.

⁴⁸ E ûcû tavat ûnyi hnyi kânâ, me at ûnyi hnyi kânâ; ke ûcû at ûnyi hnyi drany, me at ûnyi hnyi drany.

⁴⁹ Ate me hia but we aten kânâ, helâe ate me he ka we aten drany.

⁵⁰ Hnyat me lakeiny, oge me ha, ka habe, e ca khana viny me dren he ka hu dokhu dokhon Khong; ke ca khana minya bobot he ka hu hna ca bobot bi.

⁵¹ Wâ bi, inya oge me ha köbun ûnyi ae iyong, ka habe, ate me ca he hia ka mokut, ke adre me he ka wiʼ öta,

⁵² e ti logot, helâ me thuthubademak, hnyi hna tûâ khoto a biliny: anyin ame he ka fuc khoto, ke adre me he ka omelö hmetu thö tavat adre mokcu ka hnyi ca bobot bi; ke adre me he ka wiʼ öta.

⁵³ Anyin ae ûcû bi he ka khavâ hna bobot eang ge hna ca bobot bi, me hna mok eang ge hna ca mok bala bi.

⁵⁴ Ke at ka hia but khavâ hna bobot eang ge hna ca bobot bi, me hna mok eang ge hna ca mok bi, awe, ame he ka hwâdâ thö hna sihnalimen, ka habe, Ame utâ but mok hnen dokhu.

⁵⁵ Mok lö, ewa dokhom dokhu? Mok lö, ewa ûdö gam?

⁵⁶ Haba ûdöiny mok, me wale hulo; ke haba maniny hulo, me wale hnanyibu:

⁵⁷ Ke oleâ ka Khong at ame ham köta dokhu ûnyi ge Tuhöta Iesu Keriso.

⁵⁸ Anyin a wale, hnyat a oûnykûmik lö, tethmâ ju öbun, ca bwebwet, ke hwege bala thö hnyi huliwa anyin Than, anyin ae khanʼ öbun a gʼ ame ca ûnyi baû anyibun huliwa ka Than.