I. Je Than 22 - Iaai Bible 1901 (New Caledonia)

¹ KE adre me laba hnyi kun ta huna ke ba vat anyin at Suria me Isaraela.

² Ke haba hnyi huna a kuniny, haba Jehosafata tnan Juda ame o ka than Isaraela.

³ Ke haba than Isaraela ame ha ka lakeiny, ka habe, Hawa, e ca khanʼ öbun a itin Ramothe-gileada, ke otin e laba hnyibu, me ca hûgûnâ e ûnyi hnyi hnyamen at Suria?

⁴ Me e ameha kö Jehosafata, ka habe, Hawa, u me he ka tha he mönya he ka vat hnyi Ramothe-gileada? Me haingö Jehosafata ka than Isaraela, ka habe, Iny ûcû möu, ke ûcû lakeik me lakem, ke ûcû halek je hors me halem je hors.

⁵ Ke haba Jehosafata ame ha ka than Isaraela, ka habe, Ö u hnö thö hofuc ho Iehova hnyi bong ang.

⁶ Me haba than Isaraela ame ûkhacaköuâ ta je perofeta, helâ me foa haded, me ha ködrin, ka habe, Hawa, oge me he ka he Ramothe-gileada ai he ka vat, oge ma hna ju? Haingödrin, ka habe, He thö anyin a ame he Iehova ka hna e ka hnyi hnyamen than.

⁷ Ke haingö Jehosafata, ka habe, E ba minya but ke perofeta anyi Iehova ang, me otin e he ka hnö e minya?

⁸ Haba than Isaraela ame ha kö Jehosafata, ka habe, Khaca biju at jia Mikala nöku Imela, me e khanʼ otin he ka hnei Iehova a deny e: ke so bi hûkötiânök e; anyin a e ame ca perofeta ûnyi ae so gak, ke ûnyi bi ae kong. Ke haingen Jehosafata; ka habe, Than, ca ha helâe.

⁹ Haba than Isaraela ame hawâ ke eunuka, me ha, ka habe, He thö ka ie hawo Mikaia nöku Imela.

¹⁰ Ke baha than Isaraela me Jehosafata than Juda ödru me ve laba hon anyidru li theron, ödre khavâ je khaû-ödru, hnyi dok ae ba ta ûnyi hnyin hnyi hna didro ka hnyi homagouleny Samaria; ke haba ta je perofeta hia ödrin e perofeta hnyi hnyimaködru.

¹¹ Ke haba Zedekia nöku Kenaana ame ânyâ li faoiny meno a fao bi, me ha, ka habe, Walang hna ha hnö Iehova, ka habe, U me he ka hagutâ at Suria ge li ûnyi ang, ke ne o but ame hiʼ ödrin dut.

¹² Ke haba ta je perofeta hia adre me perofeta helâe, me ha, ka habe, He thö Ramothe-gileada ai me hnahic: anyin ame he Iehova ka hna e ka hnyi hnyamen than.

¹³ Ke haba ûthumetu at a hawo Mikaia ame ha kâu, ka habe, Wâ bi, walang ang, khaca thibi hofuc hwan je perofeta, ödrin e omanenâ so ka than: e na so minya ju hwâm e me helâ me hodrin, ke hnyi ha thö ûnyi ae so.

¹⁴ Ke haingö Mikaia, ka habe, Kia inya Iehova, a haba ûnyi ame he Iehova ka ha, wale thibi e oge me he ka ha.

¹⁵ Kʼ ame o but ka than, me haingen than kâu, ka habe, Mikaia lö, hawa, ohmu ma he Ramothe-gileada ai he ka vat, ke ohmu ma hna ju? Haingen kâu, ka habe, He thö me hnahic; ke ame he Iehova ka hna e ka hnyi hnyamen than.

¹⁶ Ke haingen than kâu, ka habe, U me he ka ove khemanyâm könya a u me ca he ka ha könya ke hofuc ke hnathu thibi hnyi iö Iehova?

¹⁷ Ke haingen, ka habe, Oge wâ but Isaraela hia adre me tot monu hon je bucen, helâ me ta je mamoe ae ba at ame tuö: ke haingö Iehova, ka habe, E ba tuhan tavat ang; hamödrin he ka ve hmetu ka hnyi je hnyabadrin hnyi hnahic.

¹⁸ Haba than Isaraela ame ha kö Jehosafata, ka habe, Awe, oge ca ha köu, a e ame ca he ka perofeta ûnyi ae so könya, ke ûnyi bi ae kong?

¹⁹ Ke Mikaia ame ha, ka habe, Anyin a wale long ju u hofuc ho Iehova: oge me ō Iehova ame tabâ anyin theron, kʼ ame ûtitilen unyin ta je dö hia hnyi drany hnyi ke keihen metâ me meny.

²⁰ Ke haba Iehova ame ha, ka habe, Ie at ame he ka iyawö Ahaba me me he ka he me ta hnyi Ramothe-gileada? Ke ame ha helâng ke at, ke helâe ke at.

²¹ Ke ame o but ke hanu me tot hnyi hnyimakö Iehova, me ha, ka habe, Oge me he bi nya ka iyawâ e.

²² Ke haba Iehova ame ha kâu, ka habe, U ma he ka kâmâu? Me haingen, ka habe, Oge me he ka he but, ke oge me he bi nya a hanu ae thoi hnyi hnyimen anyin ta je perofeta hia. Haingen, ka habe, U me he ka iyawâ, me u me he minya ka tom: he thö, me ânyâ helâe.

²³ Ke walang ang, wâ bi, a hia but Iehova ip hanu ae thoi hnyi hnyimen ânyâm ta je perofeta eang; ke a hia but Iehova ha ûnyi ae kong gam.

²⁴ Haba Zedekia nöku Kenaana ame hakekenyâ me khaû wahicö Mikaia, me ha, ka habe, A deny ua hanu Iehova ûheny unyik he ka ha bi köu?

²⁵ Ke haba Mikaia ame thu, ka habe, Wâ bi, u me he ka wâ hnyi bong u me he ka didro ka hnyi hnyeule eiö hnyin he ka lubaduöng.

²⁶ Me haba than Isaraela ame ha, ka habe, Hum Mikaia thö, me hom e kö Amona at ame muso taun, me Joasa nokon than;

²⁷ me ha, ka habe, Walang hna ha hnen than, ka habe, Ip dö at ang hnyi uma ceat, me han ge aretoiny vec me köien vec, ke ne o but oge me o me hnahic.

²⁸ Ke haba Mikaia ame ha, ka habe, U je ne he ka o hmetu me hnahic, awe, a ca ha Iehova a deny inya. Me haingen, ka habe, Long ju öbun tavat hia thithö.

²⁹ Ke haba than Isaraela me Jehosafata than Juda, ödru me he Ramothe-gileada ai.

³⁰ Ke haingen than Isaraela kö Jehosafata, ka habe, Oge me he ka oiyongi nya bi, me hnyi vat: ke u me he ka khavâ ânyâm je ûkhaû. Me haba than Isaraela ame oiyongâ e bi, me hnyi vat.

³¹ Ke haba than Suria ame hûna ka je taben anyin je kariota a thote tu, me ha, ka habe, ca he ka vat me tavat ae ûhnyûkong me gan, ke hake than Isaraela thibi.

³² Ke haba je taben kariota ödrin e ō Jehosafata, me ödrin e ha, ka habe, Wale but ang than Isaraela me ödrin e saû kâu he ka kot: ke haba Jehosafata ame hongot goranyai.

³³ Ke haba je taben kariota ödrin e wâ a ca than Isaraela e, me ödrin e hna but e.

³⁴ Ke haba ke at ame hlec mono fana, me ame aat dö than Isaraela hnyi wanben hna ûhûjâköuâ ûkhaûen vat: anyin a wale e ame ha ka at ame owisa anyin kariota, ka habe, Saû thö, me hum nyâ ûheny hnyi hna vat; anyin oge aat dö.

³⁵ Ke gan tot vat hnyi bong eling; ke adre me otilâ than hon anyin kariota cicö at Suria, me e ame mokcu hnyi sahac: ke ame hingölö dren ûnyi hnyi aat ka hnyi hnyin kariota.

³⁶ Ke ame he ûthumetu hââng ka hnyi wanben je utbavat e ka he but ka dit seûno, ka habe, Ve hmetu but ka hnyi anyibun je taun me je ibun.

³⁷ Me ame mokcu than, ke adre me hom Samaria ai, me ödrin e konâm than hnyi an hnyi Samaria.

³⁸ Kʼ adre me hneû kariota hnyi an Samaria, ke haba je kuli ödrin e drem dren; (ke haba je momo hnyi gethen ödrin e soû eling;) helâ me hofuc ho Iehova waleji e ame ha.

³⁹ Ke haba kolon je hna ânyâ hnö Ahaba, me anyin ta je huliwa, me uma nyon elefan waleji e ame op, me ta je taun hia e ame op, hawa adre ca sihnalimen hnyi tusi hnân ha je bong bongon je than Isaraela?

⁴⁰ Ke ame mokut ut Ahaba tha e me lakamen, ke ame than biju Ahazia a nokon hwaban.

⁴¹ Ke haba Jehosafata nöku Asa ame hwân he ka thaniny Juda hnyi huna a vaki Ahaba thaniny at Isaraela.

⁴² Ke thote faiv je hunai Jehosafata hnyi hna otilâ e ka than; ke e ame musi hnyi Jerusalema twente faiv je huna. Ke Azuba ien hniyen, momo nöku Silehi.

⁴³ Ke e ame vheno gethen de Asa a kamen; e ame ca saû ûnyi hnyin, ame ânyâ ûnyi ae wisa hnyi hnyimakö Iehova: ke so bi adre me ca ohia je dok ae görany; ke haba tavat adre me bi hut bala me leû utö ae bo so hon je dok ae görany.

⁴⁴ Ke haba Jehosafata ame ânyâ ûsoköu me than Isaraela.

⁴⁵ Ke haba kolon je hna ânyâ hnö Jehosafata, me tang hwegien wale a manen gan, me hnen minya hna vat, hawa, adre ca sihnalimen hnyi tusi hnân ha je bong bongon je than Juda?

⁴⁶ Ke haba kolon tavat adre me hwen sodoma, a je kolon biju hnyi je bong bongu Asa a kamen, me e ame ohiʼ ödrin ûnyi hnyi hnyei.

⁴⁷ Ke ba than hnyi Edoma: ke haba ke at ame musi.

⁴⁸ Ke haba Jehosafata ame tibet je huiny Tasesa, me me he Ofira ai he ka haudin gol: kʼ ame ca kec bi je hu, anyin a hmouca but je hu hnyi Eziona-gebera.

⁴⁹ Ke haba Ahazia nöku Ahaba ame ha kö Jehosafata, ka habe, E so e tha he je lakeik me lakem hnyi je hu. Ke ca we Jehosafata bi.

⁵⁰ Ke ame mokut ut Jehosafata tha e me lakamen, me adre me konâm e me lakamen hnyi taun anyi Davita a kiben: ke ame than biju Jorama a nokon hwaban.

⁵¹ Ke haba hnyi huna a seventini Jehosafata than Juda, ame hwân Ahazia nöku Ahaba he ka muso at Isaraela hnyi Samaria, ke e ame musi hnyi Isaraela hnyi lo li huna.

⁵² Ke e ame ânyâ hwakecin ae kong hnyi hnyimakö Iehova, me vheno gethen deny kamen, me gethen deny hin yen, me hnyi gethen de Jeroboama nöku Nebata, waleji hnyi hnen hna oâ hulö ka at Isaraela.

⁵³ Ke e ame bi athnyabai Baala, kʼ ame khudrung kâu, me ame okûâ hmonyin anyi Iehova, Khongu Isaraela, hoton hna ânyâ hia hnen kamen.