I. Je Than 21 - Iaai Bible 1901 (New Caledonia)

¹ KE hwaban ta je ûnyi e, haba e hu hnyei vine i Nabotha at Jezerela, wale hnyi Jezerela, baten uma umo Ahaba than Samaria.

² Ke Ahaba ame fuc kö Nabotha me ha, ka habe, Ham dö könya em hnyei vine me me ik hnyei khölak, anyin ae hakekeny e ka hnyi umök uma; me oge me he ka ham köu ke hnyei vine ae ti so me hwaban, ke ame ne wem, me oge me ke ka ham köu mone me hwaban.

³ Haba Nabotha ame thu kö Ahaba, ka habe, Ohe, e kap ga Iehova a oge me he ka ham iny lakamök köu.

⁴ Ke a o but Ahaba ka hnyi umen uma me hmak me hmonyin can hofuc a ha kâu Nabotha at Jezerela; anyin a e ame ha, ka habe, Oge me ca he ka ham köu iny lakamök, Me e ame hlöhlöu hon hnen hna mokut me hwio hnyimakan, kʼ ame ca han bi.

⁵ Ke ame o but kâu Jezebela a âiân, me ha kâu, ka habe, Can ieû ame hmak hnyekom, me u me ca hnyi han.

⁶ Me haingen ka momo, ka habe, Anyin a oge me fuc kö Nabotha at Jezerela, me ha kâu, ka habe, Ham dö könya em hnyei vine hwaban mone; ke ame ne wem, me oge me he ka ham köu ke hnyei vine me hwaban: ke e ame thu, ka habe, Oge me ca he ka ham köu ik hnyei vine.

⁷ Me haba Jezebela a âiân ame ha kâu, ka habe, Hawa u at ame muso dökhu hnyi Isaraela? Todrö, han ju, ke so e senyin dö hnyekom: haba inya oge me he bi nya ka ham köu hnyei vine i Nabotha at Jezerela.

⁸ Me haba momo ama sihnalimen je tusi me ha iö Ahaba, me ohmâ ge haten anyin than, me e ame kunâ je tusi ka wahingat me je taben hnyi anyin taun, wale hnyat ödrin e tha laba me Nabotha.

⁹ Ke momo ame sihnalimen hnyi je tusi, ka habe, Öbun e he ka ha manenâ ca han, me ip Nabotha hnyi dok ae görany hon tavat:

¹⁰ ke ip ju li at a li at Belial hnyi hnyimakan, he ka bi fuco e, me ha, ka habe, U je bi gan ka Khong me than. Me hwaban thö e, hom dö e, me lûâ ge veto me me mokcu.

¹¹ Haba tavat hnyi anyin taun, wale wahingat me je taben ödrin e laba hnyi anyin taun, ödrin e ânyâ helâ me hna kunʼ ödrin ga Jazebela, hoton hna sihnalimen hnyi je tusi, wale e ame kunâ ködrin.

¹² Ödrin e ha manenâ ca han, me ip Nabotha hnyi dok ae görany hon tavat.

¹³ Ke a o thö li at, a li at Belial, me laba hnyi hnyimakan: ke haba li at Belial ödru me bi fuco e, jia Nabotha, hnyi hnyimakan tavat, me ha, ka habe, A hia but Nabotha bi gan ka Khong me than. Me ödrin e hom e ka hnyi hoton taun, me luâ e ge veto me e ame mokcu.

¹⁴ Me ödrin e ûkhûnöng kö Jezebela me ha, ka habe, Adre hia but lûö Nabotha, ke a mokcu.

¹⁵ Ke a long ut Jezebela a gʼ adre hia but lûö Nabotha, me a mokcu, haba Jezebela ame ha ko Ahaba, ka habe, Todrö, hom dö hnyei vine i Nabotha at Jezerela me em, waleji a höcö ham köu hwaban mone: anyin ae ca möt bi Nabotha, ke e a mokcu.

¹⁶ Ke a long ut Ahaba a ga mokcu Nabotha, haba Ahaba ame tot me he ka hnyi hnyei i Nabotha at Jezerela he ka hom e me iny bi.

¹⁷ Ke ame o but hofuc ho Iehova kö Elia at Tisebi, me ka, ka habe,

¹⁸ Todrö he thö ka ûkhanö me Ahaba than Isaraela hnyi Samaria: wâ bi, e bi hnyi hnyei vine i Nabotha, wale e ame he ka hnyin he ka hom me iny.

¹⁹ Ke u me he ka ha kâu, ka habe, Walang hna ba hnö Iehova, ka habe, Hawa, u je hia but ûhlingö me hûgûnâ minya? ke u me he ka ha kâu, ka; habe, Walang hna ha ga Iehova, ka habe. Haba hnyi dok ame drem je kuli drö Nabotha me ame he je kuli ka drem minya drâm, wale drâm bi.

²⁰ Haba Ahaba ame ha kö Elia, ka habe, E, iwahnaihmiony mönya, u je ō nya bi? Haingen, ka habe, Oge hia but ō u: anyin a u je ûcû u bi he ka ânyâ hulö hnyi hnyimakö Iehova.

²¹ Wâ bi, oge me he ka oâ köu ûnyi ae kong, me aba degeci u, me subâ degecâ ga Ahaba je wainda hia, me at adre ca, me at ame he baû hnyi Isaraela:

²² ke oge me he ka wia ânyâm lap me me helâ me lap anyi Joroboama nöku Nebata, ke helâ me lap anyi Baasa nöku Ahia, anyin a u je okûâ anyik hmonyin, me oâ hulö kö Isaraela.

²³ Ke haingö Iehova ga Jezebela, ka habe, Ame he je kuli ka ön Jezebela hnyi hna up haginy Jezerela.

²⁴ Haba hanö Ahaba ame he ka mok hnyi taun, me ame he je kuli ka an, ke haba at ame he ka mok hnyi ta hnyei, me ame he je meno ame gâ ethö ka an.

²⁵ (Ke ba at helâ me Ahaba, wale ame ka ûco e he ka ânyâ hulö hnyi hnyimakö Iehova, kʼ ame âjöngö e âiân jia Jezebela.

²⁶ Ke e ame ânyâ ûnyi ae ikiki hnyi hnen hna hnu hoton je idola, helâ me hna ânyâ hia ge at Amora, waleji ame obʼ ödra Iehova hnyi hnyimakan lakon Isaraela.)

²⁷ Ke a long ut Ahaba ta je hofuc eling, me e ame kia anyin ûkhaû, me khavâ ecmano ae gan nân, kʼ ame ca han, kʼame mokulec ec mano ae gan nân, me he menyöng.

²⁸ Me ame o but hofuc ho Iehova kö Elia at Tisebi, ame ha, ka habe,

²⁹ Hawa, u je wâ but a Ahaba ame oûhnyûkongo e bi hnyi hnyimakök? awe, anyin a e ame oûhnyûkongo e hnyi hnyimakök, me oge me ca he bi nya ka oâ ûnyi ae kong hnyi bongon ta je bong: ke o ge me he bi nya ka oâ ûnyi ae kong ka anyin lap hnyi ta je bong bongon nokon.