I. Je Than 20 - Iaai Bible 1901 (New Caledonia)

¹ KE haba Ben-adada than Suria ame ûkuacaköuâ aten vat hia unyin; me e bi unyin je than a thote tu, me je hors me kariota: me e ame ölö Samaria ai me thelöng, me vat më.

² Ke e ame kunâ je ûthumetu kö Ahaba than Isaraela ka hnyi taun, me ha kâu, ka habe, Walang hofuc ho Ben-adada, ka habe,

³ Anyik bi ânyâm sileva me gol; ke anyik bi minya laâiâm me lakom, a tavat ae so unyidrin.

⁴ Me haba than Isaraela ame thu me ha, ka habe, Than lö, a tuhok, haba inya me anyik ta je ûnyi, me ânyâm bi helâ me hnâm hna ha.

⁵ Ke ame o hmetu je ûthumetu, me ha, ka habe, Walang hofuc ho Ben-adada, ka habe, Oge hia but ûkhûnöng köu, me ha, ka habe, U me he ka hna könya ânyâm sileva, me ânyâm gol, me laâiâm me lakom;

⁶ ke haba nyi cicö ûen ang oge me he ka kunâ köu lathnyabaik, me ödrin e he ka elâm hnyin umâm uma, me je uma umen lakem; ke haba ta je ûnyi hia thithö ae wem, ödrin e he ka ip hnyi je hnyamödrin, me hom.

⁷ Haba than Isaraela ame hawâ wahingatiny hia hnyei me ha, ka habe, Wâhmakhmeto thʼ öbun, a gʼ ame elâm hna okongoâ hnen at e: anyin a e ame ûkhu-nöng he ka hom laöiök, me lakuk, me anyik je sileva, me anyik gol, ke oge ca behânâ gan.

⁸ Haba wahingat hia me tavat hia ödrin e ha kâu, ka habe, Ca long, ke ca ogâ.

⁹ Anyin a wale e ame ha ka je ûthumetu anyi Ben-adada, ka habe, Ha thö ka than a tuhok, ka habe, Haba ta je ûnyi hia u je ha könya athnyabaem a bân oge me he ka ânyâ: ke haba ûnyi ang e ca khanöʼ nya he ka ânyâ. Me ame he je ûthumetu, me thumeto e.

¹⁰ Haba Ben-adada ame ukhû-nöng kâu me ha, ka habe, Ame he je khong ka ânyâ helâe könya me bi hanen minya, ame ne ûcû kânâiny Samaria, me me ûsa khaca hna auk hobi kâu tavat adre me he ka hnu hotuk.

¹¹ Haba than Isaraela ame thu me ha, ka habe, E ca so he ka hobelöu hnen at ame khavâ je ûkhaûen vat, helâ me at ame uny.

¹² Ke ame long hofuc eling, ke ame tiga ic me je than, hnyi anyin je uma menâ, me e ame ha ka lakeiny, ka habe, Penapena thö. Me ödrin e tot metâ cicö taun.

¹³ Ke wâ bi, ame o but ke perofeta kö Ahaba than Isaraela me ha, ka habe, walang hna ha hnö Iehova, ka habe, Hawa, u je wâ but köien at ang? wâ bi, oge me he ka hna e ka hnyi hnyamâm hnyi bong ang; ke u me he ka wâhmakhmeto a inya Iehova.

¹⁴ Haba Ahaba ame ha, ka habe, Hamö ia? Ke haingen, ka habe, Walang hna ha hnö Iehova, ka habe, Hanymen wahidröuiny je thaniny je ke keihen hnyei. Ke haingen bi, ka habe, Hamö ia he ka ibi hwân vat? Haingen, ka habe, Hamâm.

¹⁵ Me e ame hawâ wahidröuiny je thaniny je ke keihen hnyei, ödrin tu haded ke thote tu: ke hwabodrin dö e ame hawâ tavat hia, wale lakon Isaraela hia, ödrin seven thauzan.

¹⁶ Ke ödrin e he hnyi jebigö. Ke haba Ben-adada ame ic me ka omonoâ e hnyi je uma menâ, e me je than, wale je than a thote tu ödrin e hadruâ e.

¹⁷ Me ame bân ka didrut je hidröuiny je thaniny je ke keihen hnyei; ke haba Ben-adada ame ûkhûnöng thö, me ödrin e thumeto e, ka habe, E hu tavat adre didrut ûheny Samaria.

¹⁸ Ke haingen, ka habe, ödrin e ne he so, hom melö thö, ke ödrin e ne he ka vat, hom melö thö.

¹⁹ Me ame didrut ûheny hnyi taun wahidröuiny je thaniny je ke keihen hnyei, kʼ ame hnu hotudrin utbavat.

²⁰ Ke ödrin e ve hlingâ at; kʼ ame kec at Suria, kʼ ame hnu ödrin Isaraela: ke ame kec bemöt Ben-adada hon hors tha e me tavat tabö hors.

²¹ Ke haba than Isaraela ame he me kât je hors me kariota, me hlingâ at Suria ke se hia hna hlingâ.

²² Ke ame he hakekeny but perofeta ka than Isaraela me ha kâu, ka habe, He thö, hwege thö, ke wâhmakhmeto thö ûnyi u me ânyâ: anyin a e ka huna but me ame he ka o hmetu köu than Suria.

²³ Ke haba lakeiny than Suria ödrin e ha kâu, ka habe, haba khongudrin, me, khongon je hnyei ae hut; waleling mödrin e hwege hutin: ke otin ka he ka vat mödrin hnyi hnyebuba, me otin e he bi ka hwege hudrin.

²⁴ Ke walang ûnyi he ka ânyâ, hom dö je than ûnyi hnyi je hanymodrin, me ip je taben vat hwabödrin:

²⁵ ke u me he ka aû ke utbavat hobi köu, helâji me utbavat a ta but unyâm, a je hors hwaban je hors, me je kariota hwaban je kariota: me otin e he ka vat mödrin hnyi hnyebuba, me ate me he ka hwege hudrin. Me e ame long hodrin, me ânyâ helâe.

²⁶ Ke a huna but, me haba Ben-adada ame hawâ at Suria, me be Afeka ai he ka vat me at Isaraela.

²⁷ Ke adre me hawâ lakon Isaraela, me ha ödrin, me he ka vat mödrin: ke haba lakon Isaraela ödrin e laba cici ödra helâke li hnahat got ae wakhalet, ke unöngötö hnyei ge at Suria.

²⁸ Ke ame o but ke aten Khong me ha ka than Isaraela, ka habe, Walang hna ha hnö Iehova, ka habe, Anyin ame ha at Suria, ka habe, haba Iehova me Khongon je hnyei ae hut, ke ca Khongon je hnyigöulen bucen, awe, oge me he ka hna köien at ang hia ka hnyi hnyamâm, mʼ öbun e he ka wâhmakhmeto a inya Iehova.

²⁹ Ke ödrin e hunuma ûciciödraköu hnyi seven ta bong. Ke haba hnyi bong a seveniny ame ûkhanö li vat, ke haba lakon Isaraela ödrin e hlingâ at Suria a wan haded thauzan tavat adre me he hon kânâ hnyi bong a khaca.

³⁰ Ke ame kec dö je kolon Afeka ai ka hnyi taun; me ame ta takoû je kolon ge hak veto, a ödrin twente seven thauzan. Ke ame kec dö Ben-adada ka hnyi taun ka hnyeule eiö hnyin.

³¹ Haba lathnyabainy ödrin e ha kâu, ka habe, Wâ bi ohmun e long ut a je than ae betenge je thaniny lap anyi Isaraela; Ö u hnʼ ohmun he ka khavâ je ecmano ae gan nân hnyi je hnyihmun, me je tö ae gan kahmen hon je hohmun, me he ka than Isaraela: ame ne he ka omeli u.

³² Me ödrin e weikâ je ecmano ae gan nân hnyi je hnyidrin, me je tö hnyi je bodrin, me he ka than Isaraela me ha, ka habe, Haingö Ben-adada athnyabaem, ka habe, Ö u hnö nya he ka möt. Me haingen, ka habe, Hawa e möt? keik e.

³³ Haba tavat adre me wâhmakhmeto, me ie belöng ame ne ûnykûmânen e; ke ödrin e ha, ka habe, Kem Ben-adada. Ke haingen, ka habe, He thʼ öbun ka hawâ. Ke Ben-adada ame he kâu; me e ame hawâ e ka hnyi anyin kariota.

³⁴ Haba Ben-adada ame ha kâu, ka habe, Haba je taun a hûgûnâ cica ge kâmâm, oge me he ka hna; ke u me he ka ânyâ je gethen hnyi Damaseko hobi köu, helâ me hnö cica hna ânyâ hnyi Samaria. Ke hai-Dgö Ahaba, ka habe, Oge me he ka hnö u me ûhihinyköu ang. Me e ame ânyâ ûhihinyköu më, me hna but e.

³⁵ Ke haba ke at hanen lakon je perofeta ame ha ka hanen hnyi hofuc ho Iehova, ka habe, Ö u kuʼ nya. Ke höcö bi at he ka kot e.

³⁶ Haba e ame ha kâu, ka habe, Anyin a u je ca long hofuc ho Iehova, wâ bi, u ka he thö ûhem ang unyik, ame he bi liona ka hlingö u. Ke e ame tiga ibi he but ûheny unyin, me haba liona ame wâ e, me hlingâ.

³⁷ Ke e ame wâ ke at me ha, ka habe, Ö u kuʼ nya. Me e ame kot e, ame kot me e ame ät.

³⁸ Haba perofeta ame he, me tot halubahingen than eû hnyi gethen, me oiyongâ e bi ge hna tube li emakan ge manoiny ban.

³⁹ Ke ame he ehele than, me e ame hawâ than: ke haingen, ka habe, Inya athnyabaem ame he wanben vat; ke wâ bi ke at ame saûâ könya ke at, me ha, ka habe, Tuö ju at ang: ame ne he ka hia e, ame he ânyâm möt he ka bi hwaban anyin möt, ke u je ne he ka bi hwaban khaca talan sileva.

⁴⁰ Ke inya athnyabaem ame huliwa tot, me ame hia but e. Haba than Isaraela ame ha kâu, ka habe, Ame he ka helâ me hnâm hna owisa; u je hia but ha muâ.

⁴¹ Ke e ame ie uny jut manoiny ban hnyi hnyimakan; me than Isaraela ame wâ a e hanen je perofeta.

⁴² Me haingen kâu, ka habe, Walang hna ha hnö Iehova, ka habe, Anyin a u je hna at oge me hangâ ûnyi hnyi hnyamâm, me ame he ânyâm möt ka bi hwaban anyin möt, me lakem ka bi hwaban lakeiny.

⁴³ Me ame he than Isaraela ka hnyi umen uma me vec me hmonyin, me o hnyi Samaria.